Yuxan 8 bob
1 Al İysa Za'ytu'n tawına ketti.
2 Tan' atqanda, Ol ja'ne İbadatxanag'a qaytıp bardı. Pu'tkil xalıq Onın' qasına keldi ha'm İysa otırıp, olarg'a ta'lim bere basladı.
3 Sonda diniy mug'allimler menen pariseyler İysanın' aldına buzıqshılıq islep atırg'anda uslang'an bir hayaldı alıp keldi. Hayaldı ortag'a turg'ızıp:
4 – Ustaz! Bul hayal buzıqshılıq islep atırg'anda uslandı.
5 Muwsa Nızamda bizlerge bunday hayallardı tas penen urıwdı buyırg'an*. Sen ne deysen'? – dedi.
6 Olar bul so'zlerdi İysanı sınap, Onı ayıplaytug'ın bir sıltaw tabıw ushın ayttı. Biraq İysa en'keyip, barmag'ı menen jerge jazıp otıra berdi.
7 Olar sorawların dawam ete bergennen son', İysa tu'rgelip: – Aran'ızda kim gu'nasız bolsa, sol birinshi bolıp hayalg'a tas atsın, – dedi.
8 Son'ınan ja'ne en'keyip, jerge jaza berdi.
9 Olar bul so'zlerdi esitkende, jası u'lkenlerinen baslap, birim-birim kete basladı. Aqırında jalg'ız İysa menen ortada turg'an hayal qaldı.
10 İysa ornınan turıp, hayalg'a: – Hayal! Olar qayaqta? Hesh kim seni ayıplamadı ma? – dedi.
11 – Hesh kim, Mırza! – dep juwap berdi hayal. İysa og'an: – Men de seni ayıplamayman, bar, bunnan bılay gu'na isleme, – dedi.
12 İysa ja'ne xalıqqa bılay dedi: – Men – du'nyanın' nurıman. Kim de kim Mag'an erse, qaran'g'ılıqta ju'rmeydi, al o'mir nurına iye boladı.
13 Sonda pariseyler İysag'a: – Sen O'zin' haqqında O'zin' gu'walıq berip atırsan'. Senin' gu'walıg'ın' haqıyqat emes, – dedi.
14 İysa olarg'a juwap berip bılay dedi: – Men O'zim haqqında O'zim gu'walıq bersem de, gu'walıg'ım haqıyqat. O'ytkeni Men qayaqtan kelgenimdi ha'm qayaqqa ketetug'ınımdı bilemen. Al sizler Menin' qayaqtan kelgenimdi ha'm qayaqqa ketetug'ınımdı bilmeysizler.
15 Sizler adamnın' oy-pikiri menen hu'kim etesizler, al Men hesh kimdi hu'kim etpeymen.
16 Eger Men hu'kim etsem de, Menin' hu'kimim a'dil. Sebebi Men jalg'ız emespen. Men ha'm Meni Jibergen A'kem ekewmiz birge hu'kim etemiz.
17 Sizlerdin' Muxaddes Nızamın'ızda: «Eki adamnın' gu'walıg'ı durıs», – dep jazılg'an-g'o.
18 Men O'zim haqqında O'zim gu'walıq beremen ha'm Meni jibergen A'kem de gu'walıq beredi.
19 Sonda olar İysadan: – Senin' A'ken' qayaqta? – dep soradı. İysa olarg'a: – Sizler Meni de, Menin' A'kemdi de bilmeysizler. Eger Meni bilgenin'izde, A'kemdi de biler edin'ler, – dedi.
20 İysa bul so'zlerdi İbadatxanada ta'lim berip atırıp, sadaqa qutısının' qasında ayttı. Biraq hesh kim Onı uslamadı, o'ytkeni Onın' waqtı ele kelmegen edi.
21 İysa olarg'a ja'ne: – Men ketip baratırman. Sizler Meni izleysizler. Biraq o'z gu'naların'ız benen o'lesizler. Menin' baratug'ın jerime sizler kele almaysızlar, – dedi.
22 Sonda yahudiy basshıları o'z ara: – Ol O'zin O'zi o'ltirejaq pa eken? Nege: «Menin' baratug'ın jerime sizler kele almaysızlar», – dep atır? – desti.
23 İysa olarg'a bılay dedi: – Sizler to'mennensiz, Men joqarıdanman. Sizler bul du'nyadansız, al Men bul du'nyadan emespen.
24 Sonlıqtan Men: «Sizler o'z gu'naların'ız benen o'lesizler», – degen edim. Sebebi Menin' Sol ekenime isenbesen'ler, o'z gu'naların'ız benen o'lesizler.
25 Sonda olar İysadan: – Sen kimsen'? – dep soradı. İysa olarg'a: – Bastan-aq sizlerge kim tuwralı aytqan bolsam, anıq Solman.
26 Sizler tuwralı aytatug'ın ha'm sizlerdi hu'kim etetug'ın ko'p na'rselerim bar. Meni Jibergen haqıyqat ha'm Men Onnan ne esitsem, du'nyag'a sonı so'yleymen, – dedi.
27 Olar İysanın' A'ke haqqında aytıp turg'anın tu'sinbedi.
28 Solay etip, İysa bılay dedi: – Adam Ulın joqarı ko'tergenin'izde, Menin' Sol ekenimdi ha'm O'zligimnen hesh na'rse islemegenimdi, al A'kemnin' Mag'an u'yretkenlerin aytqanımdı bilip alasızlar.
29 Meni Jibergen Menin' menen birge, Ol Meni jalg'ız qaldırmadı. O'ytkeni Men ha'mme waqıt Og'an unaytug'ın islerdi isleymen.
