Luka 7 bob
1 İysa O'zin tın'lap turg'an xalıqqa ha'mme so'zin aytıp bolg'annan son', Kaparnahumg'a ketti.
2 Sol jerde bir rimli ju'zbasının' qa'dirleytug'ın xızmetshisi awırıp, o'lim to'seginde jatırg'an edi.
3 Ju'zbası İysa tuwralı esitip, Ol kelip, xızmetshime shıpa bermes pe eken dep, o'tinish etiw ushın, Og'an yahudiylerdin' aqsaqalların jiberdi.
4 Olar İysanın' qasına keldi de, qattı o'tinish etip: – Ol Senin' ja'rdem beriwin'e mina'sip.
5 Sebebi ol xalqımızdı jaqsı ko'redi, bizlerge ma'jilisxana da salıp berdi, – dedi.
6 İysa olar menen birge ketti. Ol u'yge jaqınlap qalg'anda, ju'zbası Og'an dosların jiberip, bılay dep aytqızdı: – A'were bolmay-aq qoy, İyem! Senin' shan'arag'ıma keliwin'e men ılayıqlı emespen.
7 Sonlıqtan o'zimnin' Sag'an barıwımdı da mina'sip ko'rmedim. Tek bir so'z aytsan' boldı, xızmetshim jazılıp ketedi.
8 O'ytkeni men de birewdin' qol astındag'ı adamman, o'zime bag'ınıshlı a'skerlerim de bar. Olardın' birewine: «bar» desem, baradı, ekinshisine «kel» desem, keledi. Qulıma: «mınanı isle» desem, isleydi.
9 Bul so'zlerdi esitken İysa tan' qaldı ha'm izine erip kiyatırg'an xalıqqa burılıp: – Sizlerge aytatug'ınım: Men bunday isenimdi İzrailda da ushıratpag'an edim, – dedi.
10 Jiberilgenler u'yge qaytıp kelgende, awırıw xızmetshinin' jazılıp ketkenin ko'rdi.
11 Aradan ko'p o'tpey, İysa Nain degen qalag'a keldi. Onın' menen sha'kirtleri ha'm ko'p xalıq birge ju'rdi.
12 İysa qala da'rwazasına jaqınlag'anda, bir jesir hayaldın' jalg'ız balasının' o'ligin ko'terip shıg'arıp atır edi. Qalanın' ko'p adamları hayal menen birge ju'rip kiyatır edi.
13 İyemiz hayaldı ko'rgende janı ashıp: – Jılama! – dedi.
14 İysa jaqınlap kelip, tabıtqa qolın tiygizgende, tabıt ko'terip kiyatırg'anlar toqtap qaldı. Ol: – Ha'y jas jigit, sag'an aytaman: ornın'nan tur! – dedi.
15 O'li tikeyip otırdı da, so'yley basladı. İysa onı anasına tapsırdı.
16 Ha'mmeni qorqınısh biylep: – Aramızda ullı payg'ambar payda boldı. Quday O'z xalqına ja'rdemge keldi, – dep Qudayg'a alg'ıs ayttı.
17 İysa tuwralı bul xabar pu'tkil Yahudiya u'lkesine ha'm do'gerektegi jerlerge jayıldı.
18 Sha'kirtleri Yaqıyag'a bolıp o'tken waqıyalar haqqında xabarladı.
19 Yaqıya sha'kirtlerinin' ekewin shaqırıp alıp: «Keletug'ın Qutqarıwshı Senbisen' yamasa basqa birewdi ku'tiwimiz kerek pe?» – dep soraw ushın, olardı İyemizge jiberdi.
20 Olar İysag'a kelip: – Shomıldırıwshı Yaqıya bizlerdi: «Keletug'ın Qutqarıwshı Sen be yamasa basqasın ku'teyik pe?» – dep soraw ushın, Sag'an jiberdi, – dedi.
21 Sol waqıtta İysa awırıw menen kesellerge ha'm jawız ruwxlarg'a shalıng'an ko'plegen adamlarg'a shıpa berip, ko'p soqırlardın' ko'zin ashqan edi.
22 2 İysa olarg'a juwap berip: – Barın'lar, esitip-ko'rgenlerin'izdi Yaqıyag'a bildirin'ler. Soqırlardın' ko'rip, aqsaq bolg'anlardın' ju'rip, maqaw kesel bolg'anlardın' tazalanıp, geren'lerdin' esitip, o'lgenlerdin' tirilip, Xosh Xabardın' jarlılarg'a ja'riyalanıp atırg'anın aytıp berin'ler.
23 Mag'an gu'mansız isengenler baxıtlı! – dedi.
24 Yaqıyanın' jibergen adamları qaytıp ketkennen son', İysa xalıqqa Yaqıya tuwralı bılay dep ayta basladı: – Sizler sho'l dalag'a neni ko'riwge bardın'lar? Samal terbetken qamıstı ma?
25 Neni ko'riwge bardın'lar? Jipek kiyim kiygen bir adamdı ma? Biraq hasıl kiyim kiyip, baylıqta jasaytug'ınlar patsha saraylarında boladıg'o.
