1 Petr 4 bob
1 Solay etip, Masix denesi menen azap shekti. Sizler de Masixta bolg'an oylar menen o'zlerin'izdi azap shegiwge tayarlan'lar. Sebebi denesi azap shegip atırg'an adam gu'na islewdi toqtatadı.
2 Bunnan bılay, du'nyadag'ı o'mirin'izdin' qalg'an bo'leginde adamnın' jaman qa'lewleri boyınsha emes, al Qudaydın' erki boyınsha jasan'lar.
3 Sizlerdin' o'tken o'mirin'izde isenbeytug'ın adamlarg'a jag'atug'ın a'detlerdi islep jasag'anın'ız jeter! Sol waqıtları sizler buzıqshılıqqa, jaman qa'lewlerge, ma'sku'nemlikke, ayshı-a'shiretke, na'psiqawlıqqa ha'm jerkenishli butparazlıqqa berilip, o'mir su'rgen edin'ler.
4 Endi bolsa, isenbeytug'ınlar sizlerdin' olar menen birlikte usınday na'psiqumarlıqta qatnaspag'anın'ız sebepli hayran bolıp, sizlerdi mazaq etip atır.
5 Biraq olar bunın' ushın tiriler menen o'lilerdi hu'kim etiwge tayar turg'an Quday aldında juwap.
6 Sol sebepli, o'lilerdin' denesi basqalar qatarı o'lip jazalansa da, ruwxı Quday sıyaqlı jasawı ushın, Xosh Xabar o'lilerge de ja'riyalandı.
7 Ha'mme na'rsenin' aqırı jaqın. Sonlıqtan duwa etiw ushın aqıl menen is tutıp, sergek bolın'lar!
8 En' baslısı, bir-birin'izdi shın ju'rekten su'yin'ler. O'ytkeni su'yispenshilik ko'p gu'nalardı juwadı.
9 Narazılıq bildirmey, bir-birin'izge miymandos bolın'lar.
10 Ha'r birin'iz jaqsı xızmetshi sıpatında Qudaydın' sizlerge miyrimlilik penen bergen ha'r tu'rli ruwxıy sıyların qollana otırıp, bir-birin'izge xızmet etin'ler.
11 Adamlar aldında so'ylegen adam Qudaydın' so'zine say so'ylesin. Basqalarg'a xızmet etetug'ın adam Qudaydın' bergen ku'shi menen xızmet etsin. Usılayınsha, İysa Masix arqalı Quday ha'r bir iste alg'ıslansın. Ullılıq ha'm qu'diret ma'n'gige Masixtiki. Awmiyin.
12 Su'yikli tuwısqanlarım, sizlerdi sınaw ushın keletug'ın awır azaptı tan' qalarlıq na'rse dep, hayran bolman'lar.
13 Kerisinshe, Masixtın' azaplarına sherik bolg'anın'ızg'a quwanın'lar. Solay etip, Masix saltanat penen kelgende, quwanıp shadlanasızlar.
14 Masixtın' atı ushın masqaralanıp atırg'an bolsan'ız, sizler baxıtlısızlar! Sebebi Qudaydın' ullı Ruwxı u'stin'izde boladı.
15 Ja'ne hesh birin'iz adam o'ltiriwshi, urı, jamanlıq islewshi yamasa basqalardın' jumısına aralasıp, kesent beretug'ın bolıp, azap shekpesin.
16 Biraq sizler masixıy bolg'anın'ız ushın azap shegip atırg'an bolsan'ız, uyalman'lar. Al bul at penen atalatug'ının'ız ushın Qudaydı alg'ıslan'lar.
17 O'ytkeni hu'kim shıg'arılatug'ın waqıt jetip keldi. Hu'kim shıg'arıwdı Quday O'z shan'arag'ınan baslaydı. Eger bul Qudaydın' shan'arag'ı bolg'an bizlerden baslansa, Qudaydın' Xosh Xabarına qulaq aspaytug'ınlardın' aqırı qanday boladı?
18 «Eger haq adam zorg'a qutqarılsa, Qudaysız ha'm gu'nakar adamg'a ne boladı?».
19 Sonlıqtan Qudaydın' erkine boysınıp, azap shekkenler jaqsılıq islep, janların isenimli Jaratqang'a tapsırsın.
