Luka 15 bob
1 İysanı tın'law ushın ko'p salıqshılar menen gu'nakarlar Onın' qasına jaqınlap kelgen edi.
2 Pariseyler menen diniy mug'allimler bunı ko'rip: – Ol gu'nakarlardı qabıl etip, olar menen birge awqat jeydi, – dep narazılıq bildirdi.
3 Sonda İysa olarg'a mına tımsaldı aytıp berdi:
4 – Aytayıq, aran'ızdag'ı birin'izdin' ju'z qoyı bolıp, birewin joytıp alsa, ol toqsan tog'ızın sho'l dalada qaldırıp, joytılg'an bir qoyın tappag'ansha izlep ju'rmes pe edi?
5 Tawıp alg'annan son' quwanıp ketip, onı iynine ko'terip aladı da,
6 u'yine kelip, dosları menen qon'sıların shaqırıp, olarg'a: «Menin' menen birge quwanın'lar, joytılg'an qoyımdı tawıp aldım», – deydi.
7 Sizlerge aytatug'ınım: sol sıyaqlı, ta'wbe etiwge ha'jeti joq toqsan tog'ız haq adamnan go're, ta'wbe etken bir gu'nakarg'a aspanda ko'birek quwanadı.
8 – Aytayıq, bir hayaldın' on gu'mis ten'gesi bolıp, birewin joytıp alsa, ol shıra jag'ıp, u'ydi sıpırıp, tappag'ansha muqıyatlap izlemes pe edi?
9 Tawıp alg'annan son', qurdasları menen qon'sıların shaqırıp: «Menin' menen birge quwanın'lar, joytılg'an ten'gemdi tawıp aldım», – deydi.
10 Sizlerge aytatug'ınım: Qudaydın' perishteleri de ta'wbe etken bir gu'nakar ushın usılay quwanadı.
11 İysa ja'ne bılay dedi: – Bir adamnın' eki ulı bar eken.
12 Olardın' genjetayı a'kesine: – A'ke, mal-mu'lkin'nin' mag'an tiyisli bo'legin ber, – depti. Sonda a'kesi mal-mu'lkin eki ulına bo'lip beripti.
13 Bir neshe ku'n o'tkennen son', kishi ul barı-jog'ın jıynap alıp, uzaq elge ketip qalıptı. Ol jerde buzıq jolg'a tu'sip, mal-mu'lkin jo'nsiz sarp etipti.
14 Jigit ha'mmesin sarp etip bolg'annan son', sol elde awır asharshılıq bolıp, ol joqshılıqqa ushıraptı.
15 Ol barıp, sol eldin' bir turg'ınına jallanıptı. Al ol adam jigitti dalasındag'ı shoshqalardı bag'ıwg'a jiberipti.
16 Jigit shoshqalar jeytug'ın jem menen qarnın toydırıwg'a da zar bolıptı. Biraq og'an hesh kim hesh na'rse bermepti.
17 Onın' aqılı enip: – A'kemnin' qanshama jallang'an jumısshıları nang'a toyıp ju'r, al men bul jerde ashtan o'leyin dep atırman.
18 Turıp a'keme barayın, og'an: «A'ke, men Qudayg'a ha'm sag'an qarsı gu'na isledim.
19 Endi senin' balan' dep atalıwg'a ılayıqlı emespen. Meni jallang'an jumısshıların'nın' qatarına qabıl et», – dep aytayın, – depti.
20 Solay etip, jigit a'kesine qaray jolg'a shıg'ıptı. Ol ele uzaqta kiyatırg'anda, a'kesi ulın ko'rip, bawırı eljirep ketipti. Juwırıp barıp, ulın qushaqlap su'ye baslaptı.
21 Ulı og'an: – A'ke, men Qudayg'a ha'm sag'an qarsı gu'na isledim. Endi senin' ulın' dep atalıwg'a ılayıqlı emespen, – depti.
22 Biraq a'kesi xızmetshilerine: – Tez bolın'lar, en' jaqsı kiyim a'kelip, og'an kiygizin'ler. Qolına ju'zik tag'ıp, ayag'ına ayaq kiyim berin'ler.
23 Bag'ıp semirtilgen baspaqtı a'kelip soyın'lar, iship-jep, kewil ko'tereyik.
24 Sebebi menin' bul ulım o'lgen edi – tirildi, joytılg'an edi – tabıldı, – depti. Solay etip, olar toylay baslaptı.
25 Sol waqıtta u'lken ulı atızda edi. Qaytıp kiyatırıp u'yine jaqınlag'anda, nama ha'm oyın-ku'lki seslerin esitipti.
26 Xızmetshilerinin' birewin shaqırıp alıp: – Bul ne? – dep soraptı.
27 Xızmetshi og'an: – İnin'iz qaytıp keldi, a'ken'iz onın' aman-saw qaytıp kelgeni ushın semirtilgen baspaqtı soydı, – dep juwap beripti.
28 U'lken ulı ashıwlanıp, u'yge kirgisi kelmepti. Sonda a'kesi sırtqa shıg'ıp, onnan ishke kiriwdi o'tinipti.
29 Biraq ol a'kesine bılay depti: – Mine, men sag'an neshe jıldan beri xızmet etip kiyatırman, hesh qashan senin' buyrıg'ın'a qarsı shıqqan emespen. Biraq doslarım menen waqtı xoshlıq etiwim ushın, sen mag'an bir ılaq ta bergen joqsan'.
30 Al endi bolsa, mal-mu'lkin'di buzıq hayallarg'a sarp etip kelgen mına ulın'a semirtilgen baspaqtı soyıpsan'.
31 A'kesi og'an: – Ulım! Sen ha'mme waqıt menin' menen birgesen'. Menin' barlıq malmu'lkim seniki-g'o.
32 Biraq bu'gin quwanıp, kewil ko'teriwimiz kerek. O'ytkeni senin' bul inin' o'lgen edi – tirildi, joytılg'an edi – tabıldı, – depti.
