Yuxan 7 bob
1 Son'ınan İysa Galila boylap ju'rdi, o'ytkeni yahudiy basshıları Onı o'ltirmekshi bolg'anlıqtan, Ol Yahudiyada ju'riwdi qa'lemedi.
2 Yahudiylerdin' Qos bayramı jaqınlap qalg'an edi.
3 Sonda İysanın' inileri Og'an: – Bul jerden ketip, Yahudiyag'a bar. Senin' islep atırg'an islerin'di sha'kirtlerin' de ko'rsin.
4 Sebebi o'zin ashıq tanıtpaqshı bolg'an adam jasırın is islemeydi. Eger Sen usınday isler islep atırg'an bolsan', O'zin'di du'nyag'a ko'rset, – desti.
5 O'ytkeni Og'an, ha'tte, inileri de isenbeytug'ın edi.
6 İysa olarg'a: – Men ushın ılayıqlı waqıt ele kelmedi. Al sizler ushın ha'r qanday waqıt qolaylı.
7 Du'nya sizlerdi jek ko're almaydı, biraq Meni jek ko'redi. Sebebi Men onın' islerinin' jaman ekenligi haqqında gu'walıq berip ju'rmen.
8 Sizler bayramg'a barın'lar. Men ha'zirshe bul bayramg'a barmayman, o'ytkeni Menin' waqtım ele tolmadı, – dedi.
9 İysa olarg'a usılardı aytıp, Galilada qaldı.
10 Biraq inileri bayramg'a ketkennen son', İysanın' O'zi de bardı. Ashıq tu'rde emes, al jasırın bardı.
11 Yahudiy basshıları İysanı bayramda izlep: «Ol qayaqta?» – dep soradı.
12 Xalıq arasında Ol haqqında ko'p sıbırlı so'zler boldı. Birewler: «Ol jaqsı Adam», – dese, basqalar: «Yaq, Ol xalıqtı joldan azg'ırıp atır», – dedi.
13 Biraq yahudiy basshılarınan qorqqanlıqtan, hesh kim Ol haqqında ashıq so'yley almaytug'ın edi.
14 Bayramnın' yarımı o'tkende İysa İbadatxanag'a kirip, ta'lim bere basladı.
15 Yahudiy basshıları: – Bul Adam hesh oqımag'an bolsa da, usınshama bilimdi qayaqtan alg'an? – dep tan' qalıstı.
16 İysa olarg'a juwap berip bılay dedi: – Menin' ta'liymatım O'zimdiki emes, al Meni Jibergendiki.
17 Kim de kim Qudaydın' erkin orınlag'ısı kelse, bul ta'liymattın' Qudaydan ba yamasa Men O'zligimnen aytıp atırman ba, bilip aladı.
18 O'z atınan so'ylewshi o'zine ullılıq izleydi, al O'zin Jibergennin' ullılıg'ın izlewshi – haqıyqatshıl, Onda jalg'an joq.
19 Muwsa sizlerge Muxaddes Nızamdı bermedi me? Biraq hesh birin'iz de Muxaddes Nızamdı orınlamaysızlar. Meni ne ushın o'ltirmekshisizler?
20 Xalıq: – Seni jin urg'an ba? Kim Seni o'ltirmekshi? – dedi.
21 İysa so'zin dawam etip, olarg'a bılay dedi: – Men bir is isledim, ha'mmen'iz bug'an hayran qalıp atırsızlar.
22 Muwsa sizlerge su'nnetti buyırg'anlıqtan, sizler dem alıs ku'ninde de balanı su'nnet etesizler. Biraq haqıyqatında, su'nnet Muwsadan emes, al baban'ız İbrayımnan qalg'an edi.
23 Muwsanın' Nızamı buzılmasın dep, bala dem alıs ku'ni bolsa da su'nnet qılınadı eken, nege sizler Mag'an dem alıs ku'ni bir adamg'a tolıq shıpa berdin', dep ashıwlanasızlar?
24 Sırtqı ko'riniske qarap hu'kim etpen'ler, al a'dillik penen hu'kim shıg'arın'lar.
25 Sonda ayırım erusalimliler: – O'ltirmekshi bolıp atırg'anı usı Adam emes pe?
26 Mine, Ol ashıq so'ylep tur, al olar Og'an hesh na'rse dep atırg'an joq. Mu'mkin, basshılar Onın' Masix ekenin haqıyqattan da ta'n alg'an shıg'ar?
