Yuxan 6 bob
1 Bunnan son', İysa Galila, yag'nıy Tiberiya ten'izinin' arg'ı jag'asına o'tti.
2 Onın' awırıwlarg'a islegen ka'ramatların* ko'rgenlikten, ko'p xalıq izine erdi.
3 İysa tawg'a shıg'ıp, sha'kirtleri menen birge sol jerde otırdı.
4 Yahudiylerdin' Qutqarılıw bayramı jaqınlap qalg'an edi.
5 İysa basın ko'terip, O'zine qaray ko'p xalıqtın' kiyatırg'anın ko'rip, Filipten: – Bul adamlarg'a jegiziw ushın nandı qayaqtan satıp alamız? – dep soradı.
6 İysa bul ga'pti onı sınaw ushın ayttı. Sebebi Ol ne isleyjaq ekenin O'zi biletug'ın edi.
7 Filip Og'an: – Olardın' ha'r birine az-maz bersek te, eki ju'z dinarlıq nan jetpeydig'o, – dep juwap berdi.
8 Sha'kirtlerinen biri, Simon Petrdin' tuwısqanı Andrey İysag'a:
9 – Bul jerde bir balada bes arpa nanı menen eki balıq bar. Biraq usınshama adam ushın bular ne boladı? – dedi.
10 İysa: – Xalıqtı jerge otırg'ızın'lar, – dedi. Ol jerde sho'p ko'p bolg'anlıqtan, bes mın'g'a shamalas er adam jerge jambasladı.
11 Sonda İysa nanlardı alıp, Qudayg'a shu'kirlik etti de, otırg'anlarg'a u'lestirip berdi. Sol sıyaqlı, olarg'a balıqlardı da qa'legeninshe bo'lip berdi.
12 Ha'mme jep toyg'anda, İysa sha'kirtlerine: – Awısqan bo'leklerin jıynap alın'lar, hesh na'rse zaya bolmasın, – dedi.
13 Solay etip, sha'kirtler adamlar jegen bes arpa nanınan awısqan bo'leklerdi jıynap, u'lken on eki sebet toltırdı.
14 Xalıq İysanın' islegen ka'ramatın ko'rip: – Haqıyqattan da, Bul du'nyag'a keletug'ın payg'ambar eken, – desti.
15 İysa olardın' kelip, O'zin patsha qılıw ushın zorlıq penen uslayjaq ekenin bilgende, ja'ne jalg'ız O'zi tawg'a shıg'ıp ketti.
16 Kesh bolg'anda, İysanın' sha'kirtleri ten'izge bardı.
17 Olar bir qayıqqa minip, ten'izdin' arg'ı jag'asındag'ı Kaparnahumg'a qaray jol aldı. Qaran'g'ı tu'sse de, İysa ele olardın' qasına kelmegen edi.
18 Ku'shli samal esip, ten'iz tolqınlana basladı.
19 Sha'kirtler bes-altı shaqırımday ju'zgennen son', ten'izdin' u'sti menen ju'rip, qayıqqa jaqınlasıp kiyatırg'an İysanı ko'rip, qorqıp qalıstı.
20 Biraq İysa olarg'a: – Bul – Men, qorqpan'lar! – dedi.
21 Sonda olar İysanı qayıqqa mindirmekshi boldı. Qayıq sol waqıtta-aq olar baratırg'an jag'ag'a kelip toqtadı.
22 Erten'ine ten'izdin' arg'ı jag'asında qalg'an xalıq ol jerde tek bir qayıq bolg'anın, İysanın' O'zi sha'kirtleri menen birge bul qayıqqa minbegenin, al tek sha'kirtlerinin' o'zleri ketkenin bildi.
23 Sonda İyemiz shu'kirlik etip bergen nandı xalıq jegen jerdin' jaqınına Tiberiyadan bir neshe qayıqlar keldi.
24 İysanın' da, sha'kirtlerinin' de ol jerde joq ekenin ko'rgen xalıq qayıqlarg'a mindi ha'm İysanı izlep, Kaparnahumg'a ketti.
