Elshiler 23 bob
1 Pavel joqarg'ı ken'es ag'zalarına dıqqat penen na'zer salıp: – Tuwısqanlarım! Men bu'gingi ku'nge deyin Qudaydın' aldında pa'k hu'jdan menen jasadım, – degende,
2 bas ruwxaniy Xananiya Paveldin' janında turg'anlarg'a onın' awzına urıwdı buyırdı.
3 Sonda Pavel og'an: – Ha'y, eki ju'zli! Seni Quday uradı! Sen meni Muxaddes Nızam boyınsha hu'kim etiw ushın otırsan', biraq Muxaddes Nızamdı buzıp, meni urıwdı buyırıp atırsan', – dedi.
4 Paveldin' qasında turg'anlar: – Qudaydın' bas ruwxaniyin de mazaq etiwge bola ma? – dedi.
5 Pavel bılay dedi: – Tuwısqanlarım, onın' bas ruwxaniy ekenin bilmeytug'ın edim. Sebebi: «O'z xalqın'nın' basshısına jaman so'z aytpa», – dep Muxaddes Jazıwda aytılg'an-g'o.
6 Sonda olardın' bir bo'leginin' saddukeyler, basqa bo'leginin' pariseyler ekenin bilgen Pavel joqarg'ı ken'este ba'lent dawıs penen: – Tuwısqanlarım! Men pariseymen ha'm pariseydin' ulıman. Men o'lilerdin' qayta tiriliwinen u'mit etkenim ushın hu'kim etilip atırman, – dedi.
7 Pavel bunı aytqanda, pariseyler menen saddukeyler arasında ja'njel payda bolıp, jıynalg'anlar ekige bo'lindi.
8 O'ytkeni saddukeyler o'limnen qayta tiriliw de, perishte de, ruwx ta joq, deydi. Al pariseyler bulardın' ha'mmesin ta'n aladı.
9 Solay etip, jıynalısta ku'shli shawqım baslandı. Pariseyler toparınan ayırım diniy mug'allimler orınlarınan turıp: – Bizler bul adamnan hesh qanday ayıp tappay turmız. Eger og'an ruwx yamasa perishte so'ylegen bolsa she? – dep qızıp so'yledi.
10 Ja'njel kem-kemnen ku'sheyip baratırg'anlıqtan, olardın' Paveldi tilkimlep taslawınan qorqqan mın'bası a'skerlerge to'menge tu'siwdi ha'm olardın' arasınan onı ku'sh penen alıp ketip, a'skeriy bo'limge aparıwdı buyırdı.
11 Sol tu'ni İyemiz Pavelge ko'rinip: «Ma'rt bol! Men tuwralı Erusalimde qalay gu'walıq bergen bolsan', Rimde de solay gu'walıq beriwin' tiyis», – dedi.
12 Erten'ine yahudiyler til biriktirip: «Paveldi o'ltirmegenimizshe ishipjesek, bizlerge na'let bolsın», – dep o'z ara ant ishti.
13 Bul til biriktiriwge qatnasqanlardın' sanı qırıqtan aslam edi.
14 Olar bas ruwxaniyler menen aqsaqallarg'a barıp bılay dedi: – «Paveldi o'ltirmegenimizshe awzımızg'a bir tu'yir na'rse alsaq, bizlerge na'let bolsın», – dep qatal tu'rde ant ishtik.
15 Endi sizler joqarg'ı ken'es penen birlikte mın'basıg'a barın' da, o'zlerin'izdi Paveldin' ma'selesin ele de anıg'ıraq tekseretug'ın qılıp ko'rsetip, onı sizlerge alıp keliwin o'tinish etin'ler. Ol ken'eske kelmesten burın bizler onı o'ltiriwge tayar turamız.
16 Biraq Paveldin' jiyeni olardın' til biriktirgenin esitip qalıp, a'skeriy bo'limge bardı da, bul xabardı Pavelge jetkizdi.
17 Pavel ju'zbasılardın' birin janına shaqırıp: – Bul jigitti mın'basıg'a alıp barın', aytatug'ın ga'pi bar eken, – dedi.
18 Ju'zbası jigitti mın'basıg'a alıp keldi de: – Tutqın Pavel meni shaqırıp, mına jigitti sizge aparıwımdı o'tinish etken edi. Onın' sizge aytajaq ga'pi bar eken, – dedi.
19 Mın'bası jigittin' qolınan usladı da, onı shetke shıg'arıp: – Mag'an ne aytpaqshı edin'? – dep soradı.
20 Jigit bılay dep juwap berdi: – Yahudiyler o'z ara til biriktirip, Paveldin' ma'selesin anıg'ıraq tekseriw sıltawı menen, onı erten' joqarg'ı ken'eske alıp keliwin'izdi sizden o'tinish etpekshi.
21 Biraq siz olarg'a qulaq salman'! Sebebi olardın' qırıqtan aslamı onı tasada ku'tpekte. Olar: «Paveldi o'ltirmegenimizshe iship-jesek, bizlerge na'let bolsın!» – dep ant ishti. Endi olar sizin' qayılshılıg'ın'ızdı ku'tip, tayar bolıp turıptı.
22 Mın'bası jigitke: – Bulardı mag'an xabarlag'anın'dı hesh kimge aytpa! – dep tapsırdı da, onı qaytarıp jiberdi.
23 Son'ınan mın'bası ju'zbasılardın' ekewin janına shaqırıp alıp bılay dedi: – Tu'nde, saat tog'ızda Kesariyag'a ketiw ushın, eki ju'z piyada a'sker, jetpis atlı ha'm eki ju'z nayzalı a'sker tayarlan'lar.
24 Paveldi mindirip, onı aman-esen ha'kim Felikske jetkiziw ushın, atlar menen ta'miyinlen'ler.
25 Son'ınan mın'bası to'mendegi xattı jazdı:
26 «Hu'rmetli ha'kim Felikske Klavdiy Lisyastan sa'lem!
27 Yahudiyler bul adamdı uslap alıp o'ltireyin dep atır edi. Biraq men onın' Rim puqarası ekenin bilgenimnen son', a'skerlerim menen jetip barıp, qutqarıp qaldım.
28 Onı ne ushın ayıplap atırg'anın bilmekshi bolıp, yahudiylerdin' joqarg'ı ken'esine alıp bardım.
29 Sonda onın' yahudiylerdin' nızamına baylanıslı tartıslı na'rseler sebepli ayıplanıp atırg'anın anıqladım. Biraq onda o'limge yamasa qamalıwg'a ılayıq hesh qanday ayıp joq.
30 Bul adamg'a qarsı qastıyanshılıq islenejaq ekenligi mag'an xabar etilgende, onı da'rhal sizge jolladım. Onın' ayıplawshılarına da og'an qarsı shag'ımların sizin' aldın'ızda aytıwdı buyırdım».
31 Solay etip, a'skerler o'zlerine berilgen buyrıq boyınsha Paveldi alıp, tu'nde Antipatris degen qalashag'a bardı.
32 Erten'ine olar atlı a'skerlerdi Pavel menen joldı dawam etiw ushın qaldırıp, o'zleri a'skeriy bo'limge qaytıp keldi.
33 Atlı a'skerler Kesariyag'a barıp, xattı ha'kimge berdi de, Paveldi onın' qolına tapsırdı.
34 Ha'kim xattı oqıp, Pavelden qaysı u'lkeden ekenin soradı. Kilikiyalı ekenin bilgende, og'an:
35 «Seni ayıplawshıların' kelgende tın'layman», – dedi de, onın' Hirodtın' sarayında qarawıllanıwın buyırdı.
