Yaqıp 4 bob
1 Aran'ızdag'ı urıs ha'm ja'njeller qayaqtan kelip shıg'adı? Denelerin'izdin' mu'shelerinde urısıp atırg'an qa'lewlerin'izden emes pe?
2 Bir na'rseni qa'leysizler, biraq erise almaysızlar. Sonlıqtan adam o'ltiresizler. Ku'nshillik etesizler, biraq qa'legenin'izge erise almag'anlıqtan, ja'njellesip urısasızlar. Sizler Qudaydan soramag'anın'ız ushın, almay atırsızlar.
3 Sorasan'ız da almay atırsızlar. Sebebi jaman niyet penen, o'z na'psin'izge paydalanıw ushın sorap atırsızlar.
4 Ha'y, opasızlar! Du'nya menen dos bolıwdın' Qudayg'a dushpanlıq ekenin bilmeysizler me? Du'nyanın' dostı bolıwdı qa'legen adam o'zin Qudayg'a dushpan qıladı.
5 Muxaddes Jazıwda: «Qudaydın' bizlerge salg'an Muxaddes Ruwxı bizlerdin' Qudayg'a sadıq bolıwımızdı qattı qa'leydi», – dep bosqa aytılg'an dep oylaysızlar ma?
6 Degen menen, Qudaydın' bizlerge beretug'ın miyrimi ja'ne de ullıraq. Sonlıqtan Muxaddes Jazıwda: «Quday menmenlerge qarsı turadı, Biraq kishipeyillilerge O'z miyrimin beredi» , – delingen.
7 Solay etip, Qudayg'a boysının'lar! Shaytang'a qarsı turın'lar, sonda ol sizlerden qashıp ketedi.
8 Qudayg'a jaqınlasın'lar, sonda Ol da sizlerge jaqınlasadı. Ha'y, gu'nakarlar, qolların'ızdı gu'nadan tazalan'lar! Ha'y, eki oylılar, ju'reklerin'izdi pa'klen'ler!
9 Qayg'ırın'lar, aza tutıp, jılan'lar! Ku'lkin'iz azag'a, quwanıshın'ız qayg'ıg'a aylansın.
10 İyemizdin' aldında o'zlerin'izdi pa's tutın'lar, Ol sizlerdi ma'rtebeli qıladı.
11 Tuwısqanlarım, bir-birin'izdi jamanlaman'lar! O'z tuwısqanın jamanlaytug'ın yamasa hu'kim etetug'ın adam Muxaddes Nızamg'a qarsı so'ylep, onı hu'kim etken boladı. Eger sen Muxaddes Nızamdı hu'kim etsen', onda Muxaddes Nızamdı orınlawshı emes, al onı hu'kim etiwshi bolasan'.
12 Nızam shıg'arıwshı ha'm hu'kim etiwshi – jalg'ız Quday. Tek g'ana Ol qutqarıwg'a ha'm nabıt qılıwg'a qu'diretli. Al tuwısqanın'dı hu'kim etetug'ınday, sen kim bolıpsan'?
13 Endi «Bu'gin yamasa erten' pa'len qalag'a ketemiz, ol jerde bir jıl qalıp, sawda-satıq islep, payda ko'remiz», – deytug'ınlar, tın'lan'lar!
14 Sizler erten' ne bolatug'ının bilmeysizler-g'o. O'mirin'izdin' o'zi ne? Ol az waqıt ko'rinip, keyin joq bolatug'ın puw.
15 Onın' ornına: «Eger İyemiz qa'lese, jasaymız ha'm mınanı ya ananı isleymiz», – dep aytıwın'ız tiyis.
16 Biraq sizler menmensip maqtanasızlar. Ha'r qanday maqtanshaqlıq – jawızlıq.
17 Solay etip, kim de kim jaqsılıq islewdi bilse de, onı islemese, gu'na qılg'an boladı.
