Elshiler 10 bob
1 Kesariyada «İtaliyan» degen a'skeriy bo'limnin' ju'zbasısı bolg'an Korneliy atlı bir adam bar edi.
2 Ol pu'tkil shan'arag'ı menen Qudaydan qorqatug'ın, dinshil adam edi. Xalıqqa ko'p ja'rdem berip, Qudayg'a ba'rqulla duwa etetug'ın edi.
3 Bir ku'ni tu'sten keyin saat u'shler shamasında Qudaydın' bir perishtesinin' og'an kelip: «Korneliy!» dep aytqanın ol bir ayanda anıq ko'rdi.
4 Korneliydi qorqınısh biylep, ol ko'zlerin perishtege tikti de: – Newe, İyem? – dedi. Perishte og'an juwap berip: – Etken duwaların' menen bergen qayır-sadaqaların' Qudayg'a jetip bardı. Quday olardı este saqladı.
5 Endi Yaffag'a adamlardı jiberip, Petr dep atalatug'ın Simon degen bir adamdı shaqırt.
6 Ol u'yi ten'iz jag'asında jaylasqan Simon atlı bir teri iylewshinin' u'yinde qonaqta, – dedi.
7 O'zi menen so'ylesken perishte ketkende, Korneliy xızmetshilerinen ekewin ha'm o'z ja'rdemshilerinin' ishinen bir dinshil a'skerdi shaqırdı.
8 Olarg'a ha'mmesin tu'sindirip, Yaffag'a jiberdi.
9 Erten'ine saat on ekiler shamasında olar jol ju'rip qalag'a jaqınlasqanda, Petr duwa etiw ushın tamnın' to'besine shıqtı.
10 Ol ash bolıp, awqat jegisi keldi. Awqat tayarlanıp atırg'anda, ayrıqsha jag'dayg'a tu'sti.
11 Sonda ol aspannın' ashılg'anın ha'm dasturxan sıyaqlı bir na'rsenin' to'rt mu'yeshi asılg'an halında jerge tu'sip kiyatırg'anın ko'rdi.
12 Onın' ishinde ha'r tu'rli to'rt ayaqlı janıwarlar, jer bawırlawshılar ha'm aspan qusları bar edi.
13 Bir dawıs og'an: – Petr, tur. Soyıp je, – dedi.
14 – Yaq, İyem. Men hesh qashan haram yamasa patas zat jegen emespen, – dedi Petr.
15 Dawıs ja'ne ekinshi ret esitilip, Petrge: – Qudaydın' hadallag'anın sen haram deme! – dedi.
16 Bul u'sh ma'rte ta'kirarlanıp, dasturxan da'rhal aspang'a ko'terilip ketti.
17 Ko'rgen ayanının' neni an'latatug'ının oylap, Petr hayran bolıp turg'anda, Korneliy jibergen adamlar Simonnın' u'yin sorap, qapının' aldında toqtap qaldı.
18 Olar dawıslap: – Petr dep atalatug'ın Simon usı jerde turıp atır ma? – dep soradı.
19 Petr ele ayan haqqında oylanıp turg'anda, Muxaddes Ruwx og'an: – A'ne, u'sh adam seni izlep ju'r.
20 Qa'ne, ornın'nan turıp, to'menge tu's. Hesh ekilenbesten, olar menen birge ket. Sebebi olardı Men jiberdim, – dedi.
21 Petr to'menge tu'sip, adamlarg'a: – Sizler izlep ju'rgen adam men bolaman. Qanday jumıs penen keldin'ler? – dedi.
22 Olar Petrge: – Korneliy degen haq ha'm Qudaydan qorqatug'ın, pu'tkil yahudiyler hu'rmet etetug'ın bir ju'zbası bar. Og'an bir muxaddes perishte seni u'yine shaqırtıp, so'zlerin'di tın'lawdı buyırıptı, – dedi.
23 Sonda Petr olardı ishke mira't etip, miyman qıldı.Erten'ine Petr turıp, olar menen birge jolg'a shıqtı. Yaffadag'ı tuwısqanlardın' ayırımları da onın' menen birge ketti.
24 Olar kelesi ku'ni Kesariyag'a keldi. Korneliy ag'ayin-tuwg'anların ha'm jaqın dosların jıynap, olardı ku'tip otırg'an edi.
