2 Korinfliler 11 bob
1 Menin' biraz aqılsız adamday bolıp endi aytatug'ın so'zlerime sizlerdin' shıdawın'ızdı qa'ler edim. Awa, men sizlerden usını o'tinish etemen!
2 Sizlerdi Qudaydın' qızg'anıshı menen qızg'anaman. O'ytkeni men sizlerdi bir pa'k qız sıyaqlı jalg'ız ku'yewge, yag'nıy Masixqa usınıp, Og'an nekeledim.
3 Biraq, jılannın' Hawa-eneni hiylekerlik penen aldag'anınday, sizlerdin' aqıl-oyların'ızdın' da buzılıp, Masixqa degen haqıyqıy ha'm pa'k sadıqlıqtan awıp ketiwinen qorqaman.
4 Sebebi birew kelip, bizler ja'riyalag'an İysanı basqasha qılıp ja'riyalag'anda, sizler isenesizler. Ja'ne de, o'zlerin'iz alg'an Muxaddes Ruwxtan basqa bir ruwxtı ha'm o'zlerin'iz qabıl etken Xosh Xabardan basqa bir «xosh xabardı» an'sat qabıl etesizler.
5 Sizler «ma'rtebeli elshiler» dep ataytug'ın sol adamlardan men o'zimdi hesh bir na'rsede kem sanamayman!
6 Men so'zge sheber bolmasam da, bilimim jetkilikli. Bunı sizlerge ha'r qanday jag'dayda ha'm ha'r ta'repleme ashıq ko'rsettik.
7 Sizlerdin' ma'rtebeli bolıwın'ız ushın, men o'zimdi pa's qoyıp, Qudaydın' Xosh Xabarın sizlerge esheyin ja'riyaladım. Menin' usılay islegenim gu'na ma?
8 Sizlerge xızmet etiw ushın, men basqa iseniwshi ja'ma'a'tlerden aqshalay ja'rdem alıp, olardı tonag'anday boldım.
9 Aran'ızda bolg'an waqtımda mu'ta'jligim bolsa da, hesh birin'izge awırmanlıq salmadım. O'ytkeni Makedoniyadan kelgen tuwısqanlarımız mu'ta'jliklerimnin' ornın toltırdı. Men sizlerge hesh bir na'rsede awırmanlıq salmawg'a tırıstım ha'm bunnan bılay da tırısa beremen.
10 O'zimdegi Masixtın' haqıyqatı menen bildiremen: Axaya u'lkesindegi hesh bir adam menin' usı maqtanıwımdı toqtata almaydı.
11 Men ne sebepten usılay islep atırman? Sizlerdi su'ymegenim sebepli me? Menin' sizlerdi su'yetug'ınımdı Quday biledi.
12 O'zlerin bizlerge ten'lestirmekshi bolıp maqtanıp atırg'an sol adamlarg'a jol bermew ushın, men sizlerge awırmanlıq salmadım ha'm solay islewdi dawam ete beremen.
13 Sebebi jalg'an elshiler ha'm o'tirik jumısshılar bolg'an bunday adamlar o'zlerin Masixtın' elshileri qılıp ko'rsetedi.
14 Biraq, bul tan' qalarlıq na'rse emes. Shaytan da o'zin nur perishtesi qılıp ko'rsetedi-g'o.
15 Sonlıqtan onın' xızmetshilerinin' o'zlerin haqıyqattın' xızmetshileri qılıp ko'rsetiwi de tan' qalarlıq na'rse emes. Quday aqırında bunday adamlarg'a islegen islerine qaray ılayıqlı jaza beredi.
16 Men ja'ne ta'kirarlap aytaman: hesh kim meni aqılsız dep sanamasın. Eger sizler aqılsız dep sanasan'ız, meni hesh bolmasa aqılsız adam sıpatında qabıl etin'ler, sonda men de az-maz maqtanayın
17 So'ylep atırg'an so'zlerimdi İyemizdin' basqarıwında aytıp atırg'an joqpan, al o'zine isenetug'ın aqılsız maqtanshaqtay bolıp aytıp atırman.
