Yuxan 15 bob
1 – Men – haqıyqıy ju'zim ag'ashıman, al A'kem bag'man.
2 Mendegi jemis bermeytug'ın ha'r bir shaqanı Ol kesip taslaydı. Jemis beretug'ın ha'r bir shaqanı ja'ne de ko'birek jemis bersin dep, putap tazalaydı.
3 Menin' sizlerge aytqan so'zlerim arqalı sizler a'lle qashan tazasızlar.
4 Mende bolın'lar, Men de sizlerde bolaman. Ag'ashta bolmag'an shaqa o'z-o'zinen jemis bere almag'anı sıyaqlı, sizler de Mende bolmasan'lar, jemis bere almaysızlar.
5 Men – ju'zim ag'ashıman, sizler – shaqalarsız. Kim Mende bolıp, Men onda bolsam, ol ko'p jemis beredi. Sebebi Mensiz hesh na'rse isley almaysızlar.
6 Kim de kim Mende bolmasa, shaqa sıyaqlı sırtqa taslanıp, quwrap qaladı. Bunday shaqalar jıynalıp, otqa taslanıp jandırıladı.
7 Eger sizler Mende bolıp, Menin' so'zlerim sizlerde bolsa, qa'legenin'izdi soran'lar, sizlerge beriledi.
8 Sizler ko'p jemis bersen'ler, A'kem ullılanadı. Sonda Menin' sha'kirtlerim bolasızlar.
9 A'kenin' Meni su'ygeni sıyaqlı, Men de sizlerdi su'ydim. Menin' su'yispenshiligime sadıq bolın'lar.
10 Men A'kemnin' buyrıqların orınlap, Onın' su'yispenshiligine sadıq bolg'anımday, sizler de eger Menin' buyrıqlarımdı orınlasan'lar, Menin' su'yispenshiligime sadıq bolasızlar.
11 Bulardı sizlerge Menin' quwanıshım sizlerde bolıwı ushın ha'm quwanıshın'ız tolı bolıwı ushın ayttım.
12 Menin' buyrıg'ım bul: Men sizlerdi qalay su'ygen bolsam, sizler de bir-birin'izdi solay su'yin'ler.
13 Dosları ushın o'z janın bergen adamnın' su'yispenshiliginen artıq su'yispenshilik joq.
14 Eger sizler buyırg'anlarımdı orınlasan'lar, Menin' doslarım bolasızlar.
15 Bunnan bılay, sizlerdi «qul» dep atamayman. O'ytkeni qul xojayınının' ne isleytug'ının bilmeydi. Sizlerdi «doslarım» dep atayman. Sebebi A'kemnen esitkenlerimnin' ha'mmesin sizlerge bildirdim.
16 Sizler Meni emes, Men sizlerdi tan'ladım. Barıp jemis bersin ha'm jemisi turaqlı bolsın dep, sizlerdi tayınladım. Solay etip, Menin' atım menen A'keden ne sorasan'lar da, Ol sizlerge beredi.
17 Sizlerge buyrıg'ım sol: bir-birin'izdi su'yin'ler!
18 – Eger du'nya sizlerdi jek ko'rse, sizlerden aldın onın' Meni jek ko'rgenin bilin'ler.
19 Sizler bul du'nyaniki bolg'anın'ızda, du'nya o'zine tiyislilerdi su'yer edi. Biraq, sizler bul du'nyaniki emessizler: o'ytkeni Men sizlerdi du'nyadan tan'lap aldım. Sonlıqtan du'nya sizlerdi jek ko'redi.
20 Menin': «Xızmetshi xojasınan ullı emes», – degen so'zlerimdi eslerin'izge tu'sirin'ler. Eger adamlar Meni quwdalasa, sizlerdi de quwdalaydı. Eger Menin' so'zimdi tın'lasa, sizlerdin' so'zlerin'izdi de tın'laydı.
21 Bul islerdin' ha'mmesin sizlerge Menin' atım sebepli isleydi. Sebebi olar Meni Jibergendi bilmeydi.
22 Eger Men kelmegenimde ha'm olarg'a aytpag'anımda, olardın' gu'naları bolmas edi. Biraq endi gu'nalarına keshirim joq.
23 Meni jek ko'rgen adam Menin' A'kemdi de jek ko'rgen boladı.
24 Eger Men olar arasında hesh kim islemegen islerdi islemegenimde, olarda gu'na bolmas edi. Endi bolsa, olar islerimdi ko'rse de, Meni de, A'kemdi de jek ko'rdi.
25 Biraq bul olardın' Muxaddes Nızamındag'ı: «Meni biykarg'a jek ko'rdi», – degen so'zlerdin' orınlanıwı ushın boldı.
26 A'kemnen sizlerge Men jiberetug'ın Jubatıwshı, yag'nıy A'kemnen shıg'atug'ın Haqıyqat Ruwxı kelgende, Ol Men tuwralı gu'walıq beredi.
27 Sizler de gu'walıq beresizler. O'ytkeni a'welden-aq Menin' menen birgesizler.
