Elshiler 11 bob
1 Elshiler menen Yahudiyadag'ı tuwısqanlar basqa milletlerdin' de Qudaydın' so'zin qabıl etkenin esitti.
2 Sonlıqtan Petr Erusalimge kelgende, su'nnetli iseniwshiler onı ayıplap:
3 – Sen su'nnetsiz adamlardın' u'yine barıp, olar menen birge as ishipsen'! – dedi.
4 Sonda Petr so'z baslap, bolg'an waqıyanı izbe-izlik penen aytıp berdi:
5 – Men Yaffa qalasında duwa etip otırg'an edim. Ayrıqsha jag'dayg'a tu'sip, bir ayan ko'rdim: dasturxang'a uqsag'an bir na'rse to'rt mu'yeshi asılg'an halında aspannan tu'sip, menin' janıma deyin keldi.
6 Ko'zlerimdi tigip, dasturxang'a dıqqat penen qaradım. Dasturxannın' ishinde jer ju'zinde jasawshı to'rt ayaqlı janıwarlardı, jabayı haywanlardı, jer bawırlawshılardı ha'm aspan qusların ko'rdim.
7 Sonda mag'an bir dawıstın': «Petr, tur. Soyıp je», – degenin esittim.
8 «Yaq, İyem! Awzıma hesh qashan haram yamasa patas na'rse alg'anım joq», – dedim.
9 Dawıs aspannan ekinshi ma'rte esitilip: «Qudaydın' hadallag'anın sen haram deme!» – dedi.
10 Bul u'sh ma'rte ta'kirarlandı. Son'ınan ha'mmesi ja'ne aspang'a alındı.
11 Tap sol waqıtta Kesariyadan mag'an jiberilgen u'sh adam men bolıp atırg'an u'ydin' aldında turg'an edi.
12 Muxaddes Ruwx mag'an hesh ekilenbey olar menen ketiwdi ayttı. Bul altı tuwısqanımız da menin' menen birge shıg'ıp, sol adamnın' u'yine bardıq.
13 Ol bizlerge qalayınsha bir perishteni ko'rgenin aytıp berdi. Perishte onın' u'yinde payda bolıp, o'zine: «Yaffag'a adam jollap, Petr dep atalatug'ın Simondı shaqırt.
14 Ol sag'an seni ha'm pu'tkil xojalıg'ın'dı qutqaratug'ın so'zlerdi aytadı», – depti.
15 Men so'yley baslag'annan-aq, en' basta bizlerdin' u'stimizge tu'skendey, olardın' u'stilerine de Muxaddes Ruwx tu'sti.
16 Sonda İyemizdin' mına so'zleri yadıma tu'sti: «Yaqıya suw menen shomıldırdı, al sizler Muxaddes Ruwx penen shomıldırılasızlar»
17 Solay etip, Quday İyemiz İysa Masixqa isenetug'ın bizlerge bergen sıyın olarg'a da berse, Qudayg'a qarsı shıg'atug'ınday men kim bolıppan?
18 Bul so'zlerdi esitip, olar tınıshlandı. Qudaydı alg'ıslap bılay dedi: – Demek, Quday basqa milletlerge de ta'wbe etip, ma'n'gilik o'mirge iye bolıw mu'mkinshiligin beripti.
19 Stepan o'ltirilgen ku'nnen baslang'an quwdalaw sebepli tarqalg'an iseniwshiler Fenikiya, Kipr ha'm Antioxiyag'a shekem bardı. Olar Qudaydın' so'zin tek yahudiylerge ja'riyalaytug'ın edi.
20 Biraq, olardın' arasınan kiprlı ha'm kireneli ayırım adamlar Antioxiyag'a barıp, greklerge de İyemiz İysa tuwralı Xosh Xabardı ja'riyalap ju'rdi.
21 İyemizdin' qu'direti olar menen birge bolg'anlıqtan, ko'p adamlar isenip, İyemizdin' jolına tu'sti.
22 Bul haqqında xabar Erusalimdegi iseniwshilerdin' ja'ma'a'tine jetip barg'anda, olar Barnabanı Antioxiyag'a jiberdi.
23 Barnaba sol jerge kelgende, Qudaydın' miyrimin ko'rip quwandı. Olardın' ha'mmesine İyemizge shın kewilden sadıq bolın'lar, dep aqıl-na'siyat berdi.
24 O'ytkeni ol Muxaddes Ruwxqa tolg'an, isenimi ku'shli, jaqsı adam edi. Solay etip, ko'p adamlar İyemizge alıp kelindi.
25 Sonda Barnaba Sauldı izlew ushın Tarsusqa ketti.
26 Onı tawıp, Antioxiyag'a a'keldi. Solay etip, Barnaba menen Saul tolıq bir jıl sol jerdegi iseniwshiler ja'ma'a'ti menen birge jıynalıp, ko'p adamlarg'a ta'lim berdi. Usı Antioxiya qalasındag'ı sha'kirtler birinshi ma'rte masixıylar dep ataldı.
27 Sol ku'nleri Erusalimnen Antioxiyag'a bir neshe payg'ambarlar keldi.
28 Olardan Agabus atlı birewi ornınan turıp, pu'tkil jer ju'zinde ashlıq bolatug'ının Muxaddes Ruwxtan ilhamlanıp, boljap ayttı. Bul ashlıq Klavdiy patshanın' zamanında boldı.
29 Sonda sha'kirtler Yahudiyada jasaytug'ın tuwısqanlarg'a qollarınan kelgeninshe aqshalay ja'rdem beriwge qarar etti.
30 Olar jıynalg'an aqshalardı iseniwshiler ja'ma'a'tinin' aqsaqallarına Barnaba ha'm Saul arqalı jiberip, usı qarardı orınladı.
