Nızamnın' qaytalanıwı 2 bob
1 1«Keyin, Jaratqan İyenin' mag'an buyırg'anınday, bizler keynimizge qaytıp, Qamıs ten'izine baratug'ın jol menen sho'lge kettik. Seir tawlarının' a'tirapında uzaq waqıt ju'rdik.
2 Aqırında Jaratqan İye mag'an bılay dedi:
3 „Usı tawlı u'lkenin' do'gereginde ju'rgenin'iz jeter. Endi arqa ta'repke qaray ju'rin'ler“.
4 Sonnan keyin, xalıqqa mına buyrıqlardı beriwimdi ayttı: „Seirde jasaytug'ın tuwısqanların'ız bolg'an Esawdın' urpaqlarının' jerinen o'tesizler. Olar sizlerden qorqadı. Degen menen, o'zlerin'iz de abaylı bolın'lar.
5 Olarg'a qarsı urıs ashpan'lar. Sizlerge olardın' jerinen bir qarıs ta jer bermeymen. O'ytkeni tawlı Seir jerin Esawg'a mu'lik etip berdim.
6 Olardan jeytug'ın awqatın'ızdı ha'm ishetug'ın suwın'ızdı gu'miske satıp alın'lar.
7 Qudayın'ız Jaratqan İye, yag'nıy Men sizlerdin' qol urg'an ha'r bir isin'izdi jarılqadım. Usı ushı-qıyırı joq sho'lde aylanıp ju'rgenin'izde, sizlerdi qorg'adım. Men qırıq jıl dawamında sizler menen birge boldım ha'm sizlerdin' hesh qanday mu'ta'jligin'iz bolmadı“.
8 Solay etip, bizler Seirde jasap atırg'an tuwısqanlarımız Esaw urpaqlarının' janınan o'ttik. Elat ha'm Esion-Geberden İordan tegisligine baratug'ın joldan ju'rdik, keyin jolımızdı Moab sho'line qaray burdıq.
9 Sonda Jaratqan İye mag'an: „Moablılarg'a hu'jim qılıp, urıs ashpan'lar. Olardın' jerinen sizlerge mu'lik bermeymen. O'ytkeni Ar qalasın Luttın' urpag'ına mu'lik etip berdim“, – dedi».
10 Burın ol jerde anaqlar sıyaqlı uzın boylı, ku'shli ha'm ko'p sanlı em xalqı jasaytug'ın edi.
11 Anaqlar sıyaqlı, em xalqı da refa xalqı dep esaplanatug'ın edi. Biraq moablılar olardı em xalqı dep atag'an edi.
12 Seirde burın xor xalqı jasaytug'ın edi. Esawdın' urpaqları ol jerdi olardan tartıp alg'an edi. İzrail xalqı Jaratqan İyenin' mu'lik etip bergen jerinde xalıqlardı joq qılg'anınday, Esawdın' a'wladları da xor xalqın joq etip, jerlerine jaylasıp alg'an edi.
13 «Jaratqan İye: „Qa'nekey, jolg'a shıg'ın'lar, Zered da'ryasınan o'tin'ler“, – dedi. Bizler Zered da'ryasınan o'ttik.
14 Qadesh-Barniyadan jolg'a shıg'ıp, Zered da'ryasınan o'temen degenshe, otız segiz jıl jol ju'rdik. Jaratqan İyenin' ant iship aytqanınday, usı waqıtqa kelip, İzrail xalqınan bunnan aldıng'ı a'wladtın' barlıq urısqa jaramlıları joq bolg'an ediю
15 Ha'tteki, Jaratqan İye olardı ordadan joq qılıw ushın, olarg'a qarsı qol ko'terdi.
16 Sol urısqa jaramlılardın' barlıg'ı o'lip, xalıq arasınan joq bolg'annan keyin,
17 Jaratqan İye mag'an bılay dedi:
18 „Bu'gin Ar qalasının' jolınan, Moab jerlerinen o'tesizler.
19 Ammon xalqına jaqınlasqanın'ızda, olarg'a hu'jim qılıp, urıs ashpan'lar. Sebebi ammonlardın' jerinen sizlerge mu'lik bermeymen. Men ol jerdi mu'lik etip Luttın' urpag'ına berdim“».
