Elshiler 19 bob
1 Apolos Korinfte bolg'anda, Pavel tawlı u'lkelerden o'tip, Efeske keldi. Ol jerde ayırım sha'kirtler menen ushırasıp,
2 olardan: – İsengen waqtın'ızda Muxaddes Ruwxtı aldın'ız ba? – dep soradı. – Muxaddes Ruwxtın' bar ekenin bizler hesh esitpedik de, – dep juwap berdi olar.
3 – Olay bolsa, qanday shomıldırıw menen shomıldırıldın'lar? – dep soradı Pavel. – Yaqıyanın' ta'limine tiykarlanıp, suwg'a shomıldırıldıq, – dedi olar.
4 Pavel bılay dedi: – Yaqıya xalıqtı ta'wbe ettirip ha'm suwg'a shomıldırıp, olarg'a o'zinen son' Keletug'ıng'a, yag'nıy İysag'a iseniwdi aytqan edi.
5 Olar bunı esitkende, İyemiz İysanın' atı menen suwg'a shomıldırıldı.
6 Pavel olardın' u'stilerine qolların qoyıp duwa etkende, olarg'a Muxaddes Ruwx tu'sti ha'm olar basqa tillerde so'ylep, Qudaydın' so'zlerin ayta basladı.
7 Olar barlıg'ı bolıp shama menen on eki adam edi.
8 Pavel ma'jilisxanag'a bardı. Ol sol jerde u'sh ay dawamında Qudaydın' Patshalıg'ı tuwralı ta'lim berdi ha'm olardı isendiriwge tırısıp, batıllıq penen so'yledi.
9 Biraq, geybirewleri qasarısıp isenbedi ha'm İysanın' jolın xalıq aldında jamanlay basladı. Sonlıqtan Pavel olardı qaldırıp, sha'kirtlerdi o'zi menen birge aldı da, ha'r ku'ni Tiranustın' mektebinde* ta'lim beriwin dawam etti.
10 Bul awhal eki jılg'a sozıldı. Solay etip, yahudiy bolsın, grek bolsın, Aziya u'lkesinde jasag'an ha'r bir adam İyemizdin' so'zin esitti.
11 Quday Pavel arqalı tan' qalarlıq ka'ramatlar isledi.
12 Ha'tte, Paveldin' denesine tiygen bet oramallar yamasa aljapqıshlar nawqaslarg'a qoyılg'anda, olar da'rtlerinen azat bolıp, ishlerinen jawız ruwxlar shıg'atug'ın edi.
13 El aralap, jawız ruwxlardı quwıp ju'rgen geybir yahudiy duwaxanlar da jawız ruwx urg'an adamlarg'a İyemiz İysanın' atın qollana basladı. Olar: «Pavel ja'riyalap ju'rgen İysanın' atı menen buyıramız, shıg'ıp ket!» – deytug'ın edi.
14 Bas ruwxaniy Skeva atlı bir yahudiydin' jeti ulı da usılay islep ju'rgen edi.
15 Biraq jawız ruwx olarg'a: – İysanı bilemen, Paveldi tanıyman, al sizler kimsiz? – dep juwap berdi de,
16 jawız ruwx urg'an adam olarg'a ta'p berip jıg'ıp, olardan u'stin shıqtı. Olar u'yden jaradar ha'm jalan'ash bolıp qashıp ketti.
17 Bul xabar Efeste jasaytug'ın barlıq yahudiyler menen greklerge jetip bardı. Ha'mmesin qorqınısh biylep, İyemiz İysanın' atı u'lken hu'rmetke eristi.
18 İsengenlerdin' ko'bisi kelip, islegen jaman islerin ashıq moyınladı.
19 Sıyqırshılıq penen shug'ıllanatug'ın ko'p adamlar da kitapların jıynap, ha'mmenin' ko'z aldında jag'ıp jiberdi. Kitaplardın' bahasın esaplag'anda, eliw mın' draxma boldı.
20 Solay etip, İyemizdin' so'zi qu'diret penen jayılıp, ta'siri artıp bardı.
21 Bul waqıyalardan son', Pavel Makedoniya ha'm Axaya u'lkelerinen o'tip, Erusalimge barıwg'a qarar etti. «Ol jerge barg'anımnan son', Rimdi de ko'riwim kerek», – dedi ol.
