Yaqıp 3 bob

Tildi tıyıw haqqında (1-18).

¹ Ha'y, tuwısqanlarım! Ko'plerin'iz mug'allim bola bermen'ler. Sebebi bizlerdin', mug'allimlerdin' awırıraq hu'kim alatug'ınımızdı bilesizler.

² Ha'mmemiz ko'p qa'te isleymiz. Eger kim de kim so'ylegende qa'te qılmasa, ol pu'tkil denesin boysındıra alatug'ın minsiz adam bolg'anı.

³ Bizlerge boysınıwı ushın, atlardın' awızlarına suwlıq salıp, olardın' pu'tkil denesin basqara alamız.

⁴ Kemeler de sonshelli u'lken bolıp, ku'shli samallar menen ju'rse de, kemeshinin' qa'legen jerine ju'da' kishkene rul menen burıladı.

⁵ Sol sıyaqlı, til de denenin' kishkene bir mu'shesi bolsa da, ko'p maqtanadı. Kishkene bir ushqın sonshelli u'lken tog'aydı jandırıp jibere aladı.

⁶ Til – bul ot, denemizdin' mu'sheleri arasında bir jamanlıq du'nyası. Ol pu'tkil denemizdi iplaslaydı ha'm o'mirimizdi jandıradı. Onın' o'zi de dozaq otında janadı.

⁷ Ha'r tu'rli haywanlar, quslar, jer bawırlawshılar ha'm ten'iz janıwarları adam ta'repinen qolg'a u'yretilgen ha'm qolg'a u'yretilmekte.

⁸ Biraq tildi hesh bir adam boysındıra almaydı. Ol toqtatıp bolmaytug'ın jamanlıq bolıp, o'ltiriwshi za'ha'rge tolı.

⁹ Tilimiz benen İyemizdi, A'kemizdi alg'ıslaymız. Sol tilimiz benen Qudayg'a uqsatıp jaratılg'an adamlardı g'arg'aymız da.

¹⁰ Bir awızdan ha'm maqtaw, ha'm g'arg'ıs shıg'adı. Tuwısqanlarım, bunday bolmawı kerek.

¹¹ Bir bulaqtan ha'm dushshı, ha'm ashshı suw shıg'a ma?

¹² Tuwısqanlarım! A'njir ag'ashı za'ytu'n yamasa ju'zim ag'ashı a'njir bere ala ma? Ashshı bulaq ta dushshı suw bere almaydı.

¹³ Aran'ızda dana ha'm tu'simpaz adam kim? Bunday adam o'z danalıg'ın jaqsı ju'ris-turısı arqalı ko'rsetip, kishipeyillik penen jaqsı isler islewi tiyis.

¹⁴ Biraq eger ju'regin'izde ashshı ku'nshillik ha'm menmenlik bar bolsa, onda maqtanban'lar, haqıyqatqa qarsı jalg'an so'ylemen'ler.

¹⁵ Bunday «danalıq» joqarıdan tu'spegen. Bunday «danalıq» du'nyadan, adam ta'biyatınan, shaytannan.

¹⁶ O'ytkeni qay jerde ku'nshillik ha'm menmenlik bar bolsa, sol jerde ta'rtipsizlik ha'm ha'r tu'rli jamanlıq boladı.

¹⁷ Biraq joqarıdan tu'sken danalıq birinshiden pa'k, son'ınan tatıw, mu'la'yim, boysınıwshı, miyrim-sha'pa'a'tke ha'm jaqsı jemislerge tolı. Ol a'dalatsız ha'm eki ju'zli emes.

¹⁸ Tınıshlıq penen tuqım sewip, tınıshlıq ornatıwshılar haqlıq jemisin jıynap aladı.