Luka 17 bob
1 İysa O'z sha'kirtlerine ja'ne bılay dedi: – Adamlardı gu'nag'a azg'ırıwshı na'rselerdin' bolıwı so'zsiz. Biraq olar kim arqalı kelse, sol adam ha'siret shegedi!
2 Ol adamnın' mına kishkenelerdin' birewin azg'ırg'anınan go're, moynına digirman tası baylanıp, ten'izge taslang'anı og'an jaqsıraq bolar edi.
3 Abaylı bolın'lar! Eger tuwısqanın' sag'an qarsı gu'na islese, og'an eskertiw jasa. Eger gu'nasın moyınlasa, onı keshir.
4 Eger ol sag'an qarsı bir ku'nnin' ishinde jeti ret gu'na islese, jeti ret te sag'an kelip: «Gu'namdı moyınlayman» dese, onı keshir.
5 Sonda elshiler İyemiz İysag'a: – İsenimimizdi arttır, – dedi.
6 İyemiz bılay dedi: – Eger isenimin'iz qıshqıl tuqımday g'ana bolsa da, bul tut ag'ashına: «Tamırın' menen qoparılıp, ten'izge otırg'ızıl», – desen'ler, ol so'zin'izdi tın'laydı.
7 Aran'ızda qaysı birin'izdin' jer aydap yamasa mal bag'ıp ju'rgen xızmetshisi daladan qaytqanda, og'an: «Tez kelip, dasturxang'a otır», – deydi?
8 Kerisinshe, og'an: «Menin' keshki awqatımdı tayarla, belin'di buwıp, iship-jep bolg'anımsha, mag'an xızmet et. Son'ınan o'zin' iship jeysen'», – dep aytpay ma?
9 Buyırg'anın orınlag'anı ushın xızmetshisine minnetdarshılıq bildirer me eken?
10 Sol sıyaqlı sizler de o'zlerin'izge buyırılg'annın' ha'mmesin orınlag'annan son': «Bizler arzımaytug'ın qullarmız, tek wazıypamızdı g'ana orınladıq», – den'ler.
11 İysa Erusalimge baratırıp, Samariya ha'm Galila u'lkeleri arasındag'ı shegara jerler arqalı ju'rdi.
12 Ol bir awılg'a kirip kiyatırg'anda maqaw kesel bolg'an on adam gezlesti. Olar uzaqta turıp,
13 qattı dawıslap: – Ustazımız İysa, bizlerge rehim et! – dedi.
14 İysa olardı ko'rip: – Barıp, o'zlerin'izdi ruwxaniylerge ko'rsetin'ler, – dedi. Olar ketip baratırg'anda maqaw keselden jazılıp ketti
15 Olardın' ishindegi birewi o'zinin' shıpa tapqanın ko'rip, ba'lent dawıs penen Qudaydı alg'ıslap, qaytıp keldi de,
16 İysanın' ayag'ına jıg'ılıp, Og'an minnetdarshılıq bildirdi. Bul adam samariyalı edi.
17 Sonda İysa: – Shıpa tapqan on adam emes pe edi? Qalg'an tog'ızı qayaqta?
18 Qudayg'a alg'ıs aytıw ushın, mına shet elliden basqa hesh kim qaytıp kelmedi me? – dedi.
19 Son' og'an: – Ornın'nan tur da, kete ber, isenimin' seni qutqardı, – dedi.
20 Pariseyler Quday Patshalıg'ının' qashan keletug'ının sorag'anda, İysa olarg'a bılay dep juwap berdi: – Quday Patshalıg'ı ko'zge ko'rinip kelmeydi.
21 «Mine, bul jerde» yamasa «A'ne, ana jerde» dep te aytpaydı. Sebebi Quday Patshalıg'ı sizlerdin' ishin'izde, – dedi.
22 Son' İysa sha'kirtlerine bılay dedi: – Adam Ulının' ku'nlerinin' birin bolsa da ko'riwdi an'saytug'ın waqıtların'ız keledi. Biraq, ko're almaysızlar.
23 Sizlerge: «A'ne, Ol ana jerde» yamasa «Mine, Ol bul jerde» dese, barman'lar, olardın' izlerine ermen'ler.
24 O'ytkeni shaqmaq shag'ıp, aspandı bir shetinen ekinshi shetine deyin jarqıratıp jibergendey, Adam Ulı da O'z ku'ninde solay payda boladı.
25 Biraq da'slep Ol ko'p azap shegip, bul a'wlad ta'repinen qabıllanbawı tiyis.
26 Nuxtın' zamanında qalay bolg'an bolsa, Adam Ulının' ku'nlerinde de solay boladı.
27 Nux kemege mingen ku'nge deyin adamlar iship jedi, u'ylendi, turmısqa shıqtı. Son'ınan suw tasqını basıp, ha'mmeni nabıt qıldı.
28 Luttın' zamanında da sonday boldı: adamlar iship jedi, sawdasatıq isledi, egin ekti, jay saldı.
29 Biraq, Lut Sodom qalasınan shıqqan ku'ni aspannan ot ha'm ku'kirt jawıp, ha'mmeni nabıt qıldı.
30 Adam Ulı payda bolatug'ın ku'ni de tap sonday boladı.
31 Sol ku'ni tamnın' to'besinde bolg'an adamnın' zatları u'yinde qalsa, olardı alayın dep to'menge tu'spesin. Kim de kim atızda bolsa, u'yine qaytpasın
32 Luttın' hayalın eske tu'sirin'ler!
33 Kim de kim o'z janın saqlamaqshı bolsa, ol onı nabıt qıladı, al kim de kim o'z janın nabıt qılsa, ol onı saqlaydı.
34 Sizlerge aytatug'ınım: sol tu'ni bir to'sekte jatırg'an eki adamnın' birewi alınadı, ekinshisi qaldırıladı.
35 Birge digirman tartqan eki,
36 hayaldın' birewi alınadı, ekinshisi qaldırıladı.
37 Sonda sha'kirtleri İysadan: – İyem, bul waqıyalar qay jerde boladı, – dep soradı. İysa olarg'a: – O'lik qay jerde bolsa, quzg'ınlar da sol jerge jıynaladı, – dedi.
