Luka 24 bob
1 Ha'ptenin' birinshi ku'ni, yag'nıy ekshembi ku'ni tan' sa'ha'rde hayallar tayarlap qoyg'an xosh iyisli mayların alıp, qa'birge keldi.
2 Olar qa'birdin' awzındag'ı tastın' domalatıp alıp taslang'anın ko'rdi.
3 Biraq ishke kirgende, İyemiz İysanın' denesin taba almadı.
4 Olar bug'an tan' qalısıp turg'anda, tosattan jarqırag'an kiyim kiygen eki adam payda boldı.
5 Hayallardın' hu'reyleri ushıp, basların jerge iygende, eki adam olarg'a bılay dedi: – Tirini o'lilerdin' arasınan nege izleysizler?
6 Ol bul jerde joq, Ol qayta tirildi! Galilada bolg'anında, Onın' sizlerge ne aytqanın eslerin'izge tu'sirin'ler.
7 Ol sizlerge: «Adam Ulı gu'nakar adamlardın' qolına uslap beriledi, atanaq ag'ashqa shegelenedi ha'm u'shinshi ku'ni qayta tiriledi», – degen edi-g'o.
8 Sonda olar İysanın' so'zlerin eslerine tu'sirdi.
9 Qa'birden qaytıp barg'an hayallar bulardın' ha'mmesin on bir elshige ha'm basqa barlıq adamlarg'a xabarladı.
10 Bul xabardı elshilerge jetkizgenler magdalalı Ma'riyam, Yuxanna, Yaqıptın' anası Ma'riyam ha'm olar menen birge ju'rgen basqa hayallar edi.
11 Biraq bul so'zler elshilerge bos ga'p bolıp ko'rinip, olar hayallarg'a isenbedi.
12 Al Petr ornınan turıp, qa'bir ta'repke qaray juwırıp ketti. Ol ishke en'keyip qarag'anda, tek jatırg'an kepinlikti g'ana ko'rdi. Bolg'an waqıyag'a tan' qalıp, izine qayttı.
13 Tap sol ku'ni sha'kirtlerdin' ekewi Erusalimnen on eki shaqırımday qashıqlıqtag'ı Emmaus dep atalatug'ın bir awılg'a baratırıp,
14 bolg'an usı waqıyalar haqqında o'z ara so'ylesti.
15 Olar o'z ara so'ylesip, pikir alısıp baratırg'anda, İysanın' O'zi olarg'a jaqınlap, qatar ju'rdi.
16 Biraq olardın' ko'zleri baylang'anday bolıp, Onı tanımadı.
17 İysa olardan: – Sizler o'z ara neler haqqında so'ylesip baratırsızlar? – dep soradı. Olar qapalı pishinde toqtap qaldı.
18 Arasındag'ı Kleopa atlı birewi Og'an: – Erusalimde bolsan' da, usı ku'nlerde sol jerde ju'z bergen waqıyalardan hesh xabarı joq, jalg'ız Sen shıg'arsan', – dedi.
19 İysa olardan: – Qanday waqıyalardan? – dep soradı. Olar juwap berip: – Nasıralı İysa haqqında waqıyalar da. Ol Qudaydın' ha'm pu'tkil xalıqtın' aldında isinde de, so'zinde de qu'diretli bolg'an payg'ambar edi.
20 Bas ruwxaniylerimiz benen basshılarımız Onı o'lim jazasına ha'm atanaq ag'ashqa shegelewge tapsırdı.
21 Al bizler Onı İzraildı qutqaradı dep, u'mit etken edik. Mine, bul waqıyalardın' bolg'anına bu'gin u'sh ku'n boldı.
22 Bunın' u'stine, aramızdag'ı hayallardın' geybirewleri bizlerdi tan' qaldırdı. Olar erte tan'da qa'birge barıp,
23 Onın' denesin tappay keldi. Qaytıp kelip, İysanın' tiri ekenin bildirgen perishtelerdi ko'rgenin aytıp berdi.
24 Ja'ne bizlerdin' ishimizdegi ayırımlar qa'birge barıp, anıq hayallardın' aytqanınday ekenin ko'ripti. Biraq İysanın' O'zin ko'rmepti, – desti.
25 İysa olarg'a bılay dedi: – Ha'y, aqılsızlar! Payg'ambarlardın' aytqanlarının' ha'mmesine shın ju'rekten isenbeytug'ınlar!