25 Petr u'yge kirgende, Korneliy onı qarsı aldı da, ayaqlarına jıg'ılıp, og'an tabındı.
26 Biraq Petr onı turg'ızıp: – Tur, men de adamman-g'o, – dedi.
27 Petr Korneliy menen so'ylesip ishke kirgende, ko'p adamlardın' jıynalıp otırg'anın ko'rip,
28 olarg'a bılay dedi: – Yahudiy adamnın' basqa millet adamı menen qarım-qatnasta bolıp, og'an barıwı qadag'an ekenin bilesizler. Biraq Quday mag'an hesh adamdı haram ha'm iplas demew kerekligin ko'rsetken edi.
29 Sonlıqtan shaqırılg'anımda bas tartpay usı jerge keldim. Endi meni ne sebepten shaqırg'anın'ızdı sorawıma bola ma?
30 Korneliy bılay dedi: – To'rt ku'n aldın usınday waqıtta, tu'sten keyin saat u'shte u'yde duwa etip otır edim. Tosattan jarqırag'an kiyimli bir adam aldımda payda bolıp,
31 mag'an: «Korneliy! Quday senin' duwan'dı esitip, bergen qayırsadaqaların'dı este saqladı.
32 Yaffag'a adam jiberip, Petr dep atalatug'ın Simondı shaqırt. Ol ten'iz jag'asında jasaytug'ın teri iylewshi Simonnın' u'yinde turıp atır», – dedi.
33 Sonlıqtan men sizge da'rriw adam jolladım. Siz de kelip, jaqsı qıldın'ız. Endi bizler ha'mmemiz İyemizdin' sizge buyırg'an ha'r bir na'rsesin tın'law ushın Quday aldında otırmız.
34 Sonda Petr bılay dep so'zin basladı:
35 – Qudaydın' adamlardı ayırmaytug'ının, biraq O'zinen qorqqan ha'm haq is islewshi adamdı milletine qaramay qabıl etetug'ının haqıyqattan tu'sinip turman.
36 Quday İzrail xalqına İysa Masix arqalı tınıshlıq Xosh Xabarın ja'riyalag'anın bilesizler. İysa Masix – ha'r bir adamnın' İyesi.
37 Yaqıya suwg'a shomıldırılıwdı ja'riyalag'annan son', Galiladan baslap pu'tkil Yahudiyada bolg'an mına waqıyalardan da xabarın'ız bar:
38 Quday Nasıralı İysag'a Muxaddes Ruwx ha'm qu'diret berip, xızmetke tayınladı. İysa ha'mme jerdi aylanıp jaqsılıq isledi, shaytannın' qol astında bolg'anlardın' ha'mmesine shıpa berdi. O'ytkeni Quday Onın' menen birge edi.
39 İysanın' yahudiylerdin' u'lkesinde ha'm Erusalimde islegen islerinin' ha'mmesine bizler gu'wamız. Adamlar Onı atanaq ag'ashqa shegelep o'ltirgen edi.
40 Biraq Quday İysanı u'shinshi ku'ni o'limnen tiriltti ha'm Onın' adamlarg'a ko'riniwine jol qoydı.
41 Ol adamlardın' ha'mmesine emes, al Qudaydın' aldın ala tan'lag'an gu'walarına, yag'nıy bizlerge, o'limnen qayta tirilgennen keyin O'zi menen birge iship-jegenlerge ko'rindi.
42 Ol O'zinin' Quday ta'repinen tirilerdi ha'm o'lilerdi hu'kim etiwshi bolıp tayınlang'anın xalıqqa ja'riyalawımızdı ha'm bul haqqında gu'walıq beriwimizdi buyırdı.
43 Payg'ambarlardın' ha'mmesi İysa haqqında gu'walıq berip, Og'an isengen ha'r bir adamnın' gu'naları Onın' atı menen keshiriletug'ının aytqan edi.
44 Petr ele usı so'zlerdi so'ylep turg'anda, Qudaydın' so'zlerin esitken ha'r bir adamnın' u'stine Muxaddes Ruwx tu'sti.
45 Petr menen birge kelgen iseniwshi yahudiyler Muxaddes Ruwxtın' sıyı basqa millet adamlarının' u'stilerine de jawg'anına tan' qalıstı.
46 Sebebi olardın' basqa tillerde so'ylep, Qudaydı alg'ıslap turg'anın esitti. Sonda Petr:
47 – Bular da anıq bizler sıyaqlı Muxaddes Ruwxtı aldı. Olardın' suwg'a shomıldırılıwına kim qadag'an ete aladı? – dedi.
48 Solay etip, Petr olardın' İysa Masixtın' atı menen suwg'a shomıldırılıwın buyırdı. Son'ınan olar Petrden bir neshe ku'n qalıwın o'tinish etti.
