1 Yuxan 2 bob
1 Ha'y, balalarım! Men bulardı sizlerge gu'na islemewin'iz ushın jazıp atırman. Biraq eger birimiz gu'na islep qoysaq, A'kenin' aldında Jaqlawshımız, haq bolg'an İysa Masix bar.
2 Ol bizlerdin' gu'nalarımızdın' keshiriliwi ushın qurban boldı. Ol tek bizlerdin' emes, al pu'tkil du'nyanın' gu'naları ushın bag'ıshlang'an qurbanlıq boldı.
3 Eger Qudaydın' buyrıqların orınlasaq, Onı biletug'ınımızdı usı arqalı bilip alamız.
4 «Onı bilemen» dep, Onın' buyrıqların orınlamag'an adam o'tirikshi, onda haqıyqatlıq joq.
5 Biraq Qudayg'a degen su'yispenshilik Onın' so'zin orınlag'an adamda haqıyqattan ka'mal tabadı. Quday menen birge ekenimizdi usı arqalı bilip alamız.
6 «Quday menen birgemen» degen adam İysa sıyaqlı jasawı sha'rt.
7 Ha'y, su'yikli tuwısqanlarım, sizlerge jan'a buyrıqtı emes, a'zelden o'zlerin'iz qabıl etken eski buyrıqtı jazıp atırman. Bul eski buyrıq – sizler esitken Qudaydın' so'zi.
8 Biraq sizlerge ja'ne jan'a buyrıq ta jazıp atırman. Bunın' haqıyqat ekeni Masix ha'm sizler arqalı ko'rinip atır. Sebebi qaran'g'ılıq o'tip baratır, al haqıyqıy nur a'lle qashan jarqırap tur.
9 «Nurdaman» dep, tuwısqanın jek ko'retug'ın adam ele qaran'g'ılıqta boladı.
10 Tuwısqanın su'ygen adam nurda jasaydı ha'm onda su'rnigiwge sebep bolmaydı.
11 Biraq, tuwısqanın jek ko'riwshi qaran'g'ılıqta boladı. Ol qaran'g'ılıqta ju'rip, qayaqqa baratırg'anın bilmeydi. O'ytkeni qaran'g'ılıq onın' ko'zlerin soqır etken.
12 Balalarım, sizlerge jazıp atırman. Sebebi İysanın' atı arqalı gu'naların'ız keshirildi.
13 A'keler, sizlerge jazıp atırman. O'ytkeni sizler en' bastan bar Bolg'andı bilesizler. Jaslar, sizlerge jazıp atırman. Sebebi sizler shaytandı jen'din'iz. Balalarım, sizlerge jazdım. O'ytkeni sizler A'keni bilesizler.
14 A'keler, sizlerge jazdım. Sebebi sizler en' bastan bar Bolg'andı bilesizler. Jaslar, sizlerge jazdım. O'ytkeni sizler ku'shlisiz ha'm sizlerde Qudaydın' so'zi bolıp, Sizler shaytannın' u'stinen jen'iske eristin'iz.
15 Du'nyanı ha'm du'nyadag'ı na'rselerdi su'ymen'ler. Kim de kim du'nyanı su'yse, onda A'kege degen su'yispenshilik joq.
16 Sebebi du'nyada bolg'an ha'r bir na'rse: denenin' qa'lewleri, ko'zdin' qa'lewleri ha'm o'mirdegi menmenlik A'keden emes, du'nyadan.
17 Du'nya ha'm onın' qa'lewleri o'tip ketedi, biraq Qudaydın' erkin orınlag'an adam ma'n'gi jasaydı.
18 Balalarım, bul son'g'ı waqıt. Masixqa qarsı turıwshının' keletug'ının esitkenin'izdey, a'lle qashan ko'p Masixqa qarsı turıwshılar payda boldı. Son'g'ı waqıt bolg'anın usınnan bilemiz.
19 Olar aramızdan shıqtı, biraq bizlerge tiyisli emes edi. Eger bizlerge tiyisli bolg'anda, bizler menen birge qalar edi. Olardın' ketkeni arqalı olardın' hesh birinin' bizlerge tiyisli emes ekeni ma'lim boldı.
20 Al sizler muxaddes bolg'an Masixtan Muxaddes Ruwxtı alg'anlıqtan, ha'mmen'iz haqıyqattı bilesizler.
21 Men sizlerge haqıyqattı bilmegenin'iz ushın emes, al haqıyqattı ha'm hesh qanday jalg'annın' haqıyqattan emes ekenin bilgenin'iz sebepli jazıp atırman.
22 İysanın' Masix ekenin ta'n almag'an adam o'tirikshi bolmasa, onda kim o'tirikshi? A'keni ha'm Uldı ta'n almag'an adam – Masixqa qarsı turıwshı.
23 Uldı ta'n almag'an adamda A'ke de joq. Al Uldı ta'n alg'an adamda A'ke de bar.
24 A'wel bastan esitken so'zin'izdi o'zlerin'izde saqlan'lar. Eger a'wel bastan esitken so'zin'iz sizlerde bolsa, sizler de Ul ha'm A'ke menen birge bolasızlar.
25 Masixtın' O'zi bizlerge wa'de etken ma'n'gilik o'mir – usı.
26 Bulardı sizlerdi azg'ırmaqshı bolıp atırg'anlar haqqında jazıp atırman.
27 Biraq sizler Masixtın' Muxaddes Ruwxına iyesiz. Sizlerde Muxaddes Ruwx bolg'anlıqtan, sizlerge hesh kimnin' u'yretiwinin' ha'jeti joq. Masixtın' Muxaddes Ruwxı sizlerge ha'mmesin u'yretedi. Onın' ta'limi haqıyqıy, jalg'an emes. Onın' sizlerge u'yretkeni sıyaqlı, Masix penen jasan'lar.
28 Awa, balalarım, endi Masix penen qarım-qatnasta bolıp, Ol kelgende, Onın' aldında uyatqa qalmawımız ushın ma'rt bolamız.
29 Qudaydın' haq ekenin bilsen'iz, haq is qılg'an ha'r bir adamnın' da Onnan tuwılg'anın bilin'.