30 İysa bul so'zlerdi aytqanda, Og'an ko'p adamlar isendi.
31 Sol waqıtta İysa O'zine isengen yahudiylerge: – Eger Menin' so'zlerim boyınsha jasasan'lar, haqıyqıy sha'kirtlerim bolasızlar.
32 Sizler haqıyqattı bilip alasızlar, haqıyqat sizlerdi azat qıladı, – dedi.
33 – Bizler – İbrayımnın' urpag'ımız. Hesh qashan hesh kimge qul bolmag'anbız. Nege: «Azat bolasızlar», – dep atırsan'? – dedi olar.
34 İysa olarg'a juwap berip bılay dedi: – Sizlerge shının, haqıyqatın aytaman: gu'na isleytug'ın ha'r bir adam – gu'nanın' qulı.
35 Qul u'yde ma'n'gi qalmaydı, ul ma'n'gi qaladı.
36 Sonlıqtan eger Ul sizlerdi azat qılsa, haqıyqattan azat bolasızlar.
37 Sizlerdin' İbrayımnın' urpag'ı ekenin'izdi bilemen. Biraq Meni o'ltiriwdi qa'leysizler, sebebi Menin' so'zim kewlin'izden jay almaydı.
38 Men A'kemnen ko'rgenimdi aytaman. Al sizler a'ken'izden esitkenin'izdi isleysizler.
39 Olar İysag'a juwap berip: – Bizlerdin' babamız İbrayım-g'o, – desti. İysa olarg'a: – Eger sizler İbrayımnın' urpaqları bolg'anın'ızda, İbrayımnın' islerin isler edin'ler.
40 Biraq endi Meni, Qudaydan esitken haqıyqattı sizlerge aytqan Adamdı o'ltirejaqsızlar. İbrayım bunday isti islemedi.
41 Sizler o'z a'ken'izdin' islerin qılıp atırsızlar, – dedi. – Bizler nekesiz tuwılg'an joqpız. Bizlerdin' bir g'ana A'kemiz bar, Ol – Quday, – dep juwap berdi olar.
42 İysa olarg'a bılay dedi: – Eger Quday sizlerdin' A'ken'iz bolg'anda, Meni su'yer edin'ler. O'ytkeni Men Qudaydan keldim ha'm usı jerdemen. Men O'zligimnen kelgenim joq, Meni Ol jiberdi.
43 Nege aytqanlarıma tu'sinbeysizler? Sebebi Menin' so'zimdi tın'lay almaysızlar.
44 Sizler o'z a'ken'iz shaytannansız, sizler onın' tileklerin orınlawdı qa'leysizler. Ol bastan-aq adam o'ltiriwshi edi. Ol haqıyqat ta'repinde turmag'an, o'ytkeni onda haqıyqatlıq joq. Ol o'tirik so'ylegen waqıtta o'z ta'biyatına ta'n so'yleydi. Sebebi ol o'tirikshi ha'm o'tiriktin' a'kesi.
45 Biraq Men haqıyqattı aytıp turg'anlıqtan, Mag'an isenbey atırsızlar.
46 Qaysı birin'iz Meni gu'nalı dep, ayıplay alasız? Eger haqıyqattı aytıp turg'an bolsam, nege Mag'an isenbey atırsızlar?
47 Kim Qudaydan bolsa, Qudaydın' so'zlerin tın'laydı. Al sizler Qudaydan bolmag'anlıqtan tın'lamay atırsızlar.
48 Yahudiyler İysag'a juwap berip: – Sen samariyalısan' ha'm Seni jin urg'an, dep aytqanımız durıs emes pe? – dedi.
49 İysa juwap berip bılay dedi: – Meni jin urg'an joq. Biraq Men A'kemdi hu'rmet qılaman, al sizler Meni masqaralap atırsızlar.
50 Men O'zime ullılıq izlemeymen. Ullılıg'ımdı izlewshi ha'm hu'kim etiwshi Birew bar.
51 Sizlerge shının, haqıyqatın aytaman: kim de kim so'zlerimdi orınlasa, ol hesh qashan o'lim ko'rmeydi.
52 Yahudiyler İysag'a: – Seni jin urg'anın endi bildik. İbrayım ha'm payg'ambarlar o'lip ketti. Al Sen: «Kim de kim Menin' so'zlerimdi orınlasa, ol hesh qashan o'lim ko'rmeydi», – dep atırsan'.
53 Sen bizlerdin' babamız İbrayımnan ullımısan'? Ol da, payg'ambarlar da o'lip ketken. Sen O'zin'di kim dep sanaysan'? – dedi.
54 İysa juwap berip bılay dedi: – Eger Men O'zimdi O'zim ullılasam, Menin' ullılıg'ım push boladı. Meni ullılaytug'ın, sizler «Qudayımız» dep ataytug'ın Menin' A'kem.
55 Sizler Onı bilmeysizler, al Men Onı bilemen. Eger Onı bilmeymen, desem, sizler sıyaqlı o'tirikshi bolaman. Biraq Men Onı bilemen ha'm Onın' so'zin orınlayman.
56 Baban'ız İbrayım Menin' keletug'ın ku'nimdi ko'retug'ınına quwandı ha'm ko'rip shadlandı.
57 Yahudiyler İysag'a: – Sen ele eliw jasqa da tolg'anın' joq-g'o. Sen İbrayımdı ko'rdin' be? – dedi.
58 İysa olarg'a: – Sizlerge shının, haqıyqatın aytaman: İbrayım tuwılmastan burın Men bar edim, – dedi.
59 Sonda olar İysag'a ılaqtırıw ushın tas aldı. Biraq İysa olardan jasırınıp, İbadatxanadan shıg'ıp ketti.
