2 Petr 1 bob
1 İysa Masixtın' qulı ha'm elshisi Simon Petrden, Qudayımız ha'm Qutqarıwshımız İysa Masixtın' haqlıg'ı arqalı bizler alg'an qımbatlı isenimge ten' isenimdi sıyg'a alg'anlarg'a sa'lem!
2 Qudaydı ha'm İyemiz İysanı haqıyqattan bilip barıwın'ız arqalı sizlerge miyrim ha'm tınıshlıq mol-mol etip berilsin!
3 Qudaylıq qu'diretke iye İysa Masix O'zin biliwimiz arqalı jasawımız ha'm Qudaydın' jolı menen ju'riwimiz ushın bizlerge kerekli bolg'an ha'mme na'rseni berdi. Ol bizlerdi O'z ullılıg'ın ha'm iygiligin alıwımız ushın shaqırdı.
4 Quday O'z ullılıg'ı ha'm iygiligi arqalı bizlerge ju'da' u'lken ha'm qımbatlı wa'deler berdi. Solay etip, bul wa'deler sebepli sizler du'nyadag'ı jaman qa'lewlerden qutılıp, qudaylıq ta'biyatqa sherik bolasızlar.
5 Sonlıqtan sizler bar ku'shin'izdi sarp etip, isenimin'izge jaqsılıqtı, jaqsılıqqa bilimdi,
6 bilimge na'psini tıyıwdı, na'psini tıyıwg'a sabırlılıqtı, sabırlılıqqa Qudayg'a bag'ıshlanıwdı,
7 Qudayg'a bag'ıshlanıwg'a tuwısqanlıq su'yispenshilikti, tuwısqanlıq su'yispenshilikke su'yispenshilikti qosıp arttırın'lar.
8 Eger bul jaqsı qa'siyetler sizlerde bar bolıp, artıp atırg'an bolsa, onda İyemiz İysa Masixtı biliwde tabıssız ha'm jemissiz bolmaysız.
9 Bul jaqsı qa'siyetlerge iye bolmag'an adam uzaqtı ko're almaytug'ın soqır adam bolg'anı. Ol burıng'ı gu'nalarınan tazalang'anın umıtqan adam demek.
10 Sonlıqtan ha'y tuwısqanlarım, Qudaydın' sizlerdi shaqırg'anı ha'm tan'lap alg'anı haqıyqat ekenin ko'rsetiw ushın, ele de ku'sh-g'ayrat salın'lar. Usılay islesen'iz, hesh qashan su'rnikpeysiz.
11 Solay etip, İyemiz ha'm Qutqarıwshımız İysa Masixtın' ma'n'gilik Patshalıg'ına kiriw jolı sizlerge ken' ashıladı.
12 Sol sebepten sizler bulardı bilip, o'zin'izdegi haqıyqattı bekkem tutsan'lar da, men usılardı sizlerge ha'mme waqıt esletip turıwg'a tayarman.
13 Bul denedeSol sebepten sizler bulardı bilip, o'zin'izdegi haqıyqattı bekkem tutsan'lar da, men usılardı sizlerge ha'mme waqıt esletip turıwg'a tayarman jasag'an waqtımda yadın'ızda bolg'an na'rselerdi esletip turıwdı durıs dep taptım.
14 O'ytkeni İyemiz İysa Masixtın' mag'an bildiriwi boyınsha, bul deneden ayırılatug'ın waqtımnın' jaqın ekenin bilemen.
15 Men bul du'nyadan ketkenimnen son' da bulardı ha'mme waqıt eslep tura alıwın'ız ushın, jan-ta'nim menen tırısaman.
16 Bizler İyemiz İysa Masixtın' qu'diretin ha'm qayta keliwin sizlerge ma'lim etkenimizde, yadtan oylap tabılg'an an'ızlarg'a tiykarlanbadıq. Al Onın' ullılıg'ın o'z ko'zlerimiz benen ko'rgen edik.
17 Sebebi qu'diretli ha'm ullı Qudaydan İysag'a: «Bul – Menin' su'yikli Ulım, Men Og'an ırzaman», – degen saza esitilgende, Ol Quday A'keden dan'q ha'm saltanat aldı.
18 Onın' menen birge muxaddes tawda bolg'anımızda, aspannan kelgen usı sazanı bizler de esittik.
19 Ja'ne bizlerde ele de isenimlirek bolg'an payg'ambarlardın' so'zleri bar. Tan' atıp, tan' juldızı jarqırag'anday, ju'reklerin'iz tolıq tu'sinik alatug'ın ku'nge deyin qaran'g'ı jerde nurın shashqan shırag'a uqsag'an payg'ambarlardın' so'zlerine dıqqat awdarsan'ız, jaqsı qılasızlar.
20 Aldı menen mınanı bilip qoyın'lar: Muxaddes Jazıwda bolg'an hesh bir payg'ambarshılıq so'zin hesh kimge o'z betinshe tu'sindiriwge bolmaydı.
21 O'ytkeni hesh bir payg'ambarshılıq so'zi adamnın' qa'lewi menen aytılg'an emes. Al Muxaddes Ruwx ta'repinen basqarılg'an adamlar Qudaydın' so'zlerin aytqan.
