2 Korinfliler 10 bob
1 «Bizler menen birge bolg'an waqtında juwas, biraq aramızda bolmag'an waqtında qatal», – dep ayırımların'ız so'z qılatug'ın men, Pavel, Masixtın' mu'la'yimliligi ha'm sabırlılıg'ı menen sizlerden o'tinemen:
2 sizlerge barg'anımda, o'zimdi qatal tutıwg'a ma'jbu'r qılman'lar. O'ytkeni bizlerdi bul du'nyadag'ı adamlar sıyaqlı denesinin' qa'lewi boyınsha jasap atır, dep sanaytug'ın geybirewlerge qarsı qatal bolaman degen niyetim bar.
3 Bizler du'nyada jasap atırg'an bolsaq ta, du'nyanın' jolı menen urıspaymız.
4 Bizlerdin' urısımızdın' quralları du'nyag'a tiyisli qurallar emes, al dushpannın' bekkem qorg'anların qıyratatug'ın Qudaydın' qu'diretine iye bolg'an qurallar.
5 Sol qurallar menen sandıraq so'zlerdi ha'm Qudaydı biliwge tosqınlıq qılatug'ın ha'r qanday menmenlikti joq qılamız, Masixqa boysınbaytug'ın ha'r bir oypikirdi Masixqa tutqın etip boysındıramız.
6 Sizler Masixqa tolıq boysıng'anın'ızda, Og'an boysınbag'an aran'ızdag'ı ha'r bir adamdı jazalawg'a tayarmız.
7 Sizler tek sırtqı ko'riniske qarap baha beresizler. Eger kim de kim o'zinin' Masixqa tiyisli ekenine isense, onda ol bizlerdin' de Masixqa tiyisli ekenimizdi bilsin.
8 İyemizdin' bizlerge bergen biyligi menen biraz ko'birek maqtansam da, uyalmayman. Bul biylik sizlerdi qulatıw ushın emes, al tiklew ushın berilgen.
9 Men xatlarım menen sizlerdi qorqıtıp atırg'anday bolıp ko'ringim kelmeydi.
10 Sebebi geybirewler: «Xatlarında ol qatal ha'm ku'shli, biraq ju'zbe-ju'z ko'riskenimizde ha'lsiz ha'm so'zge de sheber emes», – deydi eken.
11 Biraq, bunday adamlar bilip qoysın: sizlerden uzaqta bolıp, xatlarımızda ne desek, aran'ızda bolg'anımızda da, solay is tutamız.
12 O'zlerin a'hmiyetli etip ko'rsetip atırg'an ayırım adamlar menen o'zlerimizdi ten'lestirgimiz yamasa salıstırg'ımız kelmeydi. Olar o'zlerin o'z o'lshemleri menen bahalaydı ha'm o'zlerin o'zleri menen g'ana salıstıradı. Olar qanshelli aqılsız!
13 Sizler jasaytug'ın jer usı jer shegarası ishinde jaylasqanlıqtan, bizler sizlerge Masixtın' Xosh Xabarın birinshi bolıp jetkizgenimizde, shegaradan tıs shıg'ıp ketpedik.
14 Sizler jasaytug'ın jer usı jer shegarası ishinde jaylasqanlıqtan, bizler sizlerge Masixtın' Xosh Xabarın birinshi bolıp jetkizgenimizde, shegaradan tıs shıg'ıp ketpedik.
15 Bizler basqalardın' miyneti menen maqtanıp ha'ddimizden aspaymız. Kerisinshe, isenimin'izdin' o'siwi menen aran'ızdag'ı miynetimizdin' ko'lemi ken'eye beriwinen u'mit etemiz.
16 Solay etip, bizler Xosh Xabardı sizlerden uzag'ıraq jerlerge ja'riyalay alamız. O'ytkeni basqanın' islegen xızmeti menen maqtanıwdı qa'lemeymiz.
17 Muxaddes Jazıwda aytılg'anday: «Maqtanatug'ın adam İyemiz benen maqtansın».
18 Sebebi o'zin o'zi maqtag'an adam emes, al İyemiz maqtag'an adam haqıyqattan qa'dirleniwge ılayıqlı.
