Elshiler 26 bob
1 Agrippa Pavelge: – O'zin'di aqlap so'ylewin'e ruxsat beriledi, – dedi. Sonda Pavel qolın ko'terip isharat etti de, o'zin aqlap so'yley basladı:
2 – Patsha Agrippa! Yahudiylerdin' mag'an tag'ıp atırg'an barlıq ayıplarına qarsı bu'gin o'zimdi sizin' aldın'ızda aqlap atırg'anım ushın baxtiyarman, dep esaplayman.
3 Sebebi a'sirese siz yahudiylerdin' u'rpa'detlerin ha'm tartıslı ma'selelerin jaqsı bilesiz. Sonlıqtan meni sabırlılıq penen tın'lawın'ızdı o'tinish etemen.
4 Da'slep o'z elimde, son'ınan Erusalimde jaslıg'ımnan beri qalay o'mir su'rgenimdi pu'tkil yahudiyler biledi.
5 Olar meni ko'p waqıttan beri tanıydı ha'm eger qa'lese, dinimizdin' en' qatal bag'ıtı boyınsha parisey bolıp jasag'anım tuwralı gu'walıq bere aladı.
6 Endi bolsa, Qudaydın' atababalarımızg'a bergen wa'desinen u'mit etkenim ushın, men usı jerde turıp, hu'kim etilip atırman.
7 Bizin' on eki urıwımız ku'ni-tu'ni Qudayg'a bar ıqlası menen xızmet etip, bul wa'denin' orınlanıwınan u'mit etedi. O, patsham! Meni yahudiyler, mine, usı u'mit sebepli ayıplamaqta.
8 Qudaydın' o'lilerdi tiriltiwin sizler nege isenip bolmaytug'ın na'rse, dep esaplaysızlar?
9 Haqıyqatında men de Nasıralı İysanın' atına qarsı qolımnan kelgen ha'mme na'rseni islewim kerek, dep oylaytug'ın edim.
10 Men bunı Erusalimde isledim de. Bas ruwxaniylerden alg'an biylik penen iseniwshilerdin' ko'bisin qamaqqa saldırdım. Olarg'a o'lim jazası beriliwi ushın dawıs beretug'ın edim.
11 Ma'jilisxanama-ma'jilisxana ju'rip, olardı tez-tez jazalap, İysag'a til tiygiziwge ma'jbu'rleytug'ın edim. Olarg'a qa'ha'rli bolg'anım sonshelli, ha'tte, olardı jat qalalarda da quwdaladım.
12 Bir ma'rte men bas ruwxaniylerden biylik ha'm tapsırma alıp, Damaskqa qaray jolg'a shıqtım.
13 O, patsham! Tal tu'ste jolda baratırg'anımda, aspannan tu'sip, menin' ha'm joldaslarımnın' a'tirapın jarqıratıp jibergen quyashtın' sa'wlesinen de jarıq bir nur ko'rdim.
14 Ha'mmemiz jerge jıg'ılg'anımızda, bir dawıstın' mag'an evrey tilinde so'ylegenin esittim: «Saul, Saul, sen nege Meni quwdalap atırsan'? Qudayg'a qarsı tursan', o'zin'e zıyan boladı».
15 «İyem, Sen kimsen'?» – dep soradım men. İyemiz juwap berip bılay dedi: «Men – sen quwdalap atırg'an İysaman.
16 Qa'ne, tikeyip, ornın'nan tur! Meni ko'rgenin' ha'm Menin' sag'an ko'rsetejaq na'rselerim haqqında gu'walıq beriwin' ushın, ja'ne de, seni O'z xızmetime tayınlaw ushın sag'an ko'rindim. Sen ko'rgenlerin' ha'm sag'an ko'rsetejaq na'rselerim haqqında gu'walıq beresen'.
17 Men seni o'z xalqın'nın' ha'm basqa milletlerdin' qolınan qutqaraman.
18 Basqa milletlerdin' ko'zlerin ashıp, olardı qaran'g'ılıqtan jaqtıg'a, shaytannın' qolı astınan Qudayg'a aparıw ushın seni olarg'a jiberip atırman. Solay etip, olardın' gu'naları keshirilip, Mag'an degen isenimleri menen muxaddes adamlardın' arasınan u'les alsın».
19 Sonlıqtan, patsha Agrippa, aspannan berilgen ayang'a bag'ınbay tura almadım.
20 Da'slep Damask, son'ınan Erusalim ha'm pu'tkil Yahudiya u'lkesindegi yahudiylerge, ja'ne basqa milletlerge de ta'wbe etip Qudayg'a qaytıwdı ha'm ta'wbege ılayıq isler islewdi ja'riyalap ju'rdim.
21 Yahudiylerdin' meni İbadatxanada uslap, o'ltirmekshi bolg'anının' sebebi usı.
22 Biraq bu'gingi ku'nge deyin mag'an Quday ja'rdem berip kelmekte. Sonlıqtan u'lken-kishi, ha'mmege gu'walıq berip, usı jerde turman. Menin' aytıp turg'anlarım payg'ambarlardın' ha'm Muwsanın' boljap aytqanlarınan basqa emes.
23 Olar Masixtın' azap shegetug'ının ha'm birinshi bolıp o'limnen tiriletug'ının, O'z xalqına ha'm basqa milletlerge nur haqqında ja'riyalaytug'ının bildirgen edi.
24 Pavel usı ta'rizde o'zin aqlap turg'anda, Fest ba'lent dawıs penen: – Pavel, senin' esin' durıs emes! Ko'p oqıg'anın' seni aqılın'nan azdırıptı! – dedi.
25 Pavel bılay dedi: – Esim durıs, hu'rmetli Fest! Menin' so'zlerim haqıyqatqa ha'm aqılg'a say.
26 Patsha bul na'rseler haqqında jaqsı bilgenlikten, men onın' menen erkin so'ylesip turman. Bulardın' hesh birinin' onın' dıqqatınan shette qalmag'anına isenemen. O'ytkeni bul bir shette bolg'an joq.
27 Patsha Agrippa! Siz payg'ambarlardın' so'zlerine isenesiz be? Bilemen, isenesiz.
28 Sonda Agrippa Pavelge: – Meni az-maz waqıttın' ishinde ko'ndirip, masixıy qılmaqshımısan'? – dedi.
29 – Az bolsın, ko'p bolsın, tek siz emes, al bu'gin meni tın'lap otırg'anlardın' ha'mmesi mına shınjırlarsız men sıyaqlı bolıwın Qudaydan tileymen, – dedi Pavel.
30 Sonda patsha, ha'kim, Vernika ha'm olar menen otırg'anlar orınlarınan turdı.
31 Olar sırtqa shıg'ıp, o'z ara: «Bul adam o'limge yamasa qamalıwg'a ılayıq hesh na'rse islemegen», – desti.
32 Agrippa Festke: «Eger bul adam Rim patshası-Qaysardın' hu'kimin talap etpegende, onı azat qılıwg'a bolar edi», – dedi.
