Elshiler 18 bob
1 Bunnan son', Pavel Afinadan shıg'ıp, Korinfke keldi.
2 Sol jerde Akila atlı, pontlı bir yahudiyge duslastı. Akila hayalı Priskila menen jaqında İtaliyadan kelgen edi. Sebebi Klavdiy patsha barlıq yahudiylerdin' Rimnen shıg'ıp ketiwin buyırg'an edi. Pavel olarg'a bardı da,
3 ka'siples bolg'anlıqtan olar menen birge qalıp, jumıs isledi. Olardın' ka'sibi – shatır sog'ıw edi.
4 Pavel ha'r dem alıs ku'ni ma'jilisxanada aytısıp, yahudiylerdi ha'm greklerdi isendiriwge ha'reket etti.
5 Sila menen Timofey Makedoniyadan kelgende, Pavel o'zin Qudaydın' so'zin ja'riyalawg'a ha'm yahudiylerge İysanın' Masix ekeni haqqında gu'walıq beriwge tolıq bag'ıshladı.
6 Biraq yahudiyler qarsı shıg'ıp, onı masqaralag'anda, Pavel kiyiminin' shan'ın qag'ıp*, olarg'a bılay dedi: – O'z obalın'ız o'zin'izge!* Men juwapkershilikten azatpan. Bunnan bılay, basqa milletlerge ketemen.
7 Pavel sol jerden shıg'ıp, Qudayg'a sıyınatug'ın Titus Yustus atlı bir adamnın' u'yine keldi. Onın' u'yi ma'jilisxanag'a irgeles edi.
8 Ma'jilisxana basshısı bolg'an Krispus pu'tkil u'y-ishi menen İyemizge isendi. Paveldi tın'lag'an korinflilerdin' ko'bisi de isenip, suwg'a shomıldırıldı.
9 Bir ku'ni tu'nde İyemiz Pavelge ayan ko'rsetip: «Qorqpa, u'nsiz qalmay, so'yley ber!
10 Men senin' menen birgemen, jamanlıq islew ushın sag'an hesh kim qol tiygize almaydı. O'ytkeni bul qalada Menin' adamlarım ko'p», – dedi.
11 Solay etip, Pavel ol jerde bir yarım jıl qaldı ha'm xalıqqa Qudaydın' so'zin u'yretiwin dawam etti.
12 Galio Axaya u'lkesinin' ha'kimi bolg'an waqıtta yahudiyler birigip, Pavelge qarsı shıqtı. Onı qazıxanag'a alıp barıp:
13 – Mına adam xalıqtı u'gitlep, Qudayg'a sıyınıwdı bizlerdin' nızamımızg'a qayshı keletug'ın jol menen u'yretip ju'r, – dedi.
14 Pavel endi so'zin baslamaqshı bolg'anda, Galio yahudiylerge bılay dedi: – Ha'y, yahudiyler! Eger bir nızamsızlıq yamasa bir awır jınayat islengen bolsa, men sizlerdi sabırlılıq penen tın'lar edim.
15 Biraq, so'zlerge, atlarg'a ha'm o'zlerin'izdin' nızamın'ızg'a baylanıslı ma'seleler bolsa, o'zlerin'iz sheshin'ler. Men bunday na'rselerge qazılıq etkim kelmeydi.
16 Solay etip, Galio olardı qazıxanadan quwıp jiberdi.
17 Sonda olardın' ha'mmesi ma'jilisxananın' basshısı Sostenisti uslap alıp, qazıxananın' aldında sabap tasladı. Al Galio bularg'a kewil de awdarg'an joq.
18 Pavel sol jerde ja'ne bir neshe ku'n bolg'annan son', tuwısqanlar menen xoshlastı. Priskila ha'm Akila menen birge Siriyag'a barıw ushın kemege mindi. Qudayg'a ant bergenlikten, Pavel Kenxreyada shashın qıydırıp tasladı.
19 Efeske kelgende, Priskila menen Akilanı sol jerde qaldırıp, o'zi ma'jilisxanag'a bardı da, yahudiyler menen aytısa basladı.
20 Olar ko'birek waqıt qalıwın o'tinish etse de, Pavel qayılshılıq bermedi.
21 Biraq olar menen xoshlasıp atırıp: – Quday qa'lese, sizlerge ja'ne qaytıp kelemen, – dedi. Son'ınan keme menen Efesten jo'nep ketti.
22 Ol Kesariyada kemeden tu'sip, Erusalimge ketti ha'm sol jerdegi iseniwshiler ja'ma'a'tine sa'lem bergennen son', Antioxiyag'a bardı.
23 Antioxiyada bir neshe waqıt qalg'annan son', Pavel jolg'a shıqtı. Ta'rtip boyınsha Galatiya ha'm Frikiya u'lkelerin aralap, ha'mme sha'kirtlerge ruwxıy ku'sh-quwat berip ju'rdi.
24 Sol waqıtta negizi iskenderiyalı bolg'an Apolos atlı bir yahudiy Efeske keldi. Ol Muxaddes Jazıwlardı ju'da' jaqsı biletug'ın, so'zge sheshen adam edi.
25 İyemizdin' jolında ta'lim alg'an ol jalınlı ruwx penen so'ylep, İysa haqqında durıs u'yretetug'ın edi. Biraq ol tek Yaqıyanın' suwg'a shomıldırıwın g'ana biletug'ın edi.
26 Apolos ma'jilisxanada batıllıq penen so'yley basladı. Bunı Priskila menen Akila esitkende, onı u'yine aparıp, Qudaydın' jolın anıg'ıraq tu'sindirip berdi.
27 Apolos Axayag'a ketpekshi bolg'anda, tuwısqanlarımız onı qollap quwatladı. Sol jerdegi sha'kirtlerdin' onı qabıl qılıwı ushın xat jazıp berdi. Apolos sol jerge jetip barıp, Qudaydın' miyrimi menen isengenlerge ko'p ja'rdem berdi.
28 Sebebi ol İysanın' Masix ekenin Muxaddes Jazıwlar arqalı da'lillep, yahudiylerdi xalıq aldında ku'shli tu'rde a'shkaraladı.
