Elshiler 14 bob
1 İkoniyada Pavel menen Barnaba a'dettegidey yahudiylerdin' ma'jilisxanasına barıp, sonday ta'sirli waz aytqanlıqtan, yahudiylerden de, greklerden de ko'p adam isendi.
2 Sonlıqtan ol jerde uzaq waqıt qalg'an Pavel menen Barnaba İyemizge su'yenip, Qudaydın' so'zin batırlıq penen aytıp ju'rdi. İyemiz olar arqalı ka'ramatlı belgiler ha'm tan' qalarlıq na'rselerdi ko'rsetip, O'z miyrimi haqqında so'zlerdi tastıyıqladı.
3 Sonlıqtan ol jerde uzaq waqıt qalg'an Pavel menen Barnaba İyemizge su'yenip, Qudaydın' so'zin batırlıq penen aytıp ju'rdi. İyemiz olar arqalı ka'ramatlı belgiler ha'm tan' qalarlıq na'rselerdi ko'rsetip, O'z miyrimi haqqında so'zlerdi tastıyıqladı.
4 Qala xalqı ekige bo'linip, geybirewleri yahudiylerdin', geybirewleri elshilerdin' ta'repine o'tti.
5 Yahudiyler menen basqa millet adamları o'z basshıları menen birlikte elshilerge ja'bir berip, olardı tas penen urmaqshı boldı.
6 Biraq bunı bilip qoyg'an Pavel menen Barnaba Likaoniyanın' Listra, Derbe qalalarına ha'm sol a'tiraplarg'a qashıp barıp,
7 sol jerlerde de Xosh Xabardı ja'riyalawdı dawam etti.
8 Listrada eki ayag'ı la'n' bir adam bar edi. Ol ishten la'n' bolıp tuwılıp, hesh qashan ju'rmegen edi.
9 Bul adam Paveldin' so'zlerin tın'lap otırg'anda, Pavel og'an tigilip qarap, shıpa tabatug'ınına isenimi bar ekenin ko'rdi de,
10 qattı dawıslap: – Ayaqların'da tik tur, – dedi. Sol adam ornınan ushıp turdı da, ju're basladı.
11 Xalıq Paveldin' islegen isin ko'rgende, likaoniya tilinde: – Qudaylar adam pishinine enip, bizlerge kelipti, – dep baqırıstı.
12 Olar Barnabanı Zevs, Paveldi so'z so'ylegeni ushın Germes dep atadı.
13 Qalanın' sırtında jaylasqan Zevs ibadatxanasının' ruwxaniyi qala da'rwazasına o'gizlerdi ha'm gu'l shen'berlerin alıp keldi de, xalıq penen birlikte elshilerge qurbanlıq bermekshi boldı.
14 Biraq elshiler – Barnaba menen Pavel bunı esitkende kiyimlerin jırtıp, ko'pshiliktin' arasına o'zlerin urdı da, bılay dep baqırdı:
15 – Adamlar! Nege bunday islep atırsızlar? Bizler de sizler sıyaqlı adamlarmız-g'o! Sizlerdin' bul ma'nissiz na'rselerdi taslap, aspandı, jerdi, ten'izdi ha'm olardın' ishindegilerdin' ha'mmesin jaratqan tiri Qudayg'a qaytıwın'ız ushın Xosh Xabardı ja'riyalap atırmız.
16 Quday o'tken a'wladlardın' waqtında barlıq milletlerdi o'z o'mir jolları menen ju'riwge qaldırdı.
17 Sog'an qaramastan, O'zi haqqında gu'walıq beriwdi toqtatpay, sizlerge jaqsılıq islep kelmekte: Ol aspannan jawın jawdırıp, jemislerge bay ma'wsimlerdi beredi. Sizlerdi azıq penen toydırıp, ju'regin'izdi quwanıshqa toltıradı.
18 Usı so'zler menen, olar o'zlerine qurbanlıq bermewge xalıqtı zorg'a degende ko'ndirdi.
19 Biraq Pisidiyanın' Antioxiya ha'm İkoniya qalalarınan kelgen ayırım yahudiyler xalıqtı o'z ta'repine awdırıp, Paveldi tas penen urdı. Onı o'ldi dep oylap, qalanın' sırtına su'yrep shıg'arıp tasladı.
20 Degen menen, sha'kirtler a'tirapına jıynalg'anda, Pavel o'zine kelip ornınan turdı da, qalag'a qayttı. Erten'ine ol Barnaba menen birge Derbege ketti.
21 Olar Xosh Xabardı Derbe qalasında ja'riyalap, ko'p sha'kirt arttırg'annan son', Pisidiyadag'ı Listra, İkoniya ha'm Antioxiya qalalarına qaytıp keldi.
22 Jol-jo'nekey sha'kirtlerdin' janlarına ku'sh-quwat berip, isenimde bekkem turıwdı u'git-na'siyat etti de: «Qudaydın' Patshalıg'ına kiriwimiz ushın, ko'p qıyınshılıqlardan o'tiwimiz tiyis», – dedi.
23 Pavel menen Barnaba ha'r bir iseniwshi ja'ma'a'tte aqsaqallardı tayınladı. Oraza tutıp, duwa etkennen son', olardı o'zleri burınnan isenetug'ın İyemiz İysanın' qolına tapsırdı.
24 Son'ınan olar Pisidiya u'lkesi arqalı o'tip, Pamfiliya u'lkesine keldi.
25 Pergiyada Qudaydın' so'zin ja'riyalag'annan son', Antaliyag'a ketti.
26 Sol jerden keme menen Antioxiyag'a qayttı. Bul qalada olar o'zlerine tapsırılg'an is ushın o'zlerin Qudaydın' miyrimine bag'ıshlag'an edi. Olar sol isti endi orınladı.
27 Ol jerge jetkende, olar iseniwshiler ja'ma'a'tin bir jerge jıynap, Qudaydın' o'zleri arqalı neler islegenin, basqa milletlerge isenim qapısın qalay ashqanın bildirdi.
28 Olar sol jerdegi sha'kirtler menen birge uzaq waqıt qaldı.
