Rimliler 12 bob
1 Solay etip, ha'y tuwısqanlarım, Qudaydın' miyrim-sha'pa'a'ti haqı sizlerge jalbarınaman: o'zlerin'izdi Qudayg'a unaytug'ın muxaddes ha'm tiri qurbanlıq qılıp, Og'an bag'ıshlan'lar. Bul sizlerdin' Quday aldındag'ı ılayıqlı xızmetin'iz boladı.
2 Bul du'nyanın' adamlarına eliklemen'ler. Al Qudaydın' oy-pikirlerin'izdi jan'alap, Onın' sizlerdi tolıq o'zgertiwine jol qoyın'lar. Sonda sizler Qudaydın' jaqsı ha'm minsiz erkin, yag'nıy Og'an nenin' unaytug'ının ayırıp bilesizler.
3 Qudaydın' mag'an bergen miyriminen paydalanıp, ha'mmen'izge aytıp atırman: o'zin'izdi shekten tıs joqarı bahalaman'lar. Kerisinshe, ha'r bir adam Qudaydın' o'zine bergen isenimine qaray, o'zin ılayıqlı bahalasın.
4 O'ytkeni denemiz bir bolsa da, mu'shelerimiz ko'p ha'm mu'shelerimizdin' atqaratug'ın xızmeti de ha'r tu'rli.
5 Sol sıyaqlı, bizler ko'p adam bolsaq ta, Masixtın' bir denesin quraymız ha'm o'z ara baylanıs jasaytug'ın bir denenin' mu'shelerimiz.
6 Qudaydın' bizlerge bergen miyrimi boyınsha, bizler ha'r tu'rli ruwxıy sıylarg'a iyemiz. Kimnin' payına payg'ambarshılıq etiw sıyı tiyse, ol isenimine qaray payg'ambarshılıq etsin.
7 Xızmet etiw tiyse, xızmet etsin. Ta'lim beriw tiyse, ta'lim bersin.
8 Al kimnin' payına jubanısh beriw tiyse, jubanısh bersin. U'lestiriwshi bolıw tiyse, shın kewilden u'lestirsin. Basshılıq etiw tiyse, g'ayrat penen basshılıq etsin. Miyrim-sha'pa'a't etiw tiyse, quwanıshlı tu'rde miyrim-sha'pa'a't ko'rsetsin.
9 Su'yispenshiligin'iz haqıyqıy bolsın. Jamanlıqtan qashıp, jaqsılıqqa jabısıp alın'lar.
10 Bir-birin'izdi tuwısqanlıq su'yispenshilik penen shın ju'rekten su'yin'ler. Bir-birin'izge o'z ara hu'rmet ko'rsetiwge tırısın'lar.
11 İntan'ız pa'seymesin. Erinshek bolman'lar. İyemizge jalınlı ruwx penen xızmet etin'ler.
12 U'mit etip, quwanıp jasan'lar. Qıyınshılıqlarda sabırlı bolın'lar. U'zliksiz duwa etin'ler.
13 Mu'ta'jlikte jasap atırg'an iseniwshiler menen barın'ızdı bo'lisin'ler. Miymandos bolıwg'a tırısın'lar.
14 Sizlerdi quwdalaytug'ınlar ushın Qudaydan jaqsılıq tilen'ler. G'arg'ıs emes, al jaqsılıq tilen'ler.
15 Quwanıp atırg'anlar menen birge quwanıp, jılap atırg'anlar menen birge jılan'lar.
16 O'z ara awızbirishilikli bolın'lar: menmenlikke berilmey, basqalar pa's ko'retug'ın adamlar menen qatnas jasan'lar. O'zlerin'izdi basqalardan aqıllı sanaman'lar.
17 Hesh kimnin' jamanlıg'ına jamanlıq penen juwap qaytarman'lar. Ha'mmenin' oyı boyınsha jaqsı dep sanalg'an islerdi islewge tırısın'lar.
18 Eger mu'mkin bolsa, qolın'ızdan kelgenshe, barlıq adamlar menen tatıwlıqta jasan'lar.
19 Su'yikli tuwısqanlarım! O'zin'iz ushın o'sh alman'lar. Al bunı Qudayg'a tapsırın'lar. Sebebi Muxaddes Jazıwda İyemiz bılay deydi: «O'sh alıw Menin' qolımda, sazayın O'zim beremen».
20 Kerisinshe: «Dushpanın' ash bolsa, onı toydır, Sho'llegen bolsa, suw ber. Sen usılay islesen', Onı uyatqa qaldırasan'» .
21 Jamanlıqtan jen'ilme. Al, jamanlıqtı jaqsılıq penen jen'.
