Elshiler 9 bob
1 Al Saul İyemizdin' sha'kirtlerine ele o'lim qa'wpin tuwdırıp ju'rdi. Ol bas ruwxaniyge bardı da,
2 Damasktag'ı ma'jilisxanalarg'a xatlar jazıp beriwin soradı. Sol jerde İysanın' jolı menen ju'rgen erkek bolsın, hayal bolsın, tapsa olardı uslap, Erusalimge alıp keliw niyetinde edi.
3 Ol jol ju'rip Damaskqa jaqınlag'anda, tosattan aspannan tu'sken bir nur onın' a'tirapın jarqıratıp jiberdi.
4 Saul jerge jıg'ılıp: – Saul, Saul, sen nege Meni quwdalap atırsan'? – degen dawıstı esitti.
5 Saul: – Sen kimsen', İyem? – dep soradı. – Men – sen quwdalap atırg'an İysaman.
6 Al endi ornın'nan turıp, qalag'a bar. Neni islew tiyis ekenligin' sag'an aytıladı, – degen dawıs esitildi.
7 Saul menen kiyatırg'anlardın' tilleri tutılıp, toqtap qaldı. Sebebi olar dawıstı esitse de, hesh kimdi ko'rmegen edi.
8 Saul jerden turdı. Biraq ko'zlerin ashqanda, hesh na'rse ko're almadı. Sonlıqtan olar onın' qolınan uslap, Damaskqa jeteklep apardı.
9 Onın' ko'zleri u'sh ku'n boyı ko'rmey qalıp, hesh na'rse iship jemedi.
10 Damaskta Xananiya atlı İysanın' sha'kirti bar edi. İyemiz og'an ko'rinip: – Xananiya, – dedi. – Usı jerdemen, İyem, – dep juwap berdi ol.
11 İyemiz og'an: – Ornın'nan tur da, «Tuwrı ko'she» degen ko'shege barıp, Yahudanın' u'yindegi Saul atlı bir tarsuslı adamdı sora. Ol ha'zir duwa etip atır.
12 Ol o'zine ko'rsetilgen ayanda janına Xananiya atlı bir adamnın' kelip, ko'zlerinin' qaytadan ko'riwi ushın u'stine qolların qoyıp duwa etkenin ko'rgen edi, – dedi.
13 Xananiya juwap berip: – İyem! Bul adamnın' Senin' Erusalimdegi muxaddeslerin'e qansha jamanlıq islegenin men ko'p adamlardan esitken edim.
14 Bul jerge de ol Senin' atın'a sıyınatug'ınlardın' ha'mmesin tutqıng'a alıw ushın, bas ruwxaniylerden biylik alıp kelgen, – dedi.
15 İyemiz og'an: – Bar! O'ytkeni Men bul adamdı atımdı basqa milletlerge, patshalarg'a ha'm İzrail ullarına jetkiziw ushın tan'ladım.
16 Menin' atım ushın qanshama azap shegetug'ının O'zim og'an ko'rsetemen, – dedi.
17 Solay etip, Xananiya bardı da, sol u'yge kirdi ha'm qolların Sauldın' u'stine qoyıp: – Tuwısqanım, Saul! Sag'an kiyatırg'an jolın'da ko'ringen İyemiz İysa ko'zlerin'nin' ashılıp, Muxaddes Ruwxqa tolıwın' ushın meni jiberdi, – dedi.
18 Sol waqıtta-aq ko'zlerinen perde tu'skendey bolıp, Saul ja'ne ko're basladı. Ol ornınan turıp, suwg'a shomıldırıldı ha'm
19 awqat jep, ku'shke endi. Saul bir neshe ku'n Damasktag'ı sha'kirtlerdin' janında qaldı.
20 Ol da'rhal İysanın' Qudaydın' Ulı ekenligin ma'jilisxanalarda ja'riyalay basladı.
21 Onı esitkenlerdin' ha'mmesi tan' qalısıp: «Mınaw Erusalimde usı İysanın' atına sıyınatug'ınlardı qırg'an adam emes pe? Ol bul jerge de sonday adamlardı tutqın etip, bas ruwxaniylerge aparıw ushın kelgen joq pa edi?» – desti.
22 Biraq Saul ku'nnen-ku'nge ruwxıy ku'shke tolısıp bardı. İysanın' Masix ekenligi haqqında da'liller keltirip, Damaskta jasaytug'ın yahudiylerdi tan' qaldıratug'ın edi.
