Elshiler 17 bob
1 Olar Amfipolis ha'm Apolloniyadan o'tip, Salonikag'a keldi. Bul jerde yahudiylerdin' bir ma'jilisxanası bar edi.
2 Pavel o'z a'deti boyınsha ma'jilisxanag'a bardı. U'sh ha'pte olar menen Muxaddes Jazıwlardı talqıladı.
3 Masixtın' azap shegip, o'limnen qayta tiriliwi tiyis ekenin tu'sindirip, da'liller keltirdi de: – Men sizlerge ja'riyalap atırg'an bul İysa – Masix, – dedi ol.
4 Yahudiylerdin' bazıları maqullap, Pavel menen Silag'a qosıldı. Sonday-aq, Qudayg'a sıyınatug'ın greklerdin' u'lken toparı ha'm ko'plegen abıraylı hayallar da solay isledi.
5 Biraq yahudiyler ku'nshillik etip, bazarda bos ju'rgen ayırım jaramas adamlardı jıynadı da, qalada topalan' saldı. Pavel menen Silanı tawıp, olardı xalıqtın' aldına shıg'arıw ushın, Yasonnın' u'yine topılıp kirdi.
6 Biraq olardı taba almay, Yason menen basqa geybir tuwısqanlardı qala basshılarının' aldına su'yrep aparıp: – Pu'tkil du'nyanı astan-kesten etken bul adamlar usı jerge de kelipti.
7 Yason olardı qabıl qıldı. Olardın' ha'mmesi İysa degen basqa bir patsha bar ekenin aytıp, Rim patshası-Qaysardın' pa'rmanlarına qarsı ha'reket etip ju'r, – dep baqırdı.
8 Bul so'zlerdi esitken xalıq ha'm qala basshıları qattı tınıshsızlandı.
9 Biraq olar Yasonnan ha'm basqalardan kepillikke aqsha alıp, bosatıp jiberdi.
10 Tuwısqanlar da'rriw sol tu'ni Pavel menen Silanı Veriyag'a jiberdi. Olar Veriyag'a kelip, yahudiylerdin' ma'jilisxanasına kirdi.
11 Veriyadag'ı yahudiyler Salonikadag'ılardan parasatlıraq edi. Olar Qudaydın' so'zin u'lken qızıg'ıwshılıq penen qabıl etip, Pavel menen Silanın' aytqan so'zlerinin' durıs ekenin biliw ushın, ha'r ku'ni Muxaddes Jazıwlardı izertleytug'ın edi.
12 Solay etip, yahudiylerdin' ko'bisi ha'm ko'plegen abıraylı grek hayalları menen er adamları isendi.
13 Biraq Salonikadag'ı yahudiyler Paveldin' Veriyada da Qudaydın' so'zin ja'riyalag'anın bilgende, sol jerge de keldi ha'm xalıqtı u'gitlep, qozg'alan' saldı.
14 Sonda tuwısqanlar Paveldi da'rhal ten'iz ta'repke jiberdi. Al Sila menen Timofey Veriyada qaldı.
15 Paveldi shıg'arıp salıwshılar onı Afinag'a deyin apardı. Olar Pavelden: «Sila menen Timofey, mu'mkin bolsa, tez mag'an jetsin», – degen tapsırmanı alıp, izlerine qayttı.
16 Afinada Sila menen Timofeydi ku'tip ju'rgen Pavel qalanın' butlarg'a tolı ekenin ko'rgende, qattı qapa bolıp ashıwlandı.
17 Sonlıqtan ol ma'jilisxanadag'ı yahudiyler ha'm Qudayg'a sıyınatug'ın grekler menen aytısıp, ha'r ku'ni bazar maydanında ushırasqanlar menen tartısıp ju'rdi.
