Elshiler 24 bob
1 Aradan bes ku'n o'tkennen son', bas ruwxaniy Xananiya ayırım aqsaqallar ha'm Tertulus atlı nızam qa'niygesi bolg'an bir sheshen menen Kesariyag'a kelip, ha'kimge Paveldin' u'stinen shag'ım jasadı.
2 Pavel shaqırılg'anda, Tertulus onı ayıplay basladı: – Ullı ma'rtebeli Feliks! Sizin' arqan'ızda uzaq waqıtlardan beri tınıshlıqta jasap atırmız. Sizin' keleshekti ko're biletug'ının'ız arqalı bul millettin' abadanshılıg'ı rawajlanıp barmaqta.
3 Bizler bunı ha'mme waqıtta, ha'mme jerde u'lken minnetdarshılıq penen moyınlaymız.
4 Biraq sizin' waqtın'ızdı almaw ushın, bizlerdin' aytajaq bir awız so'zimizdi dıqqat penen tın'lawın'ızdı o'tinish etemen.
5 Bizler bul adamdı obaday qa'wipli, du'nya ju'zindegi pu'tkil yahudiyler arasında qozg'alan' ko'teriwshi ha'm «Nasıralılar»* degen azg'ın topardın' jetekshilerinin' biri dep taptıq.
6 Ha'tte, ol İbadatxanamızdı da haramlamaqshı bolg'anda,
7 bizler onı qolg'a aldıq.
8 Siz de onı tergegenin'izde, bizlerdin' onı ne ushın ayıplap atırg'anımızdın' ha'mmesin o'zinen bilip alasız.
9 Yahudiyler de Paveldi ayıplap, aytılg'anlardın' durıs ekenin maqulladı.
10 Ha'kim Paveldin' so'ylewi ushın isharat etkende, Pavel bılay dep juwap berdi: – Sizin' ko'p jıllardan beri bul milletke qazılıq etip kiyatırg'anın'ızdı bilip, o'zimdi sizin' aldın'ızda aqlaytug'ınıma quwanıshlıman.
11 Menin' Erusalimge sıyınıw ushın kelgenime on eki ku'nnen ko'p bolmag'anın o'zin'iz bilip alıwın'ızg'a boladı.
12 Olar menin' ya İbadatxanada, ya ma'jilisxanalarda, ya qalanın' basqa bir jerinde birew menen tartısıp turg'anımdı yamasa xalıqqa qozg'alan' salıp ju'rgenimdi ko'rmedi.
13 Ha'zir de mag'an tag'ıp atırg'an ayıpların sizge da'lillep bere almaydı.
14 Biraq, sizge mınanı moyınlayman: olar «azg'ın topar» dep ataytug'ın jol boyınsha men ata-babalarımnın' Qudayına sıyınıp, Muxaddes Nızamda ha'm payg'ambarlardın' Jazıwlarında aytılg'an ha'r bir na'rsege isenemen.
15 Bul adamlar sıyaqlı men de haq adamlardın' da, gu'nakarlardın' da qayta tiriliwin Qudaydan u'mit etemen.
16 Sonlıqtan da, men Qudaydın' ha'm adamlardın' aldında pa'k hu'jdanlı bolıwg'a ha'mme waqıt tırısaman.
17 Milletime qayır-sadaqa, Qudayg'a qurbanlıqlar beriw ushın, ko'p jıldan son' Erusalimge qaytıp keldim.
18 Men tazalanıw ra'siminen o'tip, usılardı islep atırg'anımda, olar meni İbadatxanada ko'rdi. Sonda menin' qasımda ko'p adam da, shawqım da bolg'an joq.
19 Biraq ol jerde Aziya u'lkesinen kelgen ayırım yahudiyler bar edi. Sizin' aldın'ızda a'ne solar turıp, mag'an tag'atug'ın ayıpları bar bolsa, aytıwları kerek.
20 Ya bolmasa, joqarg'ı ken'estin' aldında turg'anımda, mennen qanday ayıp tapqanın bul jerdegi adamlar aytsın.
21 Men tek olardın' aldında turg'anımda: «O'lilerdin' qayta tiriletug'ınına isengenim ushın, bu'gin men hu'kim etilip atırman», – dep baqırg'an edim.
22 Sonda Feliks İysanın' jolı tuwralı jaqsı bilgenlikten: – Dawın'ızdı mın'bası Lisyas kelgende sheshemen, – dedi de, istin' qaralıwın keyinge qaldırdı.
23 Son'ınan ol ju'zbasıg'a Paveldi qarawıllawdı, biraq erkinlik berip, doslarının' og'an ja'rdemlesiwine tıyım salmawın buyırdı.
24 Bir qansha ku'nnen son', Feliks o'zinin' Druzilla atlı yahudiy hayalı menen birge keldi. Ol Paveldi shaqırtıp alıp, onın' Masix İysag'a iseniw haqqında aytqanların tın'ladı.
25 Pavel haqlıq, o'zin tıyıw ha'm keleshektegi hu'kim haqqında aytqanda Feliks qorqıp ketip: – Ha'zirshe bara ber. Waqıt tapsam, seni ja'ne shaqırtıp alaman, – dedi.
26 Sonın' menen birge, bosatılıwı ushın Paveldin' o'zine para beriwinen u'mit etetug'ın edi. Sonlıqtan onı tez-tez shaqırtıp, onın' menen gu'rrin'lesetug'ın edi.
27 Biraq aradan eki jıl o'tkende, Felikstin' ornına Portsiy Fest keldi. Feliks yahudiylerge jag'ıng'ısı kelgenlikten, Paveldi qamaqta qaldırıp ketti.
