Elshiler 6 bob
1 Masixtın' sha'kirtlerinin' sanı o'sip atırg'an sol ku'nlerde grekshe so'yleytug'ın iseniwshi yahudiyler ta'repinen evreyshe so'yleytug'ın iseniwshi yahudiylerge qarsı narazılıq payda boldı. Sebebi ku'ndelikli ja'rdem bo'listirilgende, olardın' jesirlerine kewil awdarılmaytug'ın edi.
2 Sonda on eki elshi ha'mme sha'kirtlerdi bir jerge jıynap: – Qudaydın' so'zin ja'riyalaw isin taslap, dasturxan basında xızmet etkenimiz durıs bolmas.
3 Tuwısqanlarım! Aran'ızda jaqsı atı shıqqan, Muxaddes Ruwx penen danalıqqa tolg'an jeti adamdı tan'lan'lar. Olarg'a usı isti tapsırayıq.
4 Al bizler o'zlerimizdi duwa etiwge ha'm Qudaydın' so'zin ja'riyalawg'a bag'ıshlayıq, – dedi.
5 Bul so'z pu'tkil ja'ma'a'tke unadı. Olar isenimi ku'shli ha'm Muxaddes Ruwxqa tolı bolg'an Stepandı, ja'ne de Filipti, Proxordı, Nikanordı, Timondı, Parmendi ha'm yahudiy dinine o'tken antioxiyalı Nikolastı saylap,
6 elshilerdin' aldında turg'ızdı. Elshiler duwa etip, olardın' u'stilerine qolların qoydı.
7 Solay etip, Qudaydın' so'zi jayılıp, Erusalimdegi sha'kirtlerdin' sanı ko'beye berdi. Ruwxaniylerdin' ko'bisi de elshilerdin' ta'limin qabıl alıp, isene basladı.
8 Qudaydın' miyrimi menen qu'diretine tolı bolg'an Stepan xalıq arasında ullı tan' qalarlıq na'rseler ha'm ka'ramatlı belgiler ko'rsetetug'ın edi.
9 Degen menen, kireneli, iskenderiyalı ha'm Kilikiya menen Aziyadan bolg'an adamlardın' «Erkinler ma'jilisxanası» degen ma'jilisxananın' ayırım ag'zaları Stepang'a qarsı shıg'ıp, onın' menen tartısa basladı.
10 Biraq ol danalıq ha'm Muxaddes Ruwx penen so'ylegenlikten, olar qarsı tura almadı.
11 Sonda olar bir neshe adamdı u'gitlep: «Onın' Muwsag'a ha'm Qudayg'a til tiygizgenin esittik», – dep aytqızdı.
12 Solay etip, olar xalıqtı, aqsaqallardı ha'm diniy mug'allimlerdi o'shegistirip, bas salıp Stepandı usladı da, onı joqarg'ı ken'estin' aldına alıp keldi.
13 Olar a'kelgen jalg'an gu'walar: – Mına adam İbadatxanag'a ha'm Muwsanın' Nızamına u'zliksiz qarsı so'ylep ju'r.
14 Bizler onın': «Nasıralı İysa İbadatxananı joq qıladı, Muwsanın' bizlerge bergen u'rp-a'detlerin o'zgertedi», – degenin esittik, – dedi.
15 Joqarg'ı ken'este otırg'anlardın' ha'mmesi Stepannın' ju'zine tigilip qarap, onın' ju'zinin' perishtenin' ju'zine uqsas ekenin ko'rdi.