18 Epikurshılardın' ha'm stoik oyshıllarının' geybirewleri de onın' menen tartısa basladı. Birewleri: «Mına mıljın' ne demekshi», – dese, ayırımları: «Ol jat qudaylardın' xabarshısı bolsa kerek», – dedi. O'ytkeni Pavel İysa ha'm Onın' qayta tiriliwi tuwralı Xosh Xabardı ja'riyalap ju'r edi.
19 Olar Paveldi Areopag ken'esine alıp kelip, og'an: – Sen ja'riyalap ju'rgen bul jan'a ta'liymattın' ne ekenin biliwimizge bola ma?
20 Sebebi sen qulag'ımızg'a jat na'rselerdi aytıp atırsan', bulardın' ne ekenin bilgimiz keledi, – dedi.
21 Pu'tkil afinalılar ha'm sol jerde jasaytug'ın shet elliler waqıtların tek jan'alıqlar aytıw ha'm tın'law menen o'tkizetug'ın edi.
22 Pavel Areopag ken'esinin' ortasında turıp, bılay dedi: – Ha'y, afinalılar! Sizlerdin' ha'r ta'repleme ju'da' dinshil ekenin'izdi ko'rip turman.
23 Men aylanıp ju'rip, sizler tabınatug'ın orınlardı ko'zden keshirgenimde, «Biytanıs qudayg'a» degen jazıwı bar, bir qurbanlıq shalınatug'ın orındı da ko'rdim. Endi o'zlerin'iz bilmey sıyınıp ju'rgen usı Quday haqqında sizlerge ja'riyalayjaqpan.
24 Du'nyanı ha'm onın' ishindegilerdin' ha'mmesin jaratqan Quday aspan ha'm jerdin' İyesi bolg'anlıqtan, adamnın' qolı menen salıng'an ibadatxanalarda jasamaydı.
25 Ol bir na'rsege mu'ta'jdey, Og'an adamnın' qolları menen xızmet etip bolmaydı. O'ytkeni ha'mme adamlarg'a o'mir, dem ha'm barlıqtı Onın' O'zi beredi.
26 Quday ha'mme milletlerdi bir adamnan jaratıp, olardı pu'tkil jer ju'zine ornalastırdı. Olardın' jasaytug'ın da'wirleri menen ma'kanlarının' shegaraların aldın ala belgilep bergen.
27 Bunı Quday O'zin izlesin ha'm qarmalanıp bolsa da tapsın, dep isledi. Degen menen, Ol hesh birimizden alıs emes.
28 Sebebi sizlerdin' shayırların'ızdın' geybirewleri: «Bizler Onın' urpag'ımız», – dep aytqanınday, bizler Ol arqalı jasaymız, ha'reket etemiz ha'm barmız.
29 Bizler endi Qudaydın' urpag'ı bolg'anımız sebepli, Quday adamnın' o'neri ha'm aqıl-oyı menen do'retilgen altın, gu'mis yamasa tas mu'singe uqsas dep oylaman'lar.
30 O'tken nadanlıq da'wirlerde Quday dıqqat awdarmag'an bolsa da, endi ha'r bir jerde ha'r bir adamnın' ta'wbe etiwin buyırmaqta.
31 O'ytkeni Ol bul du'nyanı O'zi tan'lag'an Adamı arqalı a'dillik penen hu'kim etetug'ın ku'ndi belgilep qoyıptı. Bunı sol Adamdı o'limnen qayta tiriltip, ha'r bir adamg'a da'lilledi.
32 O'limnen qayta tiriliw haqqında esitkende, kimisi mazaq etip ku'ldi, kimisi: «Bul haqqında seni basqa sapar tın'lag'ımız keledi», – dedi.
33 Son'ınan Pavel olardın' arasınan shıg'ıp ketti.
34 Al geybir adamlar og'an qosılıp, isendi. Olardın' arasında Areopag ken'esinin' ag'zası bolg'an Dionisiy, Damaris atlı bir hayal ha'm ja'ne basqalar bar edi.