25 Olar İysanı ten'izdin' arg'ı jag'asınan tawıp, Onnan: – Ustaz, Sen bul jerge qashan keldin'? – dep soradı.
26 İysa olarg'a juwap berip: – Sizlerge shının, haqıyqatın aytaman: sizler Meni ka'ramatlar ko'rgenin'iz ushın emes, al nan jep toyg'anın'ız ushın izlep atırsızlar.
27 Sizler buzılatug'ın azıq ushın emes, al ma'n'gilik o'mirge saqlanatug'ın azıq ushın miynet etin'ler. Onı sizlerge Adam Ulı beredi. O'ytkeni Quday A'ke Og'an O'z mo'rin basıp, biylik berdi, – dedi.
28 Olar İysadan: – Qudayg'a unaytug'ın islerdi islewimiz ushın ne qılıwımız kerek? – dep soradı.
29 – Qudayg'a unaytug'ın is – Onın' Jibergenine iseniw, – dep juwap berdi İysa.
30 Olar İysag'a: – Bizler ko'rip, Sag'an iseniwimiz ushın, qanday ka'ramat ko'rsetejaqsan'? Ne isleyjaqsan'?
31 «Jew ushın olarg'a aspannan nan berdi», – dep jazılg'anday, ata-babalarımız sho'lde manna jegen, – dedi.
32 İysa olarg'a: – Sizlerge shının, haqıyqatın aytaman: sizlerge aspannan nan bergen Muwsa emes, al aspannan haqıyqıy nandı sizlerge berip turg'an – Menin' A'kem.
33 Sebebi Qudaydın' nanı aspannan kelip, du'nyag'a o'mir beredi, – dedi.
34 Xalıq İysag'a: – Mırza, bizlerge bunday nandı ha'mme waqıt berip tur, – dedi.
35 İysa olarg'a bılay dedi: – Men – o'mir nanıman. Mag'an kelgen adam hesh qashan ash bolmaydı ha'm Mag'an isengen adam hesh qashan sho'llemeydi.
36 Biraq Men sizlerge: «Meni ko'rdin'ler, sonda da Mag'an ele isenbey atırsızlar», – dedim-g'o.
37 A'kemnin' Mag'an bergenlerinin' ha'mmesi Mag'an keledi. Mag'an kelgenlerdi hesh qashan quwıp shıg'armayman.
38 O'ytkeni Men O'z erkimdi emes, al Meni Jibergennin' erkin orınlaw ushın aspannan keldim.
39 Onın' Mag'an bergenlerinin' hesh birin joytpawım, al aqırg'ı ku'nde ha'mmesin tiriltiwim – bul Meni Jibergennin' erki.
40 A'kemnin' erki – Onın' Ulın ko'rip, Og'an isengen ha'r bir adamnın' ma'n'gilik o'mirge iye bolıwı. Men onı aqırg'ı ku'ni tiriltemen.
41 Sonda «Men aspannan kelgen nanman», – degeni ushın, yahudiyler İysag'a narazılıq bildire basladı.
42 – Bul – Yusuptın' ulı İysa emes pe? Bizler Onın' ata-anasın tanıymızg'o. Endi qalay Ol: «Aspannan keldim», – dep aytıp otır? – desti olar.
43 İysa olarg'a bılay dep juwap berdi: – O'z ara narazı bolman'lar.
44 Eger Meni Jibergen A'kem alıp kelmese, hesh kim Mag'an kele almaydı, al Mag'an kelgendi aqırg'ı ku'ni tiriltemen.
45 Payg'ambarlardın' Jazıwlarında: «Ha'mmesi Quday ta'repinen u'yretiledi», – dep jazılg'an. A'kemnen esitip, Onnan u'yrengen ha'r bir adam Mag'an keledi.