27 Biraq bizler bul Adamnın' qayaqtan kelgenin bilemiz. Al Masix kelgende, Onın' qayaqtan kelgenin hesh kim bilmeydi, – desti.
28 Sol waqıtta İbadatxanada ta'lim berip turg'an İysa ba'lent dawıs penen bılay dedi: – Sizler Meni ha'm Menin' qayaqtan ekenimdi bilesizler. Men O'z O'zimnen kelgenim joq. Meni Jibergen Haq, sizler Onı bilmeysizler.
29 Biraq Men Onı bilemen, sebebi Men Onnan keldim, Meni Ol jiberdi.
30 Sonda olar İysanı uslawg'a tırıstı, biraq hesh kim Og'an qol tiygizbedi. O'ytkeni Onın' waqtı ele kelmegen edi.
31 Al xalıq arasında ko'p adamlar Og'an isenip: – Masix kelgende, bul Adamnan da ko'birek ka'ramatlar* isler me eken? – dedi.
32 Pariseyler İysa haqqında xalıq arasındag'ı bul so'zlerdi esitti. Sonlıqtan olar ha'm bas ruwxaniyler İysanı uslaw ushın saqshılardı jiberdi.
33 İysa bılay dedi: – Men sizler menen birge az waqıt bolaman, son'ınan Meni Jibergenge qaytıp baraman
34 Meni izleysizler, biraq tappaysızlar. Men bolatug'ın jerge sizler kele almaysızlar.
35 Sonda yahudiy basshıları o'z ara: – Bul Adam bizler taba almaytug'ınday qayaqqa barmaqshı? Ol grekler arasına tarqalıp ketken yahudiylerge barıp, greklerge ta'lim bermekshi me?
36 «Meni izleysizler, biraq tappaysızlar. Men bolatug'ın jerge sizler kele almaysızlar», – degen so'zler neni an'latadı eken? – desti.
37 Bayramnın' son'g'ı, ullı ku'ninde İysa ornınan turıp, ba'lent dawıs penen bılay dedi: – Kim de kim sho'llese, Mag'an kelip ishsin.
38 Muxaddes Jazıwda aytılg'anday, Mag'an isengen adamnın' ishinen tiri suw da'ryası ag'adı.
39 İysa bunday dep, O'zine isenetug'ınlar alatug'ın Muxaddes Ruwx haqqında aytqan edi. Sebebi Ol ele ullılıqqa erispegenlikten, olarg'a Muxaddes Ruwx ele berilmegen edi.
40 Xalıq arasınan ayırımlar bul so'zlerdi esitip: – Bul – haqıyqattan da Payg'ambar, – dedi.
41 Basqaları: «Bul – Masix», – desti. Al geybirewleri: «Yaq, Masix Galiladan keletug'ın ba edi?
42 Muxaddes Jazıwda: „Masix Dawıttın' urpag'ınan bolıp, Dawıttın' ana jurtı Beytlehem awılınan keledi“, – dep jazılg'an emes pe?» – desti.
43 Solay etip, İysa sebepli xalıq arasında bo'liniw payda boldı.
44 Olardın' geybirewleri Onı uslamaqshı boldı, biraq hesh kim Og'an qol tiygizbedi.
45 Saqshılar qaytıp kelgende, bas ruwxaniyler menen pariseyler olardan: – Nege Onı alıp kelmedin'ler? – dep soradı.
46 Saqshılar juwap berip: – Hesh kim hesh qashan bul Adam sıyaqlı so'ylegen emes, – dedi.
47 Pariseyler olarg'a: – Sizler de aldandın'ız ba?
48 Basshılardan yamasa pariseylerden Og'an isengen adam boldı ma, sira'?
49 Biraq, Muxaddes Nızamdı bilmeytug'ın bul xalıq na'let etilgen, – dedi.
50 Olardın' biri, burın İysag'a kelgen Nikodim atlı adam olarg'a:
51 – Nızamımız boyınsha, da'slep adamdı tın'lamay turıp, onın' ne islegenin bilmesten, hu'kim etiwge bola ma? – dedi.
52 Og'an: – Sen de Galiladansan' ba? Muxaddes Jazıwdı jaqsılap oqı, sonda Galiladan payg'ambar shıqpaytug'ının bilesen', – desti olar.
53 Son'ınan ha'mmesi u'ylerine tarqastı.