26 Solay etip, neni ko'riwge bardın'lar? Payg'ambardı ma? Awa, Menin' sizlerge aytatug'ınım: ol – payg'ambardan da ullı.
27 Bul adam haqqında Muxaddes Jazıwda bılay dep aytılg'an: «Mine, Men Sennen burın O'z xabarshımdı jiberemen, ol Senin' baratug'ın jolın'dı aldın'nan tayarlap qoyadı».
28 Sizlerge aytatug'ınım: hayaldan tuwılg'anlardın' arasında Shomıldırıwshı Yaqıyadan ullı adam joq. Biraq Quday Patshalıg'ındag'ı en' kishkene adam da onnan ullı.
29 Bunı esitken pu'tkil xalıq, ha'tte, salıqshılar da Qudaydın' haqlıg'ın moyınladı. Sebebi olar Yaqıyanın' qolınan shomıldırılg'an edi.
30 Biraq pariseyler menen nızam mug'allimleri Qudaydın' olarg'a arnag'an erkin qabıl almadı. O'ytkeni olar Yaqıyanın' qolınan shomıldırılıwdan bas tartqan edi.
31 İysa ja'ne: – Ha'zirgi a'wladtın' adamların kimge uqsatayın, olar kimlerge megzeydi?
32 Olar bazarda bir-birine qıshqırısıp: «Sizlerge sıbızg'ı sherttik, biraq sizler oynamadın'lar! Sizlerge joqlaw ayttıq, biraq sizler jılamadın'lar!» – dep otırg'an balalarg'a uqsaydı.
33 Sebebi Shomıldırıwshı Yaqıya kelip, nan da jemedi, sharap ta ishpedi. Al sizler onı: «Jin urg'an», – deysizler.
34 Adam Ulı kelip, jep te, iship te ju'r, sizler Onı: «Mine, tamaqsaw ha'm araqxor adam, Ol salıqshılar menen gu'nakarlardın' dostı», – deysizler.
35 Al Qudaydın' danalıg'ı onı qabıl etetug'ınlardın' ha'mmesi arqalı aqlanadı, – dedi.
36 Pariseylerdin' biri İysanı awqatqa mira't etti. İysa pariseydin' u'yine kirip, dasturxan a'tirapına otırdı.
37 Sol qalada jasawshı bir gu'nakar hayal İysanın' pariseydin' u'yinde, dasturxan basında otırg'anın bilip, ishinde a'tir mayı bar ma'rmer ıdıs alıp keldi.
38 Ol artta, İysanın' ayaq betinde turıp jılap, ko'z jasların İysanın' ayaqlarına to'ge basladı ha'm olardı shashları menen su'rtti. Onın' ayaqların su'yip, iyis may menen mayladı.
39 İysanı mira't etken parisey bunı ko'rip, ishinen: – Eger Ol payg'ambar bolsa, Og'an qolın tiygizip turg'an hayaldın' kimligin ha'm onın' qanday hayal ekenin biler edi. Ol – gu'nakar hayal-g'o, – dedi.
40 İysa og'an: – Simon, sag'an aytatug'ın bir awız so'zim bar, – dedi. – Ayta ber, Ustaz! – dedi Simon.
41 İysa og'an: – Bir qarız beriwshinin' eki qarızdarı bar eken: birewinin' bes ju'z, ekinshisinin' eliw dinar qarızı bolıptı.
42 Biraq olardın' to'leytug'ın hesh na'rsesi bolmag'anlıqtan, ol ekewinin' de qarızınan keshipti. Qa'ne, aytshı, olardın' qaysısı onı ko'birek su'yedi? – dedi.
43 Simon: – Menin' oyımsha: qarızı ko'birek keshirilgeni, – dep juwap berdi. – Durıs aytasan', – dedi İysa og'an.
44 Son'ınan hayalg'a burılıp, Simong'a: – Bul hayaldı ko'rip tursan' ba? U'yin'e kelgenimde, sen Mag'an ayaqlarımdı juwatug'ın suw da bermedin'. Al ol ko'z jasları menen ayaqlarımdı juwıp, shashları menen su'rtti.
45 Sen Meni su'ymedin', al ol Men kelgennen beri ayaqlarımdı toqtamastan su'yip atır.
46 Sen basıma may da jaqpadın', al ol ayaqlarıma iyis may jaqtı.
47 Sonlıqtan sag'an aytatug'ınım: onın' ko'p gu'naları keshirildi. Su'yispenshiliginin' ku'shli bolıwının' sebebi – sol. Kim az keshirilse, sol az su'yedi, – dedi.
48 Son'ınan hayalg'a: – Gu'naların' keshirildi, – dedi.
49 Sonda İysa menen birge dasturxan basında otırg'anlar o'z ara: – Gu'nalardı da keshiretug'ın bul kim o'zi? – desti.
50 Al İysa hayalg'a: – İsenimin' seni qutqardı, tınıshlıq penen bara ber, – dedi.
