Elshiler 27 bob
1 İtaliyag'a keme menen ketiwge qarar etkenimizde, Pavel menen basqa ayırım tutqınlar Avgust a'skeriy bo'liminen bolg'an Yuliy atlı bir ju'zbasıg'a tapsırıldı.
2 Aziya u'lkesinin' jag'alarındag'ı jag'ıslarg'a baratug'ın Adramittin' kemesine minip, bizler jolg'a shıqtıq. Janımızda Salonikadan kelgen makedoniyalı Aristarx ta bar edi.
3 Erten'ine Sidong'a jetip keldik. Yuliy Pavelge adamgershilik islep, onın' o'z mu'ta'jliklerine ja'rdem alıwı ushın, doslarına barıp keliwine ruxsat etti.
4 Ol jerden keme menen ja'ne jolg'a shıqtıq. Samal qarsı aldımızdan esip turg'anlıqtan, Kipr atawının' ıq jag'ı menen ju'rdik.
5 Kilikiya ha'm Pamfiliya u'lkelerinin' qarsı aldındag'ı ten'izden o'tip, Likiyanın' Mira qalasına keldik.
6 Ju'zbası sol jerde İtaliyag'a baratug'ın İskenderiyadan kelgen kemeni tawıp, bizlerdi og'an mingizdi.
7 Ko'p ku'n boyı a'ste-aqırın ju'zip, zorg'a degende Knidosqa jetip bardıq. Samalg'a qarsı ju'ziw qıyın bolg'anlıqtan, Krit atawının' ıq jag'ı menen Salmon qalasının' qasınan o'ttik.
8 Jag'a boylap zordan ju'zip, Laseya qalasının' qasındag'ı «Go'zzal jag'ıs» degen jerge keldik.
9 Bizler ko'p waqıttı sarp etip aldıq. Ha'tte, yahudiylerdin' oraza ku'nleri de o'tip ketkenlikten, endi ju'ziw qa'wipli edi. Sonlıqtan Pavel olarg'a eskertip:
10 – Adamlar! Bul jolımız tek ju'k ha'm keme ushın emes, al janlarımız ushın da ju'da' qa'wip-qa'terli bolatug'ının ko'rip turman, – dedi.
11 Biraq ju'zbası Paveldin' so'zlerinen go're, keme aydawshısı menen kemenin' xojayınının' so'zine qulaq astı.
12 Jag'ıs qıslawg'a qolaylı bolmag'anlıqtan, kemedegilerdin' ko'bisi jolg'a shıg'ıwdı ha'm ilajı bolsa Fenikske jetip, qıstı sol jerde o'tkiziwdi sheshti. Feniks – qubla-batıs ha'm arqa-batıs ta'replerge qarag'an, Kritte jaylasqan bir jag'ıs edi.
13 Qubladan jumsaq samal ese baslag'anda, olar o'z maqsetimizge jettik dep oylap, ko'shkini ko'terdi de, Krittin' jag'ası menen ju'zip ketti.
14 Biraq ko'p o'tpey, ataw ta'repten «Arqa-shıg'ıs» dep atalatug'ın dawıl bastırıp keldi.
15 Keme dawıl ta'repinen iskenjege alınıp, samalg'a qarsı tura alatug'ın ku'shimiz bolmag'anlıqtan, bizler ta'slim bolıp kete berdik.
16 «Kavda» dep atalatug'ın bir kishi atawdın' ıq jag'ına jetkenimizde, kemenin' qayıg'ın zorg'a degende saqlap u'lgerdik.
17 Kemeshiler qayıqtı joqarıg'a tartıp shıg'arıp, kemeni arqan menen bekkem etip baylap qoydı. Liviya jag'asının' qayır jerlerine tiyiwden qorqıp, jelqomdı tu'sirdi de, ıg'ıp kete berdi.
18 Dawıl bizlerdi qattı qıynag'anlıqtan, olar erten'ine kemeden ju'k ılaqtıra basladı.
19 U'shinshi ku'ni kemenin' qural-saymanların da o'z qolları menen ten'izge ılaqtırdı.
20 Ko'p ku'n boyı quyash ta, juldızlar da ko'rinbedi. Dawıl ele qa'ha'rli bolg'anlıqtan, aqırında aman qalıwdan u'mitimizdi pu'tkilley u'zdik.
21 Adamlar ko'p waqıttan beri hesh na'rse jemegen edi. Sonda Pavel ortag'a shıg'ıp bılay dedi: – Adamlar! Mag'an qulaq asıp, Kritten shıqpag'anın'ızda, bunday qa'wip-qa'ter menen shıg'ıng'a ushıramag'an bolar edik.