18 Ko'pler o'zleri menen du'nyanın' ko'z qarası boyınsha maqtang'anlıqtan, men de maqtanajaqpan.
19 Sizler o'zlerin'izdi sonday aqıllımız dep sanap turıp, aqılsızlarg'a jan-jan dep shıdaysızlar!
20 Birew sizlerdi qul qılsa da, haqın'ızdı jese de, talasa da, o'zin sizlerden joqarı tutıp, u'stemlik etse de yamasa betin'izge shapalaq penen ursa da shıdaysızlar.
21 Biraq, sizlerdin' oyın'ız boyınsha ha'lsiz bolıp esaplang'an bizler bunday islerdi islewge uyalamız! Degen menen, birewdin' ne menen bolsa da maqtanıwg'a batılı barsa, menin' de maqtanıwg'a batılım jetedi. Men bunı aqılsız adam sıyaqlı aytıp atırman.
22 Sol jalg'an elshiler yahudiymiz dey me? Men de yahudiymen. Olar izraillılarmız dey me? Men de izraillıman. Olar İbrayımnın' urpag'ımız dey me? Men de İbrayımnın' urpag'ıman.
23 Olar Masixtın' xızmetkerlerimiz dey me? Aqıldan azg'an adam sıyaqlı aytıp atırman: men Masixqa olardan go're ko'birek xızmet ettim. Men olarg'a qarag'anda ko'birek miynet ettim, ko'p ma'rtebe qamaqta boldım, sansız ret tayaq jedim ha'm talay ma'rtebe o'lim menen ju'zbe-ju'z ushırastım.
24 Yahudiylerden bir kem qırıqtan, bes ret qamshı jedm.
25 U'sh ma'rtebe tayaq jedim, bir ma'rtebe tas penen urdı. U'sh ma'rtebe kemede apatqa ushırap, bir ku'n, bir tu'n ten'izde ıg'ıp ju'rdim.
26 Ko'p ma'rtebe saparg'a shıqqanımda, qa'wip astında boldım: da'ryalardag'ı suw tasqını sebepli, qaraqshılar sebepli, o'z milletimnin' adamları sebepli ha'm basqa millet adamları sebepli, ja'ne qalada, sho'lde, ten'izde ha'm jalg'an tuwısqanlar sebepli qa'wip-qa'terge ushıradım.
27 Awır miynet etip, qıyınshılıq ko'rdim. Ko'p tu'nlerdi uyqısız o'tkizdim, ashlıq ha'm sho'ldi basımnan keshirdim. Talay ma'rtebe awqatsız qalıp, suwıqta kiyimsiz boldım.
28 Bulardın' ha'mmesinen tısqarı, ku'n sayın barlıq iseniwshi ja'ma'a'tlerdin' g'am-ta'shiwishleri en'semdi basıp, meni oylandıradı.
29 Qaysı da'rmensizler menen, men birge da'rmensizlenbedim? Qaysı azg'ırılg'an adam ushın, men ku'yip-janbadım?
30 Sizler meni maqtanıwg'a ma'jbu'r etkenin'iz sebepli, men ha'lsizligimdi ko'rsetken na'rseler menen maqtanaman.
31 İyemiz İysanın' A'kesi, ma'n'gige alg'ıslanatug'ın Quday biledi: men o'tirik so'ylep atırg'an joqpan.
32 Men Damask qalasında bolg'anımda, Aretas patshanın' qol astındag'ı bir ha'kim qala da'rwazasın qarawıllatıp, meni qolg'a almaqshı boldı.
33 Biraq, iseniwshi tuwısqanlarımız meni sebetke salıp, qala diywalındag'ı terezeden tu'sirip jiberdi ha'm men usılay etip onın' qolınan qashıp qutıldım.
