Elshiler 8 bob
1 Stepannın' o'ltiriliwin Saul da maqullag'an edi. Sol ku'nnin' o'zinde-aq, Erusalimdegi iseniwshiler ja'ma'a'tine qarsı ku'shli quwdalaw baslandı. Elshilerden basqa iseniwshilerdin' ha'mmesi Yahudiya menen Samariya u'lkelerinin' ha'mme jerleri boylap tarqap ketti.
2 Ayırım iseniwshi adamlar Stepandı jerlep, onı qattı azaladı.
3 Biraq Saul iseniwshiler ja'ma'a'tine qattı azap berdi. Ol u'yme-u'y kirip, erkek pe, hayal ma, ha'mmesin su'yrep shıg'arıp, qamaqqa saldırdı.
4 Al tarqalıp ketken iseniwshiler el aralap, Qudaydın' so'zin ja'riyalap ju'rdi.
5 Filip Samariyanın' bir qalasına kelip, ol jerdegilerge Masix haqqında ja'riyaladı+.
6 Filiptin' so'zin esitken ha'm ol ko'rsetken ka'ramatlı belgilerdi ko'rgen xalıq onın' so'zlerin dıqqat penen tın'ladı.
7 O'ytkeni jin urg'an ko'p adamlardan jawız ruwxlar qıshqırısıp shıg'ıp, ko'plegen la'n' ha'm aqsaq bolg'anlar shıpa tabatug'ın edi.
8 Solay etip, sol qala u'lken quwanıshqa bo'lendi.
9 Sol qalada ko'p waqıtlardan beri sıyqırshılıq penen shug'ıllanatug'ın, Samariya xalqın tan' qaldırıp kiyatırg'an ha'm o'zin ullı adam dep esaplaytug'ın Simon atlı bir adam bar edi.
10 En' qarapayım adamlardan baslap en' abıraylı adamlarg'a deyin, ha'mmesi onı dıqqat penen tın'lap: «Onda ullı qu'diret dep atalatug'ın Qudaydın' qu'direti bar», – deytug'ın edi.
11 Simon olardı ko'p waqıtlardan beri sıyqırshılıq penen tan' qaldırıp kiyatırg'anlıqtan, onı ha'mme tın'laytug'ın edi.
12 Biraq olar Qudaydın' Patshalıg'ı ha'm İysa Masixtın' atı haqqında Xosh Xabardı ja'riyalag'an Filiptin' so'zlerine isengende, erkekler de, hayallar da suwg'a shomıldırıldı.
13 Simonnın' o'zi de isenip suwg'a shomıldırılg'annan son', Filiptin' janınan ayırılmadı. Ko'rsetilgen belgiler ha'm ullı ka'ramatlardı ko'rip, ol tan' qaldı.
14 Erusalimdegi elshiler samariyalılardın' Qudaydın' so'zin qabıl etkenin esitip, olarg'a Petr menen Yuxandı jiberdi.
15 Ekewi sol jerge barıp, samariyalı iseniwshilerdin' Muxaddes Ruwxtı alıwı ushın duwa etti.
16 Sebebi ele olardın' hesh qaysısına Muxaddes Ruwx tu'spegen bolıp, olar tek İyemiz İysanın' atı menen suwg'a shomıldırılg'an edi.
17 Petr menen Yuxan olardın' u'stilerine qolların qoyıp duwa etkende, olar Muxaddes Ruwxtı aldı.
18 Elshilerdin' bul qol qoyıw ha'reketi menen Muxaddes Ruwx berilgenin ko'rgen Simon olarg'a aqsha usınıp:
19 – Mag'an da usınday qu'diret berin'ler, men kimnin' u'stine qollarımdı qoysam da, ol Muxaddes Ruwxtı qabıl qılatug'ın bolsın, – dedi.
