Elshiler 2 bob
1 Eliwinshi ku'ni bayramı kelgende, iseniwshilerdin' ha'mmesi bir jerge jıynaldı.
2 Tosattan aspannan ku'shli samal eskendey bolıp, bir shawqım esitildi ha'm olar otırg'an u'ydi pu'tkilley toltırıp jiberdi.
3 Ottın' jalını sıyaqlı tillerge uqsag'an bir na'rseler olarg'a ko'rinip, bo'linipbo'linip ha'r birinin' u'stine tu'sti.
4 Olardın' ha'mmesi Muxaddes Ruwxqa tolıp, Ruwxtın' aytqızıwı boyınsha basqa tillerde so'yley basladı.
5 Sol waqıtta Erusalimde du'nyanın' ha'r tu'rli ellerinen kelgen dinshil yahudiyler jasaytug'ın edi.
6 Bul sesti esitip, ko'p xalıq bir jerge jıynaldı. Olardın' ha'r biri o'z tillerinde aytılg'an so'zlerdi esitkenlikten hayran boldı.
7 Ha'mme qattı tan' qalısıp, bılay dedi: – Qaran'lar, bul so'ylep atırg'anlardın' ha'mmesi galilalı emes pe?
8 Onda qalay olardın' bizlerdin' ha'r birimizdin' tuwılg'an jerimizdin' tilinde so'ylep atırg'anın esitip turmız?
9 Aramızda parfiyalılar, midiyalılar, elamiyliler bar. Mesopotamiyada, Yahudiyada ha'm Kapadokiyada, Pontus ha'm Aziyada,
10 Frikiya ha'm Pamfiliyada, Mısır ha'm Liviyanın' Kirenege jaqın u'lkelerinde jasaytug'ınlar bar.
11 O'zleri yahudiy bolg'an ha'm yahudiy dinine o'tken Rimnen kelgen qonaqlar, kritliler ha'm arablar da bar. Biraq bizler Qudaydın' ullı isleri haqqında ha'r birimiz o'z tillerimizde esitip turmız-g'o.
12 Olardın' ha'mmesi an'-tan' bolısıp, bir-birinen: – Bunı qalay tu'siniwge boladı? – dep soradı.
13 Al geybirewleri mısqıllap: – Olar taza sharap iship, ma's bolg'an, – desti.
14 Sonda on bir elshi menen birge Petr ornınan turdı da, ba'lent dawıs penen xalıqqa qarata so'yledi: – Yahudiyler ha'm pu'tkil Erusalim turg'ınları! Men bunı sizlerge tu'sindireyin, so'zlerime qulaq salın'lar.
15 Bul adamlar sizler oylag'anday ma's emes. Sebebi ha'zir azang'ı saat tog'ız-g'o.
16 Biraq bul ko'rip turg'anların'ız İoel payg'ambar arqalı aldın ala aytılg'an edi:
17 «Quday bılay deydi: Son'g'ı ku'nlerde barlıq adamlardın' u'stine O'z Ruwxımdı jawdıraman. Ulların'ız ha'm qızların'ız payg'ambarshılıq etedi. Jasların'ız ayanlar, qartayg'an adamların'ız tu'sler ko'redi.
18 Sol ku'nlerde O'zimnin' er ha'm hayal xızmetshilerimnin' u'stine de, O'z Ruwxımdı jawdıraman, Olar da payg'ambarshılıq etedi.
19 Joqarıda, aspanda tan' qalarlıq na'rseler, To'mende, jer ju'zinde ka'ramatlı belgiler: Qan, ot ha'm burqırag'an tu'tinlerdi ko'rsetemen.
20 İyemizdin' ullı ha'm saltanatlı ku'ni kelmesten aldın, Ku'n qaran'g'ılanadı, ay qang'a aylanadı.
21 Sonda İyemizdin' atın aytıp shaqırg'an ha'r bir adam qutqarıladı».
22 İzraillılar, mına so'zlerge qulaq salın'lar: xabarın'ız bar, Nasıralı İysa Qudaydın' Ol arqalı aran'ızda islegen ka'ramatları, tan' qalarlıq waqıyaları ha'm ka'ramatlı belgileri menen Quday ta'repinen da'lillengen Adam edi.
23 Bul İysa Qudaydın' erki ha'm aldın ala belgilegeni boyınsha, sizlerge uslap berilgen edi. Sizler Onı Qudaydın' Nızamın bilmeytug'ın basqa millet adamlarının' qolı menen atanaq ag'ashqa shegelep o'ltirdin'ler.