20 Burın bul jer de refa xalqının' eli dep esaplanatug'ın edi. Refa xalqı olardan aldın sol jerde jasag'an edi. Ammon xalqı olardı zamzumlar dep ataytug'ın edi.
21 Zamzumlar anaq xalqınday uzın boylı, ku'shli ha'm ko'p edi. Biraq Jaratqan İye olardı ammon xalqının' aldında qıyrattı. Ammonlar zamzumlardın' jerlerin basıp alıp, sol jerge jaylasıp alg'an edi.
22 Jaratqan İye Seirde jasaytug'ın Esaw urpag'ı ushın da solay islep, xor xalqın olardın' aldında qıyrattı. Esaw a'wladları xorlardın' jerlerin basıp alıp, sol jerge jaylasqan edi. Olar bu'gin de sol jerde jasaydı.
23 Kaftordan kelgen kaftorlılar da Gazag'a deyin sozılg'an awıllarda jasaytug'ın aw xalqın joq etip, olardın' jerlerine jaylasıp alg'an edi.
24 «Bizler Moab jerinen o'tkenimizden keyin, Jaratqan İye bizlerge: „Endi jolg'a shıg'ın'lar! Arnon da'ryasınan o'tin'ler! Mine, amor xalqının' Xeshbondag'ı patshası Sixondı ha'm onın' elin sizlerge ta'slim qılaman. Og'an hu'jim qılıp, jerin iyelep baslan'lar.
25 Bu'ginnen baslap Men jer ju'zindegi xalıqlardı sizlerden hu'reyi ushıp, qorqatug'ın qılaman. Olar sizler tuwralı esitkende, qorqıwdan titireytug'ın boladı“, – dedi».
26 «Sonnan keyin, men Kedemot sho'linen Xeshbon patshası Sixong'a elshiler arqalı tınıshlıq kelisimin usınıp, mına xabardı jiberdim:
27 „Sizin' elin'izden o'tip ketiwimizge ruxsat berin'iz. Bizler on'g'a da, solg'a da burılmay tuwrı joldan o'tip ketemiz.
28 Jeytug'ın awqatımızdı da, ishetug'ın suwımızdı da sizden gu'miske satıp alamız. Tek g'ana jerin'izden o'tip ketsek boldı.
29 Seirde jasaytug'ın Esaw a'wladları menen Arda jasaytug'ın Moab xalqı o'z shegaralarınan o'tiwimizge ruxsat berdi. Siz de jerin'izden o'tip ketiwimizge ruxsat bersen'iz. İordan da'ryasınan o'tip, Qudayımız Jaratqan İye bizlerge beretug'ın jerge jetip alayıq“.
30 Degen menen, Xeshbon patshası Sixon jerinen o'tiwimizge ruxsat bermedi. Sebebi Qudayın'ız Jaratqan İye bu'gin ko'rip turg'anın'ızday, Sixondı sizlerge ta'slim qılıw ushın, onın' ju'regin tas etip, o'jet qılıp qoyg'an edi.
31 Jaratqan İye mag'an: „Mine, Sixondı ha'm onın' elin sag'an ta'slim qılıp atırman. Endi onın' elin qolg'a kirgizip, iyelep alıwdı basla“, – dedi.
32 Sixon bizler menen urısıw ushın, Yahasta barlıq a'skerleri menen bizlerge qarsı shıqtı.
33 Qudayımız Jaratqan İye onı bizlerge ta'slim qıldı. Sixondı, onın' ulların ha'm pu'tkil xalqın qırıp tasladıq.
34 Olardın' barlıq qalaların qolg'a kirgizip, ha'mmesin joq qıldıq. Erkek, hayal ha'm balalarınan hesh birin aman qaldırmadıq.
35 Tek g'ana olardın' haywanların ha'm qalalarındag'ı mal-mu'liklerin o'zlerimizge olja etip aldıq.
36 Arnon sayının' shetinde jaylasqan Aroerden ha'm saydın' ishindegi qaladan baslap Giladqa deyin hesh bir qala bizlerden u'stem kelmedi. Sebebi Qudayımız Jaratqan İye ha'mmesin bizlerge ta'slim qılg'an edi.
37 Biraq Qudayımız Jaratqan İyenin' buyrıg'ı boyınsha ammonlardın' eline, Yabboq da'ryasının' boylarındag'ı ha'm tawlı u'lkedegi qalalarg'a jaqınlamadıq».
