Luka 12 bob
1 Sonın' arasında ko'p mın'lag'an adamlar jıynalıp, bir-birine tıg'ılısıp turdı. İysa aldı menen O'z sha'kirtlerine so'z baslap, bılay dedi: – Pariseylerdin' ashıtqısınan, yag'nıy eki ju'zlilikten saq bolın'lar!
2 Ashılmaytug'ın hesh qanday sır, bilinbeytug'ın hesh qanday jasırın na'rse joq.
3 Sonlıqtan qaran'g'ıda aytqanın'ız jaqtıda esitiledi, bekitiwli qapı artında qulaqqa sıbırlap aytqanın'ız tamlardın' to'besinen ja'riyalanadı.
4 Menin' sizlerge, doslarıma aytatug'ınım: deneni o'ltirse de, bunnan son' basqa hesh na'rse isley almaytug'ınlardan qorqpan'lar!
5 Biraq kimnen qorqıwın'ız kerek ekenin aytayın: o'ltirgennen keyin, dozaqqa taslawg'a qu'direti ku'shli Qudaydan qorqın'lar. Awa, sizlerge aytatug'ınım: Onnan qorqın'lar.
6 Bes shımshıq eki tiying'a satılmay ma? Solay bolsa da, olardın' hesh birin de Quday umıtpaydı.
7 Basların'ızdag'ı shashlardın' ba'ri de Qudayg'a sanawlı. Sonlıqtan qorqpan'lar: ko'p shımshıqlardan sizler qımbatlıraqsızlar-g'o.
8 Sizlerge aytatug'ınım: kim de kim Meni adamlar aldında ta'n alsa, Adam Ulı da onı Qudaydın' perishtelerinin' aldında ta'n aladı.
9 Al kim de kim Meni adamlar aldında ta'n almasa, onın' o'zi de Qudaydın' perishtelerinin' aldında ta'n alınbaydı.
10 Adam Ulına qarsı bir so'z aytqan ha'r bir adam keshiriledi, biraq Muxaddes Ruwxqa til tiygizgen adam keshirilmeydi.
11 Sizlerdi ma'jilisxanalarg'a, basshılarg'a ha'm ha'kimlerge aparg'anda, qalay juwap beriwdi yamasa ne aytıwdı qayg'ırman'lar.
12 Sebebi ne aytıw kerek ekenin sizlerge sol waqıtta-aq Muxaddes Ruwx u'yretedi.
13 Xalıq arasınan birew İysag'a: – Ustaz, a'jag'ama ayt, miyrastı menin' menen bo'lissin, – dedi.
14 İysa og'an: – Kim Meni sizlerge qazı yamasa miyraslardı bo'liwshi etip qoydı? – dedi.
15 Son'ınan xalıqqa: – Abaylan'lar, du'nyaxorlıqtan saq bolın'lar! O'ytkeni adamnın' o'miri onın' mal-mu'lkinin' ko'pligine baylanıslı emes, – dep,
16 olarg'a mınaday tımsal keltirdi: – Bir bay adamnın' egislik jeri mol zu'ra'a't beripti.
17 Ol o'z-o'zine: «Ne islesem eken? O'nimlerimdi jıynap qoyatug'ın jerim joq», – dep pikir ju'rgizipti.
18 Son'ınan: – Bılay isleymen: g'a'llexanalarımdı buzıp, olardı u'lkeytip salaman ha'm sol jerge barlıq g'a'llem menen mal-mu'lkimdi jıynap qoyaman.
19 Son'ınan o'z janıma bılay deymen: «Janım, ko'p jılg'a jetetug'ın mol du'nyan' bar. Endi dem al, iship-jep, kewlin'di xoshla», – depti.
20 Biraq Quday og'an: – Ha'y, aqmaq, bu'gin tu'nde senin' janın' alınadı. Sonda senin' jıynaptergenlerin' kimge qaladı? – depti.
21 O'zi ushın baylıq jıynap, Quday aldında sıqmar bolg'an adamnın' awhalı usınday boladı.
22 İysa sha'kirtlerine bılay dedi: – Sonlıqtan sizlerge aytatug'ınım: ne jeymiz dep, janın'ız ushın, ne kiyemiz dep, denen'iz ushın ta'shiwishlenben'ler!
23 Jan awqattan, dene kiyimnen artıq-g'o.
24 G'arg'alarg'a qaran'lar: olar ekpeydi de, ormaydı da. Olardın' ya da'n saqlag'ıshları, ya g'a'llexanaları joq. Biraq, Quday olardı asıraydı. Al sizler quslardan qanshelli qımbatlısızlar!
25 Ta'shiwishleniw sebepli, kim sizlerdin' aran'ızda o'z o'mirin bir saatqa bolsa da uzayta aladı?
26 Eger usınday kishkene na'rse qolın'ızdan kelmese, basqa na'rseler haqqında ta'shiwishleniwdin' nege keregi bar?
27 Liliya gu'llerinin' qalay o'sip turg'anına qaran'lar! Olar miynet te etpeydi, jip te iyirmeydi. Biraq sizlerge aytatug'ınım: Sulayman da o'zinin' sa'n-saltanatında usılardın' birewindey sa'nli kiyinbegen edi.
28 Eger bu'gin dalada o'sip turg'anı menen, erten' oshaqqa taslanatug'ın sho'pti Quday usılay kiyindirse, sizlerdi olardan da artıq kiyindirmes pe edi, ha'y, isenimi azlar!