26 Masix usı azaplardı shegip, O'z saltanatına kiriwi kerek emes pe edi?
27 Son'ınan Muwsanın' ha'm barlıq payg'ambarlardın' Jazıwlarınan baslap, Muxaddes Jazıwlardın' ha'mmesinde O'zi haqqında aytılg'anlardı olarg'a tu'sindirip berdi.
28 Olar o'zleri baratırg'an awılg'a jaqınlag'anda, İysa O'zin jolın dawam etetug'ın qılıp ko'rsetti.
29 Biraq olar: – Bizler menen birge qal, ku'n batıwg'a shamalasıp, kesh bolajaq, – dep Onnan o'tindi. Solay etip, İysa olar menen birge qalıw ushın awılg'a kirdi.
30 Olar menen dasturxan basında otırg'anda İysa nandı alıp, Qudayg'a shu'kirlik etti ha'm sındırıp, olarg'a berdi.
31 Sonda g'ana olardın' ko'zleri ashılıp, Onı tanıdı. Biraq İysa ko'zden g'ayıp boldı.
32 Olar bir-birine: – Ol jolda bizler menen so'ylesip, Muxaddes Jazıwlardı tu'sindirgende, ju'reklerimiz quwanıshqa tolmag'an ba edi? – dedi.
33 Da'rriw orınlarınan turıp, Erusalimge qaytıp keldi. On bir elshini ha'm olar menen birge jıynalg'anlardı taptı.
34 Jıynalg'anlar: – İyemiz haqıyqattan qayta tirilip, Simong'a ko'rinipti, – desti.
35 Sonda eki sha'kirt te joldag'ı waqıyalardı ha'm İysa nandı sındırg'anda, Onı qalay tanıp qalg'anın aytıp berdi.
36 Olar usını aytısıp turg'anda, İysanın' O'zi olardın' ortasında payda bolıp: – Tınıshlıq sizlerge yar bolsın! – dedi.
37 Biraq sha'kirtler a'rwaq ko'rip turmız dep oylap, tan' qalısıp, qattı qorqıstı.
38 İysa olarg'a: – Nege hayran qalıp tursızlar? Nege kewillerin'izge bunday gu'manlı oylar keledi?
39 Menin' qollarıma ha'm ayaqlarıma qaran'lar. Bul Menin' O'zimmen. Mag'an qol tiygizip ko'rin'ler. A'rwaqta et penen su'yek bolmaydı, biraq ko'rip turg'anın'ızday, Mende bar, – dedi.
40 Usını aytıp, olarg'a qolların ha'm ayaqların ko'rsetti.
41 Al sha'kirtleri quwanısıp ha'm an'-tan' bolısıp, ele isenbey turg'anda, İysa olardan: – Bul jerde jeytug'ın bir na'rsen'iz bar ma? – dep soradı.
42 Olar Og'an pisirilgen balıqtın' bir bo'legin berdi.
43 İysa onı alıp, olardın' ko'z aldında jedi.
44 Sonda İysa olarg'a bılay dedi: – Sizler menen birge bolg'anımda, Men tuwralı Muwsanın' Nızamında, payg'ambarlardın' Jazıwlarında ha'm Zaburda jazılg'anlardın' ha'mmesi orınlanıwı tiyis, dep aytqan edim.
45 Keyin Muxaddes Jazıwlardı tu'siniw ushın olardın' zeyinlerin ashtı
46 ha'm olarg'a ja'ne: – Bılay dep jazılg'an: «Masix azap shegip, u'shinshi ku'ni o'limnen qayta tiriledi.
47 Erusalimnen baslap, ha'mme xalıqlarg'a Onın' atı menen gu'nalarının' keshiriliwi ushın, ta'wbege shaqırıwdı ja'riyalaw tiyis».
48 Al sizler bulardın' gu'wasısızlar.
49 Mine, Men A'kemnin' wa'de etkenin sizlerge jiberemen. Biraq sizler joqarıdan bul qu'diretti alg'ang'a deyin usı qalada qalın'lar, – dedi.
50 Son'ınan İysa sha'kirtlerin qaladan sırtqa, Betaniyag'a deyin apardı. Qolların ko'terip, olarg'a pa'tiyasın berdi.
51 Pa'tiyasın berip turg'anda olardan uzaqlasıp, aspang'a alındı.
52 Sha'kirtler İysag'a tabınıp, u'lken quwanısh penen Erusalimge qaytıp keldi.
53 Qudaydı alg'ıslap, ha'mme waqıt İbadatxanada boldı.