22 Biraq endi sizlerdi ma'rt bolıwg'a shaqıraman. Tek keme g'ana apatqa ushırap, aran'ızda hesh bir jan nabıt bolmaydı.Adamlar ko'p waqıttan beri hesh na'rse jemegen edi. Sonda Pavel ortag'a shıg'ıp bılay dedi: – Adamlar! Mag'an qulaq asıp, Kritten shıqpag'anın'ızda, bunday qa'wip-qa'ter menen shıg'ıng'a ushıramag'an bolar edik.
23 Sebebi men tiyisli bolıp, xızmet etip ju'rgen Qudaydın' bir perishtesi o'tken tu'ni janıma kelip,
24 bılay dedi: «Qorqpa Pavel! Sen Rim patshası-Qaysardın' aldına barıwın' tiyis. Ja'ne Quday senin' menen saparlas bolg'anlardın' ha'mmesin sag'an bag'ıshladı».
25 Sonlıqtan, adamlar, ma'rt bolın'lar! Men Qudayg'a isenemen: mag'an ne aytılsa, sol boladı.
26 Bizler bir atawg'a ıg'ızılıp aparılıwımız tiyis.
27 Dawıldın' baslang'anına on to'rt ku'n bolg'anda, bizler Adriya ten'izinde ıg'ıp ju'r edik. Shama menen tu'nnin' yarımında kemeshiler qanday da bir qurg'aqlıqqa jaqınlasqanın shamaladı.
28 Sonda olar ten'izdin' teren'ligin o'lshep, jigirma qulash ekenin bildi. Az-maz waqıttan son' ja'ne o'lshep ko'rgende, on bes qulash ekenin ko'rdi.
29 Suwdın' astındag'ı jartasqa urılıwımızdan qorqıp, olar kemenin' art betinen to'rt ko'shki ılaqtırdı da, tan'nın' tezirek atıwın tilep, duwa etti.
30 Kemeshiler kemeden qashpaqshı bolıp, aldın'g'ı ta'repten ko'shki taslawdı sıltawladı da, qayıqtı ten'izge tu'sire basladı.
31 Biraq Pavel ju'zbası menen a'skerlerge: – Bular kemede qalmasa, sizlerge aman qalıw joq, – dedi.
32 Sonda a'skerler qayıqtın' arqanların kesip, onı ten'izge tu'sirip jiberdi.
33 Tan' atayın dep turg'anda, Pavel ha'mmeni awqat jewge u'gitlep: – Hesh na'rse jemey awqatsız qalıp ku'tkenin'izge bu'gin on to'rt ku'n boldı.
34 Sonlıqtan awqat jep alıwın'ızdı o'tinish etemen. Bul aman qalıwın'ız ushın za'ru'r. Hesh qaysısın'ızdın' bir tal shashın'ız da nabıt bolmaydı, – dedi.
35 Pavel usılardı aytıp bolıp nandı aldı da, ha'mmenin' aldında Qudayg'a shu'kirlik bildirip, nandı bo'lip jey basladı.
36 Sonda ha'mme jigerlenip, awqat jedi.
37 Kemede barlıg'ımız bolıp eki ju'z jetpis altı jan edik.
38 Awqatqa toyıp bolg'annan son', olar biydaydı ten'izge to'gip, kemeni jen'illetti.
39 Tan' atqanda, kemeshiler o'zleri kelgen jerdi tanımadı. Biraq jag'ası qumlıq bolg'an bir qoltıqtı ko'rip qalıp, mu'mkin bolsa, kemeni sol jerge aparıp toqtatıwdı uyg'ardı.
40 Ko'shkilerdin' arqanların kesip, ten'izge tasladı da, rullerdi baylag'an arqanlardı sheshti. Aldın'g'ı jelqomdı samal ta'repke ko'terip, jag'ag'a qaray ju'zip ketti.
41 Biraq keme bir qumlı sayız jerge tap bolıp, tumsıg'ı qumg'a battı da, qıymıldamay qaldı. Al artqı jag'ı ku'shli tolqınlar ta'repinen soqqılanıp, sınıp ketti.
42 Tutqınlar ju'zip qashıp ketedi dep oylap, a'skerler olardı o'ltirmekshi boldı.
43 Biraq ju'zbası Paveldi qutqarg'ısı kelip, a'skerlerge bul niyetin iske asırıwg'a tıyım saldı. Son'ınan ju'zip biletug'ınlarg'a birinshi bolıp o'zlerin ten'izge atıp, jag'ag'a shıg'ıwların buyırdı.
44 Al qalg'anları bolsa, kimisi taxtay, kimisi kemenin' sınıq bo'leklerinen uslap, olardın' izlerinen jetip bardı. Solay etip, ha'mmesi aman-esen jag'ag'a shıqtı.