23 Aradan ko'p ku'nler o'tkende, yahudiyler Sauldı o'ltiriwge til biriktirdi.
24 Biraq, olardın' bul niyeti Saulg'a belgili bolıp qaldı. Yahudiyler onı o'ltiriw ushın ku'ni-tu'ni qalanın' da'rwazasın an'lıdı.
25 Degen menen, Sauldın' sha'kirtleri bir ku'ni tu'nde onı sebetke saldı da, qalanın' diywalınan tu'sirip jiberdi.
26 Saul Erusalimge kelip, sol jerdegi sha'kirtlerge qosılıwg'a tırıstı. Biraq onın' İysanın' sha'kirti bolg'anına isenbey, olardın' ha'mmesi onnan qorqatug'ın edi.
27 Sonda Barnaba onı elshilerge ertip keldi. Ol Sauldın' jolda İyemizdi qalay ko'rgenin, İyemizdin' onın' menen so'yleskenin ha'm onın' Damaskta qalay İysanın' atı menen batıl tu'rde waz aytqanın olarg'a aytıp berdi.
28 Solay etip, Saul Erusalimde olar menen birge aralasıp, İyemizdin' atı menen qorqpastan waz aytıp ju'rdi.
29 Ol grekshe so'yleytug'ın yahudiyler menen so'ylesip, tartısatug'ın edi. Al olar Sauldı o'ltiriwge ha'reket etti.
30 Tuwısqanlar bunı bilgende onı Kesariyag'a aparıp, sol jerden Tarsusqa jiberdi.
31 Solay etip, pu'tkil Yahudiya, Galila ha'm Samariya boylap iseniwshiler tınıshlıqqa eristi. İyemizden qorqıp jasag'an ja'ma'a't bekkemlenip, Muxaddes Ruwxtın' qollap-quwatlawı menen sanı o'se berdi.
32 Sonda Petr el aralap ju'rip, Liddada jasaytug'ın iseniwshilerdi ko'riwge keldi.
33 Ol sol jerde la'n' bolıp segiz jıldan beri to'sek tartıp jatırg'an Eney atlı bir adamdı ko'rdi.
34 Petr og'an: – Eney, İysa Masix sag'an shıpa beredi. Ornın'nan turıp, to'segin'di jıyna, – dedi. Eney sol waqıtta-aq ornınan turdı.
35 Lidda ha'm Sharonda jasaytug'ınlardın' derlik ha'mmesi bunı ko'rip, İyemizdin' jolına tu'sti.
36 Yaffada İysanın' sha'kirti bolg'an Tavita atlı bir hayal bar edi. Tavita – grekshe «Dorkas», yag'nıy «kiyik» degendi an'latadı. Ol ha'mme waqıt jaqsılıq islep, jarlılarg'a qayır-sadaqa beretug'ın edi.
37 Sol ku'nleri Tavita awırıp, qaytıs boldı. Adamlar onın' denesin juwıp, joqarıdag'ı bo'lmege qoydı.
38 Lidda Yaffag'a jaqın bolg'anlıqtan, Petrdin' sol jerde ekenin esitken sha'kirtler og'an eki adamdı jiberip: «Tezirek bizlerge kel», – dep o'tinish etti.
39 Petr ornınan turıp, olar menen birge ketti. U'yge kelgende, onı joqarıdag'ı bo'lmege alıp bardı. Barlıq jesir hayallar Petrdin' a'tirapına jıynaldı. Olar jılap turıp, Dorkastın' o'zleri menen birge jasag'an waqtında tikken ishki kiyimleri menen ko'yleklerin og'an ko'rsetti.
40 Petr ha'mmeni sırtqa shıg'arıp jiberdi de, dize bu'gip, duwa etti. Son'ınan o'lige burılıp: – Tavita, ornın'nan tur! – dedi. Hayal ko'zlerin ashtı da, Petrdi ko'rip, tikeyip otırdı.
41 Petr qolın berip, onı ornınan turg'ızdı. Son'ınan iseniwshiler menen jesir hayallardı shaqırdı da, tirilgen Tavitanı olarg'a ko'rsetti.
42 Bul waqıya tuwralı xabar pu'tkil Yaffag'a ma'lim bolıp, ko'p adamlar İyemizge isendi.
43 Petr ko'p ku'n Yaffada, Simon atlı teri iylewshinin' u'yinde qaldı.