29 Sonlıqtan da, ne iship, ne jeytug'ının'ızdı izlep, ta'shiwishlenben'ler.
30 Sebebi usılardın' ba'rin bul du'nyanın' butqa tabınıwshıları izlep ju'redi. Sizlerdin' usılarg'a mu'ta'j ekenin'izdi A'ken'iz biledi.
31 Onın' ornına, Quday Patshalıg'ın izlep ju'rin'ler, sonda bular sizlerge qosımsha etip beriledi.
32 Ha'y, kishkene pada, qorqpa! A'ken'iz sizlerge Patshalıqtı beriwdi maqul taptı.
33 Mal-mu'lkin'izdi satıp, qayır-sadaqa berin'ler. O'zlerin'izge tozbaytug'ın qalta islep, aspanda tawsılmaytug'ın g'a'ziyne jıynan'lar. Ol jerge urı da jaqınlamaydı, ku'ye de tu'sip jemeydi.
34 O'ytkeni baylıqların'ız qay jerde bolsa, kewillerin'iz de sol jerde boladı.
35 – Bellerin'iz buwıwlı bolıp, shıraların'ız janıp tursın!
36 Xojayını neke toydan qaytıp kelip, esikti qaqqanda, og'an da'rriw ashıw ushın ku'tip turg'an xızmetshilerdey bolın'lar.
37 Xojayını kelgende olardın' sergek bolıp turg'anın ko'rse, sol xızmetshiler qanday baxıtlı! Sizlerge shının aytaman: ol belin buwıp, xızmetshilerin otırg'ızıp, o'zi olarg'a xızmet etedi.
38 Eger xojayını tu'n ortasında yamasa tan' atqanda kelip, xızmetshilerinin' oyaw turg'anın ko'rse, onda sol xızmetshiler qanday baxıtlı!
39 Mınanı bilip qoyın'lar: eger u'y iyesi urının' qashan keletug'ının bilse, ol u'yine urının' buzıp kiriwine jol qoymas edi.
40 Sizler de tayar bolıp turıwın'ız sha'rt! Sebebi Adam Ulı sizler oylamag'anda keledi.
41 Sonda Petr: – İyem, Sen bul tımsaldı tek bizlerge aytıp atırsan' ba yamasa ha'mmege me? – dedi.
42 İyemiz bılay dedi: – İyesi u'y-ishimdegilerge tiyisli awqatın waqtında bersin dep, olardın' u'stinen tayınlag'an isenimli ha'm aqıllı u'y basqarıwshı kim?
43 İyesi kelgende onın' solay islep atırg'anın ko'rse, sol xızmetshi qanday baxıtlı!
44 Sizlerge shının aytıp turman: iyesi onı o'zinin' pu'tkil mal-mu'lkin basqarıwshı etip tayınlaydı.
45 Eger sol xızmetshi ishinen: «İyem tez kele qoymas» dep, malaylar ha'm shorılardı sabap, iship-jep, ma's bola baslasa,
46 onda sol xızmetshinin' iyesi ku'tpegen ku'ni ha'm oylamag'an waqıtta kelip, onı ayawsız jazalap, isenbeytug'ınlardın' awhalına saladı.
47 İyesinin' erkin bilse de tayar turmag'an, onın' erki boyınsha is tutpag'an xızmetshi ko'p tayaq jeydi.
48 Al onın' erkin bilmegen ha'm jazag'a turarlı is islegen xızmetshi az tayaq jeydi. Kimge ko'p berilgen bolsa, onnan ko'p talap etiledi. Kimge ko'p isenip tapsırılsa, onnan ko'birek soraladı.
49 – Men du'nya ju'zine ot salıwg'a keldim. Onın' ha'zir-aq jalınlap ketiwin qanshelli qa'ler edim!
50 Men ju'da' awır azap-ha'siretti* basımnan keshiriwim tiyis. Bul orınlang'ansha, qanshelli qıynalaman!
51 Meni jer ju'zine tatıwlıq a'kelgen, dep oylap atırsız ba? Yaq, deymen sizlerge: alawızlıq a'kelgenmen.
52 O'ytkeni bunnan bılay, bir u'yde bes adam bolsa, olar o'z ara bo'linedi. U'shewi ekewine qarsı, ekewi u'shewine qarsı boladı.
53 A'kesi balasına, balası a'kesine qarsı, anası qızına, qızı anasına qarsı, qa'yin enesi kelinine, kelini qa'yin enesine qarsı bolıp bo'linedi.
54 Son'ınan İysa xalıqqa da bılay dedi: – Sizler batıstan bir bulttın' ko'terilgenin ko'rgenin'izde, da'rriw: «Jawın jawadı» deysizler ha'm sonday boladı da.
55 Qubla samalı eskende: «Ku'n ıssı boladı» deysizler ha'm sonday boladı da.
56 Ha'y, eki ju'zliler! Jer ha'm aspannın' tu'sin anıqlay alsan'lar da, nege ha'zirgi waqıttın' rayın anıqlay almaysızlar?
57 Nenin' durıs ekenin nege o'zlerin'iz sheshe almaysızlar?
58 Sen o'z dawlasın' menen birge basshının' aldına baratırg'anın'da, jolda onın' menen jarasıwg'a tırıs. Olay etpesen', ol seni qazının' aldına aparadı, qazı seni xızmetkerge tapsıradı, al xızmetker seni qamap taslaydı.
59 Sag'an aytatug'ınım: son'g'ı tiyinin'di to'lep tawıspag'anın'sha, ol jerden hesh shıg'a almaysan'.
