Luka 11 bob
1 Ku'nlerdin' birinde İysa bir jerde duwa etip turg'an edi. Duwa etip bolg'annan son', sha'kirtlerinin' biri Og'an: – İyem! Yaqıya o'z sha'kirtlerine duwa etiwdi u'yretkenindey, Sen de bizlerge duwa etiwdi u'yret, – dedi.
2 İysa olarg'a bılay dedi: – Duwa etkenin'izde bılay den'ler: A'ke! Senin' atın' muxaddes bola bersin. Senin' Patshalıg'ın' kelsin.
3 Bizlerge ha'r ku'ni ku'ndelikli nanımızdı bere go'r.
4 Gu'nalarımızdı keshire go'r. O'ytkeni bizler de o'zlerimizge gu'na qılg'an ha'r bir adamdı keshiremiz. Bizlerdin' azg'ırılıwımızg'a jol qoyma.
5 İysa olarg'a ja'ne bılay dedi: – Aytayıq, aran'ızdag'ı birin'izdin' dostısı bar. Ol yarım aqshamda dostısına barıp: «Dostım! Mag'an qarızg'a u'sh nan berip tur.
6 Sebebi saparda ju'rgen bir dostım kelip edi, onın' aldına qoyatug'ın hesh na'rsem joq», – depti.
7 Sonda dostısı ishten: «Menin' tınıshımdı alma. Esigim beklewli. Balalarım da menin' menen birge to'sekte jatır. Ornımnan turıp, sag'an hesh na'rse bere almayman», – dep juwap beripti.
8 Biraq sizlerge aytatug'ınım: ornınan turıp, dostı bolg'anı ushın sorag'anın bermese de, izinen qalmay sorag'anı sebepli ol ornınan turıp, qansha sorasa, sonsha beredi.
9 Sonlıqtan sizlerge aytatug'ınım: soran'lar, sizlerge beriledi. İzlen'ler, tabasızlar. Esikti qag'ın'lar, ol sizlerge ashıladı.
10 O'ytkeni sorag'an ha'r bir adam aladı, izlegen tabadı, esik qaqqang'a ashıladı.
11 Aran'ızda qaysı a'ke balası balıq sorasa, og'an balıq ornına jılan beredi?
12 Ma'yek sorasa, og'an shayan beredi?
13 Solay etip, o'zlerin'iz jaman bola tura, o'z balaların'ızg'a jaqsı sıylar beriwdi bilsen'iz, aspandag'ı A'ke de O'zinen sorag'anlarg'a Muxaddes Ruwxtı beriwi so'zsiz.
14 Bir ku'ni İysa bir adamnan gu'n'elek jindi quwıp shıg'ardı. Jin shıqqannan son', gu'n'elek adam so'yley baslag'anda, xalıq hayran qaldı.
15 Biraq olardın' geybirewleri: «Ol jinlerdi jinlerdin' baslıg'ı Belzebu'lshaytannın' ku'shi menen quwıp shıg'arıp ju'r», – desti.
16 Al basqaları İysanı sınap ko'rmekshi bolıp, aspannan ka'ramatlı belgi ko'rsetiwin talap etti.
17 Biraq İysa olardın' oyların bilip, bılay dedi: – O'z ara qarsı bolıp bo'lingen ha'r bir patshalıq joq boladı. O'z ara qarsı bolıp bo'lingen ha'r bir u'y qulaydı.
18 Eger shaytan o'z ara qarsı bolıp bo'linse, onın' patshalıg'ı qalay saqlanadı? Sizler Meni: «Jinlerdi Belzebu'lshaytannın' ku'shi menen quwıp shıg'arıp ju'r», – deysizler.
19 Eger Men jinlerdi Belzebu'l-shaytannın' ku'shi menen quwıp shıg'aratug'ın bolsam, onda sizlerdin' sha'kirtlerin'iz olardı kimnin' ku'shi menen quwıp shıg'arıp ju'r? Solay etip, olar sizlerdin' nadurıs ekenin'izdi a'shkaralaydı.
20 Biraq, eger Men jinlerdi Qudaydın' ku'shi menen quwıp shıg'arıp atırg'an bolsam, onda sizlerge Quday Patshalıg'ının' jetip kelgeni.
21 Tis-tırnag'ına deyin qurallang'an bir ku'shli adam o'z u'yin qorg'asa, onın' mal-mu'lki aman boladı.
22 Al onnan da ku'shlirek birew og'an hu'jim jasap, onı jen'se, onın' isengen barlıq quralların tartıp alıp, oljasın bo'listiredi.
23 Kim de kim Menin' menen birge bolmasa, ol Mag'an qarsı. Kim de kim Menin' menen birge jıynamasa, ol shashadı.
24 Jawız ruwx adamnan shıqqannan keyin suwsız jerlerdi gezip, dem alıwg'a orın izleydi. Taba almag'annan son', ol: «Shıqqan u'yime qaytayın», – deydi.
25 Qaytıp kelgende, u'ydin' tazalanıp ha'm jıynalıp turg'anın ko'redi.
26 Sonda ol barıp, o'zinen de jawız jeti ruwxtı ertip keledi de, kirip sol u'yde turadı. Solay etip, sol adamnın' son'g'ı awhalı burıng'ıdan da jaman boladı.
27 İysa usılardı aytıp turg'anda xalıq ishinen bir hayal dawıslap, Og'an: – Seni ko'tergen qursaq ha'm Seni emizgen ko'kirekler qanday baxıtlı! – dedi.