24 Al Quday o'lim azabının' tusawların u'zip, Onı tiriltti. O'ytkeni Onı o'limnin' uslap turıwı mu'mkin emes edi.
25 Ol haqqında Dawıt bılay degen: «İyemdi ha'mme waqıt ko'z aldımda ko'rdim, Ol menin' on' jag'ımda bolg'anlıqtan, men albıramayman.
26 Sonlıqtan kewlim quwanıp, tilim shadlanıp so'yleydi. Denem de u'mit ishinde jasaydı.
27 Sebebi Sen janımdı o'liler ma'kanına taslap ketpeysen', O'z Muxaddesin'di shiritip qoymaysan'.
28 Mag'an o'mir jolların u'yrettin', Meni O'z janın'da quwanıshqa bo'leysen'».
29 Tuwısqanlarım! Men sizlerge ullı babamız Dawıt haqqında ashıq ayta alaman: ol o'ldi ha'm jerlendi. Onın' qa'biri bu'ginge deyin usı jerde, bizlerde saqlang'an.
30 Dawıt payg'ambar bolg'anlıqtan, Qudaydın' og'an: «Senin' urpag'ın'nan Birin taxtın'a otırg'ızaman», – dep o'zine ant iship, wa'de bergenin bildi.
31 Sonlıqtan ol keleshekte ne bolatug'ının ko'rip, Masixtın' qayta tiriletug'ını tuwralı bılay degen edi: «Ol o'liler ma'kanına taslap qaldırılmadı, Denesi de shirimedi».
32 Quday usı İysanı o'limnen tiriltti, bug'an bizlerdin' ha'mmemiz gu'wamız.
33 Ol Qudaydın' qu'direti menen aspandag'ı joqarı ha'melge ko'terilip, A'keden wa'de etilgen Muxaddes Ruwxtı aldı. Ha'zir ko'rgenin'iz ha'm esitkenin'iz sıyaqlı, sol Ruwxtı bizlerge jawdırdı.
34 „Dushpanların'dı ayag'ın'nın' astına bastırmag'anımsha, Menin' on' jag'ımda otır“».
35 Dawıt aspang'a ko'terilmegen bolsa da bılay degen edi: «İyem menin' İyeme ayttı:
36 Solay etip, pu'tkil İzrail xalqı anıq bilip qoysın: Quday sizler atanaq ag'ashqa shegelegen sol İysanı ha'm İyemiz, ha'm Masix qıldı.
37 Bunı esitkenlerdin' ju'reklerine qanjar sug'ılg'anday boldı. Olar Petr ha'm basqa elshilerden: – Tuwısqanlar, bizler ne islewimiz kerek? – dep soradı.
38 Petr olarg'a bılay dedi: – Gu'naların'ızdın' keshiriliwi ushın ta'wbe etip, ha'r birin'iz İysa Masixtın' atı menen suwg'a shomıldırılın'lar. Sonda Muxaddes Ruwxtı sıyg'a alasızlar
39 Bul wa'de sizlerge, sizlerdin' balaların'ızg'a ha'm alıstag'ılardın' ha'mmesine, yag'nıy Quday İyemiz shaqırg'an ha'r bir adamg'a berilgen.
40 Petr basqa da ko'p so'zler menen olarg'a gu'walıq berip: – Bul buzıq a'wladtan qutqarılın'lar, – dep o'tinish etti.
41 Onın' so'zin qabıl etkenler suwg'a shomıldırılıp, sol ku'ni olarg'a u'sh mın'g'a shamalas adam qosıldı.
42 Olar o'zlerin elshilerdin' ta'limine bag'ıshlap, bir-biri menen qarımqatnasta boldı ha'm birge nan sındırıp, duwa etetug'ın edi.
43 Elshiler arqalı ko'p tan' qalarlıq na'rseler ha'm ka'ramatlı belgiler ko'rsetilgenlikten, ha'mmeni qorqınısh biyledi.
44 İseniwshilerdin' ha'mmesi birge jıynalıp, ha'mme na'rsesin ortalıqqa qoydı.
45 Malmu'liklerin satıp, ha'r kimnin' mu'ta'jligine qaray u'lestiretug'ın edi.
46 Olar ha'r ku'ni birge İbadatxananın' ha'wlisinde jıynalısıp, u'ylerde nan sındırıstı. Quwanıshlı tu'rde haq kewil menen birge awqatlandı.
47 Qudayg'a maqtawlar aytıp, pu'tkil xalıqtın' alg'ısına bo'lendi. İyemiz de qutqarılg'anlardı olarg'a ku'n sayın qosıp bardı.