22 Sonlıqtan o'zi bir neshe waqıt Aziya u'lkesinde qalıp, ja'rdemshilerinen ekewin – Timofey menen Erastustı Makedoniyag'a jiberdi.
23 Sol waqıtları İyemiz İysanın' jolına qarsı ku'shli ko'terilis payda boldı.
24 Dimitriy atlı bir zerger gu'misten Artemida ibadatxanasının' kishkene u'lgilerin sog'ıp, o'z o'nermentshilerine ko'p payda keltiretug'ın edi.
25 Dimitriy o'z o'nermentshileri menen o'zindey zergerlerdi bir jerge jıynap, olarg'a bılay dedi: – Doslar, usı ka'sibimiz arqalı ko'p payda alatug'ınımızdı bilesizler.
26 Biraq Pavel degen mına bir adamnın' qoldan sog'ılg'an qudaylardın' haqıyqıy qudaylar emes ekenin aytıp, tek Efeste emes, al pu'tkil Aziyada ko'p sanlı adamlardı u'gitlep azg'ırg'anın ko'rip ha'm esitip atırsızlar.
27 Bul bizlerdin' o'nerimizdin' qa'dirine qa'wip tuwdırıp qoymay, al ullı hayal quday Artemidanın' ibadatxanasının' arzımaytug'ın na'rsege aylanıp, pu'tkil Aziya u'lkesi menen pu'tkil du'nya sıyınatug'ın hayal qudaydı ullılıg'ınan ayırıw qa'wpi bar.
28 Pu'tkil qala ta'rtipsizlikke tolıp ketti. Adamlar Paveldin' joldasları makedoniyalı Gayus penen Aristarxtı uslap alıp, ha'mmesi birlikte tamasha maydanına qaray umtıldı
29 Pu'tkil qala ta'rtipsizlikke tolıp ketti. Adamlar Paveldin' joldasları makedoniyalı Gayus penen Aristarxtı uslap alıp, ha'mmesi birlikte tamasha maydanına qaray umtıldı.
30 Pavel xalıqtın' arasına barmaqshı boldı, biraq sha'kirtler og'an jol qoymadı.
31 Paveldin' dosları bolg'an Aziya u'lkesinin' ayırım basshıları da og'an xabar jollap, tamasha maydanında ko'rinbewin o'tindi.
32 Jıynalg'anlardın' biri anaw, biri mınaw dep baqırısıp, jıynalıs biyta'rtip boldı. Ko'bisi ne ushın jıynalg'anın da bilmeytug'ın edi.
33 Yahudiyler İskender atlı bir adamdı iyterip ortag'a shıg'arg'anlıqtan, ayırım adamlar bolg'an waqıya ushın onı ayıpker dep sheshti. İskender qolı menen isharat etip, o'zin xalıq aldında qorg'amaqshı boldı.
34 Biraq xalıq onın' yahudiy ekenin bilgende, ha'mmesi bir awızdan shama menen eki saattay: «Efeslilerdin' Artemidası ullı!» – dep baqırıp turdı.
35 Qala xatkeri xalıqtı tınıshlandırıp bılay dedi: – Efesliler! Ullı Artemidanın' aspannan tu'sken mu'sininin' ha'm onın' ibadatxanasının' qorg'awshısı – Efes qalası ekenin kim bilmeydi?
36 Bulardı hesh kim biykarlay almaydı. Sonın' ushın tınıshlanıp, oylanıp is tutıwın'ız kerek.
37 Sizlerdin' bul jerge a'kelgen adamların'ız ibadatxananı da tonamag'an, hayal qudayımızg'a da til tiygizbegen.
38 Sonlıqtan Dimitriydin' ha'm onın' o'nermentshi joldaslarının' birewge qarsı qanday da bir shag'ımı bar bolsa, qazıxanalar ashıq, qazılar da bar. Bir-birinin' u'stinen sol jerde shag'ım etsin.
39 Al eger tag'ı basqa ma'sele bolsa, ol ra'smiy jıynalısta sheshiliwi tiyis.
40 Bu'gingi bolg'an waqıyalar sebepli ayıplanıw qa'wpindemiz. Bunday topalan'dı aqlay alıwg'a bizlerde sebep te joq. Ol usı so'zlerdi aytıp, jıynalg'anlardı tarqatıp jiberdi.