20 Biraq Petr og'an bılay dedi: – Qudaydın' sıyın aqshag'a satıp alıwdı oylag'anın' ushın, aqshan' o'zin' menen birge qurıp ketsin.
21 Bul iste senin' payın' da, u'lesin' de joq. O'ytkeni kewlin' Quday aldında haq emes.
22 Endi bul jawız niyetin' ushın ta'wbe etip, İyemizge jalbarın! Mu'mkin, kewlin'degi bul niyetti Ol keshirer.
23 Sebebi senin' ashshı qızg'anıshqa tolı ekenin'di ha'm jamanlıqtın' shırmawında ekenin'di ko'rip turman.
24 Simon juwap berip: – Men ushın İyen'izge sizler duwa etin'ler, aytqanların'ızdın' hesh biri basıma tu'spesin, – dedi.
25 Petr menen Yuxan İyemizdin' so'zi haqqında gu'walıq berip aytqannan son', Samariyanın' ko'p awıllarında Xosh Xabardı ja'riyalap, Erusalimge qayttı.
26 Sonda İyemizdin' bir perishtesi Filipke bılay dedi: – Ornın'nan turıp, qubla ta'repke, Erusalimnen Gazag'a baratug'ın sho'l jolına bar.
27 Filip ornınan turıp, jolg'a shıqtı. Sol waqıtta Efiopiyanın' hayal patshası Kandakiyanın' wa'zirlerinen biri, onın' barlıq qaznasın basqaratug'ın bir aqta sıyınıw ushın Erusalimge barıp,
28 sol jol menen qaytıp kiyatır edi. Ol arbasında İyshaya payg'ambardın' kitabın oqıp otırg'an edi.
29 Muxaddes Ruwx Filipke: – Barıp, sol arbag'a jaqınlas, – dedi.
30 Filip juwırıp arbanın' qasına barg'anda, onın' İyshaya payg'ambardın' kitabın oqıp otırg'anın esitip: – Ne oqıp otırg'anın'dı tu'sinesen' be? – dep soradı.
31 Efiopiyalı: – Birew mag'an jol-jorıq ko'rsetpese, qalay tu'sine alaman, – dedi de, Filipten arbag'a minip otırıwdı o'tinish etti.
32 Ol Muxaddes Jazıwdın' mına jerin oqıp otırg'an edi: «Ol qoy sıyaqlı bawızlanıwg'a alıp barıldı, Ju'n qırqıwshının' aldında qozı qalay u'ndemey tursa, Ol da solay awzın ashpadı.
33 Ol xorlanıp, a'dil hu'kim alıwdan juda boldı. Onın' urpaqların kim tilge aladı? O'ytkeni Onın' bul du'nyadag'ı o'miri tawsıldı».
34 Wa'zir Filipten: – O'tinemen, mag'an aytshı: payg'ambar kim tuwralı aytıp atır? O'zi tuwralı ma yamasa basqa birew tuwralı ma? – dep soradı.
35 Sonda Filip Muxaddes Jazıwdın' usı jerinen baslap, İysa haqqında Xosh Xabardı og'an aytıp berdi.
36 Olar jol ju'rip kiyatırg'anda, suw bar jerge keldi. – Mine, bul jerde suw bar-g'o, suwg'a shomıldırılıwıma ne tosqınlıq qıladı? – dedi wa'zir.
37 Son'ınan arbanı toqtatıwdı buyırdı.
38 Filip penen ekewi suwg'a tu'sti ha'm ol Filiptin' qolınan suwg'a shomıldırıldı.
39 Olar suwdan shıqqanda, İyemizdin' Ruwxı Filipti birden alıp ketip, wa'zir onı qaytıp ko'rmedi. Solay bolsa da, ol quwanıshlı tu'rde jolın dawam etti.
40 Al Filip Azot qalasında payda boldı. Ol Kesariyag'a barg'ansha barlıq qalalardı aralap, Xosh Xabardı ja'riyalap ju'rdi.
