1 Yuxan 4 bob
1 Ha'y, su'yikli tuwısqanlarım, ha'r qanday ruwxqa isenben'ler. Biraq ruwxlardın' Qudaydan bolg'anın yamasa bolmag'anın biliw ushın, olardı sınap ko'rin'ler. O'ytkeni du'nyada ko'p jalg'an payg'ambarlar payda boldı.
2 Qudaydın' Ruwxın mınadan bilesizler: İysa Masixtın' adam denesinde kelgenin ta'n alg'an ha'r qanday ruwx Qudaydan.
3 İysanı ta'n almag'an ha'r bir ruwx Qudaydan emes. Bul – Masixqa qarsı turıwshının' ruwxı. Sizler onın' keletug'ının esitken edin'ler. Mine, ol a'lle qashan du'nyada.
4 Ha'y, perzentlerim, sizler Qudaydansızlar ha'm jalg'an payg'ambarlardı jen'din'ler. Sebebi sizlerdegi Muxaddes Ruwx du'nyadag'ı ruwxtan ullı.
5 Jalg'an payg'ambarlar du'nyadan. Sol sebepli, olar du'nyag'a tiyisli so'zlerdi so'yleydi ha'm du'nya olardı tın'laydı.
6 Al bizler Qudaydanbız. Kim de kim Qudaydı bilse, bizlerdi tın'laydı. Al kim de kim Qudaydan bolmasa, bizlerdi tın'lamaydı. Haqıyqat Ruwxı menen jalg'an ruwxtı usınnan bilemiz.
7 Ha'y, su'yikli tuwısqanlarım, bir-birimizdi su'yeyik! O'ytkeni su'yispenshilik Qudaydan. Ha'r bir su'yiwshi adam Qudaydan tuwılg'an ha'm Qudaydı biledi.
8 Su'ymeytug'ın adam Qudaydı bilmeydi. Sebebi Quday – su'yispenshilik.
9 Quday bizlerge degen su'yispenshiligin bılay ko'rsetti: Quday O'zinin' jalg'ız Ulın du'nyag'a jiberip, bizlerge Ol arqalı o'mir berdi.
10 Mine, su'yispenshilik – usı: bizler Qudaydı emes, al Quday bizlerdi su'yip, O'z Ulın bizlerdin' gu'nalarımızdın' keshiriliwi ushın qurbanlıq qılıp jiberdi.
11 Ha'y, su'yikli tuwısqanlarım! Quday bizlerdi usılay su'ygen bolsa, bizler de bir-birimizdi su'yiwge parızlımız.
12 Hesh kim hesh qashan Qudaydı ko'rgen emes. Biraq eger bir-birimizdi su'ysek, Quday bizlerde boladı ha'm Onın' su'yispenshiligi bizlerde ka'mal tabadı.
13 Bizlerdin' Onda, Onın' bizlerde ekenin, Onın' bizlerge bergen Ruwxı arqalı bilemiz.
14 A'ke O'z Ulın du'nyanın' Qutqarıwshısı qılıp jibergenin bizler ko'rdik ha'm bul tuwralı gu'walıq beremiz.
15 Kim de kim İysanı Qudaydın' Ulı dep ta'n alsa, Quday onda, ol da Qudayda boladı.
16 Bizler Qudaydın' bizlerge degen su'yispenshiligin bilemiz ha'm og'an isenemiz. Quday – su'yispenshilik. Kim de kim su'yispenshilik penen jasasa, ol Qudayda, Quday da onda boladı.
17 Solay etip, hu'kim shıg'arılatug'ın qıyamet-qayım ku'ninde ma'rt bolıwımız ushın, Qudaydın' su'yispenshiligi bizlerde ka'mal tabadı. O'ytkeni bizler bul du'nyada Masix sıyaqlı bolamız.
18 Su'yispenshilikte qorqıw joq. Kerisinshe, minsiz su'yispenshilik qorqıwdı quwıp shıg'aradı. Sebebi qorqıw jaza menen baylanıslı boladı. Qorqatug'ın adam su'yispenshilikte minsizlikke erispegen.
19 Bizler bir-birimizdi su'yemiz, o'ytkeni da'slep Quday bizlerdi su'ydi.
20 Eger kim de kim: «Qudaydı su'yemen» dep, tuwısqanın jek ko'rse, ol o'tirikshi. Sebebi ko'zge ko'rinetug'ın tuwısqanın su'ymegen adam ko'zge ko'rinbeytug'ın Qudaydı qalay su'ye aladı?
21 «Qudaydı su'yetug'ın adam o'z tuwısqanın da su'yiwi tiyis», – degen buyrıqtı bizler Masixtan alg'anbız.
