1 Yuxan 3 bob
1 Qaran'lar, Qudaydın' balaları dep atalıwımız ushın, A'ke bizlerdi qanday ullı su'yispenshilik penen su'ydi! Haqıyqattan da, bizler Qudaydın' balalarımız. Du'nya A'keni bilmegenlikten, bizlerdi de bilmey atır.
2 Ha'y, su'yikli tuwısqanlarım, bizler endi Qudaydın' balalarımız. Biraq qanday bolatug'ınımız ele bizlerge ko'rsetilmedi. Masix kelgende, Ol sıyaqlı bolatug'ınımızdı bilemiz. O'ytkeni Onın' qanday ekenin ko'remiz.
3 Masixtan usılay u'mit etken ha'r bir adam Ol pa'k bolg'anı sıyaqlı, o'zin pa'kleydi.
4 Gu'na islegen ha'r bir adam nızamsızlıq islegen boladı. Sebebi gu'nanın' o'zi – nızamsızlıq.
5 Al Masixtın' gu'nalarımızdı alıp taslaw ushın kelgenin bilesizler. Onın' O'zinde gu'na joq.
6 Onın' menen jasaytug'ın adam gu'na islemeydi. Gu'na islewdi dawam etip atırg'an adam Onı ko'rmegen de, bilmegen de.
7 Perzentlerim! Hesh kimge o'zlerin'izdi aldatpan'lar. Masixtın' haq bolg'anı sıyaqlı, haq is islegen adam da haq.
8 Gu'na isley beretug'ın adam shaytannan. O'ytkeni shaytan bastan baslap gu'na islep kiyatır. Sonlıqtan Qudaydın' Ulı shaytannın' islerin joq qılıw ushın keldi.
9 Qudaydan tuwılg'an ha'r bir adam gu'na islemeydi, sebebi Qudaydın' tuqımı onda boladı. Ol Qudaydan tuwılg'anlıqtan, gu'na islewdi dawam ete almaydı.
10 Qudaydın' balaları menen shaytannın' balaların mınadan ayırıwg'a boladı: haq is islemegen ha'm tuwısqanın su'ymegen adam Qudaydan emes.
11 Sizler a'zelden esitken xabar bul: bir-birimizdi su'yeyik!
12 Shaytang'a tiyisli bolıp, o'z tuwısqanın o'ltirgen Kaing'a uqsamayıq. Ol ne ushın tuwısqanın o'ltirdi? O'ytkeni o'zinin' isleri jawız, al tuwısqanının' isleri haq edi.
13 Ha'y, tuwısqanlarım, du'nya sizlerdi jek ko'rip atırg'an bolsa, hayran qalman'lar.
14 Bizler o'zlerimizdin' o'limnen o'mirge o'tkenimizdi bilemiz, sebebi tuwısqanlarımızdı su'yemiz. Kim de kim tuwısqanın su'ymese, ol o'li bolıp qala beredi.
15 Tuwısqanın jek ko'rgen ha'r bir adam – adam o'ltiriwshi. Hesh bir adam o'ltiriwshinin' ma'n'gilik o'mirge iye emes ekenin bilesizler.
16 Su'yispenshiliktin' ne ekenin Masixtın' bizler ushın O'z janın bergeninen bilemiz. Sonlıqtan bizler de tuwısqanlarımız ushın o'z janımızdı beriwimiz sha'rt.
17 Kim de kim du'nya-malg'a bay bola tura, tuwısqanının' joqshılıqta jasap atırg'anın ko'rse de tas bawırlıq etse, qalayınsha onday adamda Qudaydın' su'yispenshiligi boladı?
18 Perzentlerim, tek so'z yamasa til menen emes, al is ha'm haqıyqatlıq penen su'yeyik.
19 Haqıyqatqa tiyisli ekenimizdi usı arqalı bilemiz. Eger kewlimiz bizlerdi ayıplap atırg'an bolsa da, Quday aldında kewlimiz tınısh boladı.
20 O'ytkeni Quday kewlimizden ullı ha'm Ol ha'mme na'rseni biledi.
21 Ha'y, su'yikli tuwısqanlarım, eger kewlimiz bizlerdi ayıplamasa, onda Qudaydın' aldında batır bolamız.
22 ha'm Onnan ne sorasaq ta alamız. Sebebi bizler Onın' buyrıqların orınlap, Og'an unaytug'ın na'rselerdi islep atırmız.
23 Onın' buyrıg'ı bul: Ulı İysa Masixtın' atına isenip, Onın' bizlerge buyırg'anınday, bir-birimizdi su'yiwimiz tiyis.
24 Qudaydın' buyrıqların orınlag'an adam Qudayda, Quday da onda boladı. Onın' bizlerde ekenin Onın' bizlerge bergen Muxaddes Ruwxı arqalı bilemiz.
