Luka 21 bob
1 İysa na'zer salıp, İbadatxananın' sadaqa qutısına Qudayg'a arnalg'an sıyların salıp atırg'an baylardı ko'rdi.
2 Ol bir g'a'rip jesir hayaldın' da eki tiyin salg'anın ko'rip:
3 – Sizlerge haqıyqatın aytaman: bul jarlı jesir hayal ha'mmeden ko'p saldı.
4 O'ytkeni bulardın' ha'mmesi o'z baylıqlarınan awısqanın saldı. Al bul hayal jarlı bolsa da, ku'n ko'risine kerekli barlıq aqshasın saldı, – dedi.
5 Geybirewler İbadatxananın' sulıw taslar ha'm Qudayg'a arnalg'an sıylar menen bezetilgenin aytıp turg'anda, İysa:
6 – Sizler usı jerde ko'rip turg'anların'ızdan tas u'stinde tas qalmay, ha'mmesi qıyratılatug'ın ku'nler keledi, – dedi.
7 Olar İysadan: – Ustaz, bular qashan boladı? Bulardın' bolatug'ının aldın ala qanday belgi bildiredi? – dep soradı.
8 İysa olarg'a: – Aldanıwdan saq bolın'lar! Sebebi ko'pler Menin' atım menen kelip: «Men – Masixpan» yamasa «Waqıt jaqın» deydi. Olardın' izlerine ermen'ler.
9 Urıslar ha'm ko'terilisler haqqında esitkenin'izde, qorqpan'lar. O'ytkeni da'slep usılar bolıwı tiyis. Biraq aqırı da'rhal kelmeydi, – dedi.
10 Son'ınan İysa olarg'a bılay dedi: – Millet milletke qarsı, patshalıq patshalıqqa qarsı ko'teriledi.
11 Ku'shli jer silkiniwler, ko'p jerlerde asharshılıqlar ha'm qırg'ınlar boladı. Aspannan qorqınıshlı qubılıslar ha'm ullı ka'ramatlı belgiler ju'z beredi.
12 Biraq bulardın' ha'mmesinen burın adamlar sizlerdi uslap alıp quwg'ın qıladı, ma'jilisxanalarg'a tapsırıp, qamaqqa saladı. Menin' atım ushın sizlerdi patshalar menen ha'kimlerdin' aldına alıp baradı.
13 Sonda sizlerge Men tuwralı gu'walıq beriwge mu'mkinshilik tuwıladı.
14 Sonlıqtan o'zlerin'izdi qalay qorg'awdı aldın ala oylamawdı kewillerin'izge tu'yip alın'lar.
15 Sebebi Men sizlerge sonday sheshenlik penen danalıq beremen, sizlerge qarsı shıqqanlardın' hesh qaysısı da qarsı so'yley de, so'zlerin'izdi biykarlay da almay qaladı.
16 Ha'tte, ata-ana, ag'a-ini, ag'ayin-tuwg'an ha'm dosların'ız da sizlerge satqınlıq isleydi. Al geybirewlerin'izdi o'ltiredi.
17 Menin' atım sebepli, sizlerdi ha'mme jek ko'redi.
18 Biraq basların'ızdag'ı bir tal shash ta nabıt bolmaydı.
19 Sabırlıq penen o'z janın'ızdı qutqarasızlar.
20 – Erusalimdi a'skerlerdin' qorshap alg'anın ko'rgenin'izde, onın' wayran bolatug'ın waqtının' jaqınlag'anın bilin'ler.
21 Sonda Yahudiyadag'ılar tawlarg'a qashsın. Qalanın' ishindegiler tez sırtqa shıqsın, a'tiraptag'ılar qalag'a kirmesin.
22 O'ytkeni sol ku'nler Muxaddes Jazıwda aytılg'anlardın' ha'mmesi orınlanatug'ın jaza ku'nleri boladı.
23 Sol ku'nleri ju'kli ha'm emiziwli hayallarg'a qanday qıyın boladı! Sebebi jer ju'zinde u'lken apatshılıq bolıp, bul xalıq Qudaydın' g'a'zebine ushıraydı.
24 Olar qılısh ju'zinen o'tkerilip, barlıq ellerge tutqın etilip alıp ketiledi. Basqa milletlerdin' da'wranı tamam bolmag'ansha, Erusalim olar ta'repinen ayaq astı qılınadı.
25 – Quyash, ay ha'm juldızlarda ka'ramatlı belgiler payda boladı. Jer ju'zinde xalıqlar ten'izdin' shuwlap tolqınlang'anınan u'mitsizlikke tu'sip albıraydı.
26 Adamlar du'nyag'a kiyatırg'an apatshılıqtı ku'tip, qorqıwdan ha'lsizlenedi. O'ytkeni aspan ku'shleri silkinedi.
27 Sonda adamlar Adam Ulının' ullı qu'diret ha'm saltanat penen bultta kiyatırg'anın ko'redi.
28 Bul waqıyalar bola baslag'anda turıp, basların'ızdı ko'terin'ler. Sebebi qutqarılıwın'ız jaqın.
29 İysa olarg'a mına tımsaldı aytıp berdi: – A'njir ag'ashına ha'm basqa barlıq tereklerge qaran'lar.
30 Olardın' japıraq shıg'ara baslag'anın ko'rgenin'izde, jazdın' jaqınlag'anın o'zlerin'iz bilesizler.
31 Sol sıyaqlı, sizler bul waqıyalardın' bolıp atırg'anın ko'rgenin'izde, Quday Patshalıg'ının' jaqın ekenin bilin'ler.
32 Sizlerge shının aytıp turman: bul a'wlad joq bolıp ketpesinen burın bulardın' ha'mmesi boladı.
33 Aspan ha'm jer joyıladı, biraq Menin' so'zlerim hesh joyılmaydı.
34 Saq bolın'lar! Shag'al ma'slik qılıp, ma's bolıp, turmıs ta'shiwishleri astında ju'reklerin'izdi awır ju'k baspasın. Ja'ne sol ku'n sizlerge tor sıyaqlı tosattan tu'spesin.
35 O'ytkeni sol ku'n pu'tkil jer ju'zinde jasawshılardın' basına tu'sedi.
36 Sol sebepten bolajaq bul islerden qutılıp, Adam Ulı aldında tura alıw ushın ha'mme waqıt sergek bolıp, duwa etin'ler.
37 İysa ku'ndiz İbadatxanada ta'lim berip, al tu'nlerin bolsa qaladan shıg'ıp, Za'ytu'n tawında o'tkizetug'ın edi.
38 Tan' atıwdan pu'tkil xalıq İysanı tın'law ushın İbadatxanag'a keletug'ın edi.
