Nızamnın' qaytalanıwı 10 bob
1 «Sol waqıtta, Jaratqan İye mag'an bılay dedi: „Burıng'ı tasqa uqsag'an eki tas jonıp alıp, Menin' aldıma, tawg'a shıq. Ja'ne, ag'ashtan bir sandıq isle.
2 Men usı taslarg'a aldın o'zin' sındırıp taslag'an taslardag'ı buyrıqlardı jazaman. Keyin sen taslardı sandıqqa salıp qoyasan'“.
3 Solay etip, men akatsiya ag'ashınan bir sandıq isledim. Burıng'ı taslarday etip, eki tas jonıp aldım. Sonnan keyin, eki tastı alıp, tawg'a shıqtım.
4 Tawda jıynalg'an ku'nin'izde, Jaratqan İye ot ishinen sizlerge aytqan on buyrıqtı aldıng'ıday etip, sol eki tasqa ja'ne jazdı da, onı mag'an berdi.
5 Men tawdan to'men tu'sip, Jaratqan İye buyırg'anınday, taslardı sandıqtın' ishine salıp qoydım. Taslar ha'zir de sol sandıqtın' ishinde turıptı».
6 İzraillılar Beerot-Bene-Yaaqannan shıg'ıp, Moserag'aju'rip ketti. Xaron sol jerde o'lip, jerlendi. Onın' ornına balası Elazar bas ruwxaniy boldı.
7 İzraillılar ol jerden Gudgodag'a, keyin bolsa, ag'ın suwlar u'lkesi bolg'an İotbatag'a bardı.
8 Sol waqıtta Jaratqan İye Kelisim sandıg'ın ko'terip ju'rsin ha'm da'rgayımda xızmet etip, Menin' atım menen adamlarg'a aq pa'tiya bersin, dep Lebiy urıwın tan'lap alg'an edi. Olar bu'gin de usı xızmetti orınlap kiyatır.
9 Sonın' ushın, lebiyliler tuwısqanları bolg'an basqa urıwlar sıyaqlı jerden u'les almadı. O'ytkeni Qudayın'ız Jaratqan İyenin' olarg'a bergen wa'desi boyınsha Jaratqan İyenin' O'zi olardın' ırısqı-nesiybesin beredi.
10 «Men aldıng'ıday, tawda ja'ne qırıq ku'n, qırıq tu'n qaldım. Sonda Jaratqan İye ja'ne bir ma'rte menin' jalbarınıwımdı esitip, sizlerdi o'ltirmeytug'ın boldı.
11 Sonnan keyin, Ol: „Qa'ne, tur, bul xalıqtı baslap bar. Olardı Men ata-babalarına beremen dep ant ishken jerge alıp bar. Olar sol jerge barıp, onı mu'lik etip, iyelep alsın“, – dedi».
12 «Endi, ha'y, İzrail xalqı, Qudayın'ız Jaratqan İye sizlerden bir na'rseni g'ana talap qıladı: Qudayın'ız Jaratqan İyeden qorqıp, Onın' jolları menen ju'rin'ler, Onı su'yin'ler, shın ju'regin'iz ha'm jan-ta'nin'iz benen Og'an xızmet etin'ler.
13 Men bu'gin sizlerge berip atırg'an Jaratqan İyenin' buyrıqlarına ha'm qag'ıydalarına a'mel qılın'lar, sonda abadan turmıs keshiresiz.
14 Aspan da, pu'tkil aspan a'lemi de, jer ju'zi ha'm onın' ishindegi barlıq ta Qudayın'ız Jaratqan İyege tiyislidur.
15 Degen menen, Jaratqan İye sizlerdin' ata-babaların'ızdı su'ydi. Mine, Ol bu'gin ko'rip turg'anın'ızday, olardın' urpag'ı bolg'an sizlerdi barlıq xalıqlardın' arasınan tan'lap aldı.
16 Ju'reklerin'izdi Jaratqan İyege bag'ıshlan'lar, bunnan bılay qaysar bolman'lar.
17 Sebebi Qudayın'ız Jaratqan İye, qudaylardın' Qudayı, iyelerdin' İyesidur. Ol hesh kimge eki ju'zlilik qılmaytug'ın, hesh qanday para almaytug'ın ullı, qu'diretli ha'm aybatlı Qudaydur.
18 Ol jetim-jesirlerdin' huqıqın qorg'aydı, kelgindilerdi su'yip, olarg'a awqat ha'm kiyim beredi.
19 Sizler de kelgindilerdi su'yiwin'iz kerek, o'ytkeni o'zlerin'iz de Mısırda kelgindi bolg'an edin'iz.
20 Qudayın'ız Jaratqan İyeden qorqıp, tek g'ana Og'an xızmet etin'ler. Og'an sadıq qalıp, Onın' atı menen ant ishin'ler.
21 Ol sizlerdin' dan'qın'ızdur. O'z ko'zin'iz benen ko'rgen sol ullı ha'm tan' qalarlıq islerdi sizler ushın islegen Qudayın'ızdur.
22 Sizlerdin' ata-babaların'ız Mısırg'a barg'anda, olar barı-jog'ı jetpis adam edi. Al ha'zir bolsa, Qudayın'ız Jaratqan İye sizlerdi aspandag'ı juldızlar sıyaqlı sansız etip ko'beytti».
