Luka 14 bob
1 Bir dem alıs ku'ni İysa pariseylerdin' bir basshısının' u'yine awqatqa kelgende, ha'mme Onı baqlap otırdı.
2 Sonda sarsıq keselden azap shekken bir adam İysanın' aldına keldi.
3 İysa diniy mug'allimler menen pariseylerden: – Dem alıs ku'ni awırıw adamg'a shıpa beriw nızamg'a tuwrı kele me yamasa tuwrı kelmey me? – dep soradı.
4 Olar u'ndemedi. Sonda İysa sol adamg'a qolın tiygizip shıpa berdi de, qaytarıp jiberdi.
5 Son'ınan olarg'a bılay dedi: – Aran'ızdag'ı birin'izdin' balası yamasa o'gizi qudıqqa tu'sip ketse, dem alıs ku'ni bolıwına qaramastan, onı da'rriw shıg'arıp almay ma?
6 Olar İysanın' bul ga'pine juwap bere almadı.
7 Qonaqlardın' o'zlerine to'rdegi orınlardı tan'lap atırg'anın ko'rgen İysa olarg'a mınaday bir tımsal ayttı:
8 – Seni birew neke toyına shaqırg'anda, to'rdegi orıng'a otırma. Shaqırılg'anlar arasında sennen de sıylıraq birew bolıwı mu'mkin.
9 Olay etpesen', ekewin'izdi de shaqırg'an adam sag'an kelip: «Mına adamg'a ornın'dı ber» dese, sen uyalıp, esik bettegi orıng'a otırıwg'a ma'jbu'r bolasan'.
10 Sonlıqtan qonaqqa shaqırılg'anın'da, barıp esik bettegi orıng'a otır. Sonda seni qonaqqa shaqırg'an adam janın'a kelip: «Dostım, to'rge shıg'ıp otır», – deydi. Solay etsen', o'zin' menen otırg'an ha'r bir adamnın' aldında abırayg'a iye bolasan'.
11 Sebebi kim de kim o'zin joqarı tutsa, ol pa'sletiledi, al kim de kim o'zin pa's tutsa, ol joqarı boladı.
12 Son'ınan İysa O'zin shaqırg'an u'y iyesine: – Tu'ski yamasa keshki zıyapat bergenin'de dosların'dı, tuwısqanların'dı, ag'ayinlerin'di, ya bay qon'sıların'dı shaqırma. O'ytkeni olay etsen', olar da seni qonaqqa shaqırıp, sag'an qaytaradı.
13 Kerisinshe, zıyapat bergenin'de jarlı, mayıp, aqsaq ha'm soqırlardı shaqır.
14 Solay etsen', sen baxıtlı bolasan'. Sebebi olar sag'an qaytara almaydı. Biraq haq adamlar qayta tirilgende, Quday sag'an qaytaradı, – dedi.
15 İysa menen dasturxan a'tirapında otırg'anlardın' biri bul so'zlerdi esitip, Og'an: – Quday Patshalıg'ında duz tatqan adam baxıtlı, – dedi.
16 İysa og'an bılay dedi: – Bir adam u'lken zıyapat berip, ko'p qonaq shaqırıptı.
17 Awqatlanatug'ın waqıt bolg'anda: «Kelin'ler, ha'mmesi tayar boldı», – dep aytıw ushın, mira't etilgenlerge o'z xızmetshisin jiberipti.
18 Biraq ha'mmesi oylasıp qoyg'anday, sıltaw taba baslaptı. Birinshisi og'an: «Men jer satıp aldım, sonı barıp ko'riwim kerek, o'tinemen, meni keshir», – depti.
19 Al ekinshisi: «Men bes jup o'giz satıp aldım, solardı sınap ko'riwge baratırman. O'tinemen, meni keshir», – depti.
20 U'shinshisi de: «Men tap jan'a u'ylendim, sonlıqtan kele almayman», – depti.
21 Xızmetshi qaytıp kelip, bulardın' ha'mmesin xojayınına aytıp beripti. U'y iyesi ashıwlanıp, xızmetshisine: «Tez bar da, qalanın' u'lken-kishi ko'shelerin aralap, jarlı, mayıp, soqır ha'm aqsaq adamlardı bul jerge alıp kel», – dep buyırıptı.
22 Son'ınan xızmetshi: «Xojayın, buyırg'anların'ızdı orınladım, biraq ja'ne de bos orın bar», – depti.
23 Xojayın xızmetshisine: «Jollarg'a ha'm awıl soqpaqlarına barıp, adamlardı bul jerge keliwge ko'ndir. Sonda u'yim adamlarg'a tolı boladı.
24 O'ytkeni sizlerge aytatug'ınım: mira't etilgenlerdin' hesh qaysısı da menin' zıyapatımnan duz tatpaydı», – depti.
25 İysa menen birge ko'p xalıq ju'rgen edi. İysa olarg'a burılıp bılay dedi:
26 – Kim de kim Mag'an kelip, ata-anasın, hayalın, balaların, ag'a-inisin, apa-qarındasların, ha'tte, o'z o'mirin de jek ko'rmese, ol Menin' sha'kirtim bola almaydı.
27 Kim de kim o'z atanaq ag'ashın arqalap, Menin' izimnen ju'rmese, ol Menin' sha'kirtim bola almaydı.
28 Aran'ızdag'ı birin'iz minara qurmaqshı bolsa, onı pitkeriw ushın g'a'rejet jete me dep, aldın ala otırıp, esaplap shıqpay ma?
29 Olay etpese, tiykarın salıp bolıp, qurıp pitkere almay qalsa, bunı ko'rgenler onın' u'stinen ku'lip:
30 «Mına adam qurıwdı baslap, pitkere almadı», – deydi.
31 Qaysı bir patsha basqa patshag'a qarsı urısqa shıg'ajaq bolsa, o'zimnin' on mın' a'skerim menen, kiyatırg'an qarsılasımnın' jigirma mın' a'skerine qarsı tura alaman ba dep, aldın ala otırıp oylanıp almay ma?
32 Ku'shi jetpeytug'ın bolsa, sol patsha ele uzaqta bolg'anda og'an elshi jiberip, tınıshlıq pitimin jasawdı soraydı.
33 Solay etip, sizlerdin' ha'r birin'iz o'zine tiyisli ha'mme zattan waz keshpese, Menin' sha'kirtim bola almaydı.
34 Duz – jaqsı na'rse. Biraq duz o'z ku'shin joytsa, onı qalay ja'ne shorlı qılıwg'a boladı?
35 Ol jerge de, qıy bolıwg'a da jaramag'anlıqtan, sırtqa ılaqtırıp taslanadı. Qulag'ı bar jaqsılap esitip alsın!