46 Qudaydan Kelgennen basqa hesh kim A'keni ko'rgen emes, A'keni tek g'ana Ol ko'rgen.
47 Sizlerge shının, haqıyqatın aytaman: isengen adam ma'n'gilik o'mirge iye.
48 Men – o'mir nanıman.
49 Ata-babaların'ız sho'lde manna jese de, o'lip ketti.
50 Bul jerde aspannan kelgen bir nan bar, onı jegen adam o'lmeydi.
51 Men – aspannan kelgen tiri nanman. Eger kim de kim bul nandı jese, ma'n'gi jasaydı. Du'nyag'a o'mir beriw ushın, Men beretug'ın bul nan – O'z denem.
52 Sonda yahudiyler: – Ol qalay bizlerge O'z denesin jewge bere aladı? – dep o'z ara tartısa basladı.
53 İysa olarg'a bılay dedi: – Sizlerge shının, haqıyqatın aytaman: Adam Ulının' denesin jep, qanın ishpesen'ler, sizlerde o'mir bolmaydı.
54 Menin' denemdi jep, qanımdı ishken adamda ma'n'gilik o'mir bar ha'm Men onı aqırg'ı ku'ni tiriltemen.
55 Sebebi Menin' denem – haqıyqıy azıq, qanım – haqıyqıy ishimlik.
56 Denemdi jep, qanımdı ishken adam Mende jasaydı, Men onda jasayman.
57 Meni tiri A'kem jibergendey ha'm Menin' A'kem arqalı jasap atırg'anımday, Menin' denemdi jegen adam da Men arqalı jasaydı.
58 Aspannan tu'sken nan, mine – usı. Bul nan ata-babaların'ız jegen mannag'a uqsamaydı. Olar o'lip ketti, al bul nandı jegen adam ma'n'gi jasaydı.
59 İysa bul so'zlerdi Kaparnahumdag'ı ma'jilisxanada ta'lim bergende ayttı.
60 Sha'kirtlerinin' ko'bisi bunı esitip: – Qanday qıyın so'zler! Bunı kim qabıllay aladı? – dedi.
61 Sha'kirtlerinin' bug'an narazı bolg'anın bilip, İysa bılay dedi: – Bul so'zler iseniwin'izge tosqınlıq qılıp atır ma?
62 Eger Adam Ulının' burın bolg'an jerine ko'terilgenin ko'rsen'iz she?
63 Ruwx o'mir beredi, al dene payda keltirmeydi. Sizlerge aytqan so'zlerim ruwx ha'm o'mir.
64 Biraq aran'ızda isenbeytug'ınlar bar. O'ytkeni İysa kimlerdin' isenbeytug'ının ha'm kimnin' O'zine satqınlıq isleytug'ının burınnan-aq biletug'ın edi
65 İysa ja'ne: – «A'kem jol qoymasa, hesh kim Mag'an kele almaydı», – dep sol sebepli aytqan edim, – dedi.
66 Sol waqıttan baslap, İysanın' sha'kirtlerinin' ko'bisi ketip qalıp, endi Onın' menen ju'rmeytug'ın boldı.
67 Sonda İysa on eki sha'kirtinen: – Sizler de ketpekshimisiz? – dep soradı.
68 Simon Petr juwap berip: – İyem, bizler kimge baramız? Sende ma'n'gilik o'mir so'zleri bar.
69 Bizler isenemiz ha'm bilemiz: Sen – Qudaydın' Muxaddesisen', – dedi
70 İysa olarg'a: – Sizlerdi, on ekini tan'lap alg'an O'zim emes pe? Biraq aran'ızdag'ı birin'iz – shaytan, – dedi.
71 Ol Simon ulı Yahuda İsqariot haqqında aytqan edi. Sebebi Yahuda on ekinin' biri bolsa da, keyin İysag'a satqınlıq isledi.