28 Biraq İysa og'an: – Qudaydın' so'zin tın'lap, onı orınlawshılar onnan da baxıtlı! – dedi.
29 Xalıq jıynalıp, ko'beyip atırg'anda, İysa olarg'a bılay dep ayta basladı: – Bul a'wlad – jaman a'wlad! Ol ka'ramatlı belgi talap etpekte. Biraq og'an Yunustın' ka'ramatlı belgisinen basqası ko'rsetilmeydi.
30 Yunus Nineviya turg'ınları ushın qanday belgi bolsa, Adam Ulı da bul a'wlad ushın sonday belgi boladı.
31 Qubladag'ı hayal patsha hu'kim shıg'arılatug'ın qıyamet-qayım ku'ninde usı a'wladtın' adamları penen birge turıp, onı ayıplaydı. Sebebi ol Sulaymannın' danalıg'ın esitiw ushın, jer betinin' arg'ı shetinen kelgen-g'o. Biraq bul jerde Sulaymannan da ullı Birew bar.
32 Nineviya turg'ınları hu'kim shıg'arılatug'ın qıyamet-qayım ku'ninde usı a'wlad penen birge turıp, onı ayıplaydı. O'ytkeni Yunus ja'riyalag'anda, olar ta'wbe etken-g'o. Biraq bul jerde Yunustan da ullı Birew bar.
33 – Hesh kim de shıranı jag'ıp, onı jasırın jerge yamasa ıdıstın' astında qoymaydı. Kerisinshe, kirgenler jaqtını ko'rsin dep, onı shıra qoyg'ıshqa qoyadı.
34 Ko'zin' – denen'nin' shırag'ı. Eger ko'zin' saw bolsa, pu'tkil denen' de jarıq boladı. Eger ko'zin' saw bolmasa, denen' de pu'tkilley qaran'g'ı boladı.
35 Sonlıqtan da, abayla, ishin'degi jarıq qaran'g'ı bolmasın!
36 Eger pu'tkil denen' jarıq bolıp, hesh bir qaran'g'ı jeri bolmasa, shıra seni o'z nurı menen jaqtı qılg'anı sıyaqlı, denen' pu'tkilley jarıq boladı.
37 İysa usı so'zlerdi aytıp turg'anda, bir parisey Onı u'yine awqatlanıwg'a shaqırdı. İysa onın' u'yine kirip, awqatlanıwg'a otırdı.
38 İysanın' awqattan burın qol juwmag'anın ko'rip, parisey tan' qaldı.
39 Sonda İyemiz og'an: – Ha'y pariseyler, sizler tabaq-kesenin' sırtın tazalaysızlar, biraq o'z ishin'iz na'psiqawlıq ha'm jawızlıqqa tolı.
40 Ha'y, aqılsızlar, sırtın jaratqan ishin de jaratqan emes pe?
41 Jaqsısı, ishin'izdegiden qayır-sadaqa berin'ler, sonda sizler ushın ha'mme na'rse taza boladı.
42 Ha'siret shegesizler, pariseyler! Sizler jalbız, iyisli sho'p ha'm ha'r tu'rli palız o'nimlerinin' onnan birin beresizler, biraq a'dillikke ha'm Qudaydın' su'yispenshiligine biypa'rwa qaraysızlar. Bunı da islep, onı da qaldırmawın'ız kerek edi-g'o.
43 Ha'siret shegesizler, pariseyler! Sizler ma'jilisxanalarda to'rde otırıwdı, bazarda o'zlerin'izge sa'lem beriliwin jaqsı ko'resizler.
44 Sizler ha'siret shegesizler! Sebebi sizler adamlar bilmey u'stilerinen basıp o'tetug'ın belgisiz qa'birlerge uqsaysızlar, – dedi.
45 Sonda nızam mug'allimlerinin' biri İysag'a: – Ustaz! Sen bul so'zlerdi aytıp, bizlerdi de qapa qılıp atırsan', – dedi.
46 Biraq İysa: – Sizler de ha'siret shegesizler, nızam mug'allimleri! O'ytkeni sizler ko'terip ju'riwge qıyın ju'klerdi adamlarg'a artıp, o'zlerin'iz olardı ko'terisiwge barmag'ın'ızdı da qozg'amaysızlar.
47 Sizler ha'siret shegesizler! Sebebi sizler ata-babaların'ız o'ltirgen payg'ambarlarg'a mazarlar ornatasızlar.
48 Solay etip, sizler ata-babaların'ızdın' islerin maqullap, olardı da'lilleysizler. Olar payg'ambarlardı o'ltirgen edi, al sizler olarg'a mazarlar ornatasızlar.
49 Sonlıqtan da, Qudaydın' danalıg'ı bılay degen: «Men olarg'a payg'ambarlar menen elshilerdi jiberemen. Olar geybirewlerin o'ltirip, geybirewlerin quwg'ın qıladı».
50 Sol sebepten Abıldın' qanınan baslap, qurbanlıq shalınatug'ın orın menen İbadatxana arasında o'ltirilgen Zekeriyanın' qanına deyin, du'nya jaratılg'annan beri to'gilgen barlıq payg'ambarlardın' qanı usı a'wladtan talap etiledi.
51 Awa, sizlerge aytatug'ınım: usı a'wladtan talap etiledi!
52 Ha'siret shegesizler, nızam mug'allimleri! O'ytkeni sizler qutqarılıw haqqında bilim qapısının' giltin tartıp aldın'lar: bul qapıdan o'zlerin'iz de kirmedin'ler, kirmekshi bolg'anlarg'a da tosqınlıq jasadın'lar, – dedi.
53 İysa sol jerden ketip baratırg'anda, ashıwlang'an diniy mug'allimler menen pariseyler Onı qısqıg'a alıp, ko'p sorawlarg'a juwap beriwge ma'jbu'rledi.
54 Olar İysanı so'zinen tutıp ayıplaw ushın, Onı an'lıdı.
