1 Yuxan 5 bob
1 İysanın' Masix ekenine isenetug'ın ha'r bir adam Qudaydan tuwılg'an. A'keni su'ygen ha'r bir adam Onın' balaların da su'yedi.
2 Qudaydı su'yip, Onın' buyrıqların orınlag'anımızdan Qudaydın' balaların su'yetug'ınımızdı bilemiz.
3 O'ytkeni Qudaydın' buyrıqların orınlag'anımız Onı su'yetug'ınımızdı an'latadı. Onın' buyrıqları awır emes.
4 Sebebi Qudaydan tuwılg'an ha'r bir adam du'nyanı jen'edi. Du'nya u'stinen jen'iske erisken bizlerdin' isenimimiz boladı.
5 İysanın' Qudaydın' Ulı ekenine isenetug'ın adamnan basqa, kim du'nyanı jen'e aladı?
6 Bul – suw ha'm qan menen kelgen İysa Masix. Ol tek suw menen emes, al suw ha'm qan menen keldi. Ja'ne de, gu'walıq beriwshi Muxaddes Ruwx. O'ytkeni Muxaddes Ruwx – haqıyqat.
7 Gu'walıq beretug'ınlar u'shew:
8 Muxaddes Ruwx, suw ha'm qan. Bulardın' u'shewinin' gu'walıg'ı bir.
9 Bizler adamnın' gu'walıg'ın qabıl etemiz, al Qudaydın' gu'walıg'ı onnan da ullı. Sebebi bul – Qudaydın' O'z Ulı tuwralı bergen gu'walıg'ı.
10 Qudaydın' Ulına isenetug'ın adamnın' o'zinde usı gu'walıq bar. Al Qudayg'a isenbeytug'ın adam Qudaydı o'tirikshi qılg'an boladı. O'ytkeni Qudaydın' O'z Ulı tuwralı bergen gu'walıg'ına isenbeydi.
11 Sol gu'walıq mınaw: Quday bizlerge ma'n'gilik o'mir berdi ha'm bul o'mir Onın' Ulında.
12 Qudaydın' Ulına iye bolg'an adam o'mirge iye boladı, Qudaydın' Ulına iye bolmag'an adam o'mirge iye emes.
13 Men bulardı Qudaydın' Ulına isengen sizlerge ma'n'gilik o'mirge iye ekenin'izdi biliwin'iz ushın jazıp atırman.
14 Bizlerde Og'an degen mınaday batıllıq bar: Qudaydın' erkine say ne sorasaq ta, Ol bizlerdi esitedi.
15 Eger ne sorasaq ta, Onın' esitetug'ının biletug'ın bolsaq, Onnan sorag'anlarımızdı alatug'ınımızdı da bilemiz.
16 Eger kim de kim tuwısqanının' o'limge aparmaytug'ın gu'na islegenin ko'rse, duwa etsin. Quday og'an o'mir beredi. Bunı o'limge aparmaytug'ın gu'na islegenler haqqında aytıp atırman. O'limge aparatug'ın gu'na da bar. Bul ushın duwa etsin, dep atırg'anım joq.
17 Ha'r qanday jamanlıq – gu'na, biraq o'limge aparmaytug'ın gu'na da bar.
18 Qudaydan tuwılg'an adam gu'na islewdi dawam etpeytug'ının bilemiz. Sebebi onı Qudaydın' Ulı saqlaydı ha'm shaytan og'an qol tiygize almaydı.
19 O'zlerimizdin' Qudayg'a tiyisli ekenimizdi ha'm pu'tkil du'nya shaytannın' qol astında ekenin bilemiz.
20 Ja'ne de, Qudaydın' Ulı kelip, haqıyqıy Qudaydı biliwimiz ushın aqıl-oy bergenin de bilemiz. Bizler haqıyqıy Qudayda, yag'nıy Onın' Ulı İysa Masixtamız. Ol – haqıyqıy Quday ha'm ma'n'gilik o'mir.
21 Perzentlerim, o'zlerin'izdi butlardan saqlan'lar!
