Elshiler 12 bob
1 Sol waqıtta patsha Hirod iseniwshiler ja'ma'a'tinin' geybir adamların quwdalaw ushın tutqıng'a aldı.
2 Ol Yuxannın' tuwısqanı Yaqıptı qılısh penen o'ltirtti.
3 Bunın' yahudiy basshılarına jaqqanın ko'rip, izinen Petrdi de uslatpaqshı boldı. Ashıtqısız nan bayramı ku'nleri edi.
4 Hirod Petrdi uslatıp, qamaqqa saldırdı. Onı qarawıllawdı ha'r biri to'rt a'skerden ibarat bolg'an to'rt a'skeriy toparg'a tapsırdı. Sebebi Qutqarılıw bayramınan son', onı xalıqtın' aldına shıg'arıw niyetinde edi.
5 Solay etip, Petr qamaqqa alındı. Biraq iseniwshiler ja'ma'a'ti ol ushın Qudayg'a bar jigeri menen duwa etti.
6 Hirodtın' Petrdi xalıqtın' aldına shıg'armaqshı bolg'an ku'ninen aldın'g'ı ku'ni tu'nde, ol eki a'skerdin' ortasında qos shınjır menen baylawlı halında uyıqlap atır edi. Qapının' awzında turg'an qarawıllar da qamaqtı qarawıllap tur edi.
7 Tosattan İyemizdin' bir perishtesi payda bolıp, qamaqtın' ishi jarqırap ketti. Perishte Petrdin' bu'yirinen tu'rtip, onı oyattı da: – Tez ornın'nan tur, – degende, Petrdin' qollarındag'ı shınjırlar sheshilip, tu'sip ketti.
8 Perishte og'an: – Belin'di buwıp, ayaq kiyimin'di kiy, – dedi. Petr usılay isledi. Perishte og'an: – Shapanın'dı kiyip, menin' izime er, – dedi.
9 Petr qamaqxana bo'lmesinen shıg'ıp, onın' izine erdi. Biraq, perishtenin' qılıp atırg'an islerinin' on'ında bolıp atırg'anın bilmey, ayan ko'rip turman, dep oyladı.
10 Olar birinshi ha'm ekinshi qarawıllardan o'tip, qalag'a shıg'atug'ın temir da'rwazag'a keldi. Da'rwaza olarg'a o'z-o'zinen ashıldı. Olar sırtqa shıg'ıp bir ko'she o'tkende, perishte birden Petrdin' janınan g'ayıp boldı.
11 Sonda o'zine kelgen Petr: «İyemizdin' O'z perishtesin jiberip, meni Hirodtın' qolınan ha'm yahudiy xalqının' menin' basıma tu'sedi, dep ku'tken barlıq ba'lelerden qutqarg'anın endi haqıyqattan tu'sinip turman», – dedi.
12 Petr bunı tu'singennen son', Mark dep atalatug'ın Yuxannın' anası Ma'riyamnın' u'yine ketti. Ol jerde ko'p adamlar jıynalıp, duwa etip otırg'an edi.
13 Petr sırtqı qapını qaqqanda, Roda atlı bir xızmetshi qız kim ekenin biliw ushın qapıg'a keldi.
14 Ol Petrdin' dawısın tanıp, qattı quwang'anınan qapını ashpay, qaytadan ishke juwırıp: «Petr qapının' aldında tur», – dep xabar berdi.
15 «Esin' durıs pa?» – desti og'an. Al qız so'zinde turıp alg'anlıqtan, olar: «Bul onın' perishtesi», – dedi.
16 Biraq Petr qapını qag'ıwdı dawam etti. Olar qapını ashıp, onı ko'rgende hayran qalıstı.
17 Petr olarg'a u'ndemewlerin qolı menen ımlap ko'rsetti de, İyemizdin' onı qamaqtan qalay shıg'arg'anın aytıp berdi. Son'ınan: «Bul xabarlardı Yaqıpqa ha'm basqa tuwısqanlarımızg'a jetkizin'ler», – dep, sol jerden shıg'ıp, basqa jaqqa ketti.
18 Tan' atqanda, Petrge ne bolg'anın tu'sinbey, a'skerler qattı albırastı.
19 Hirod Petrdi izletti. Taba almag'annan son', qarawıllardı sorawg'a tutıp, olardı o'ltiriwdi buyırdı.Bunnan son', Hirod Yahudiyadan Kesariyag'a ketip, bir qansha waqıt sol jerde qaldı.
20 Ol Tir ha'm Sidon turg'ınlarına qa'ha'rli edi. Sonda olar o'z ara kelisip, Hirodqa keldi. Patshanın' isenimli xızmetshisi Blastustı o'z ta'replerine awdarıp, jarastırıwdı soradı. O'ytkeni olardın' u'lkesinin' azıqawqatı patshanın' u'lkesinen g'a'rezli edi.
21 Belgilengen ku'nde patshalıq lipasların kiygen Hirod taxtına otırdı da, xalıqqa so'z so'yledi.
22 Sonda xalıq: «Bul adamnın' dawısı emes, qudaydın' dawısı», – dep baqırıstı.
23 Sol waqıtta-aq İyemizdin' bir perishtesi Hirodtı urıp jiberdi. Sebebi ol Qudayg'a beriw kerek bolg'an dan'qtı o'zi alg'an edi. Sonda onın' denesin qurtlar kemirip, ol jan tapsırdı.
24 Al Qudaydın' so'zi jayılıp, iseniwshilerdin' sanı arta berdi.
25 Tapsırmanı orınlag'an Barnaba menen Saul Mark dep atalatug'ın Yuxandı o'zleri menen birge alıp, Erusalimnen qaytıp keldi.
