3 Yuxan 1 bob
1 Men, Yuxan aqsaqaldan, shın ju'regimnen su'yetug'ın su'yikli tuwısqanım Gayusqa sa'lem!.
2 Su'yikli tuwısqanım! Ruwxıy o'mirin' saw bolg'anday, ha'mme na'rsede tabısqa erisip, denin' saw bolıwı ushın duwa etip atırman.
3 Ayırım tuwısqanlarımız kelip, senin' haqıyqatqa sadıq ekenin' ha'm haqıyqat jolı menen ju'rgenin' haqqında gu'walıq bergende qattı quwandım.
4 Menin' ushın balalarımnın' haqıyqat jolı menen ju'rgenin esitiwden artıq quwanısh joq.
5 Su'yikli tuwısqanım! Biytanıs bolıwına qaramay, sen tuwısqanlarımızg'a shın ju'rekten ja'rdem berip atırsan'.
6 Olar iseniwshiler ja'ma'a'ti aldında senin' su'yispenshiligin' haqqında gu'walıq berdi. Olardı Qudayg'a mina'sip tu'rde jolg'a atlandırıp jibersen', jaqsı is qılg'an bolar edin'.
7 Sebebi olar isenbeytug'ın adamlardan hesh qanday ja'rdem qabıl etpey, İysanın' atı ushın jolg'a shıqqan edi.
8 Sonlıqtan haqıyqatqa sherik bolıwımız ushın bunday adamlardı qollapquwatlawımız kerek.
9 Men iseniwshiler ja'ma'a'tine bazı na'rselerdi jazg'an edim, biraq olardın' arasında birinshi bolıwdı jaqsı ko'retug'ın Diotref bizlerdi qabıl etpey atır.
10 Sonlıqtan eger barsam, onın' islerin a'shkara etemen. Ol bizlerdi jaman so'zler menen nadurıs ayıplap ju'r. Bular jetpegendey, ol tuwısqanlardı da qabıl etpey atır, ha'tte, qabıl qılmaqshı bolg'anlarg'a tosqınlıq jasap, olardı ja'ma'a'tten quwıp atır.
11 Su'yikli tuwısqanım, jaman emes, jaqsı o'rnek al. Jaqsılıq isleytug'ın adam Qudaydan. Jamanlıq isleytug'ın adam Qudaydı ko'rgen emes.
12 Dimitriy haqqında ha'mme adam, haqıyqattın' o'zi de jaqsı gu'walıq berip atır. Bizler de jaqsı gu'walıq berip atırmız. Gu'walıg'ımızdın' durıs ekenin sen bilesen'.
13 Sag'an jazajaq ko'p na'rselerim bar edi, biraq sıya ha'm qa'lem menen jazıwdı qa'lemeymen.
14 Seni tez arada ko'riw u'mitindemen, sonda ju'zbe-ju'z so'ylesemiz.
15 Aman bol! Doslar sag'an sa'lem aytıp atır. Sen de sol jerdegi doslarg'a atpa-at sa'lem aytıp qoy.
- 1
