2 Korinfliler 13 bob
1 Men sizlerge u'shinshi ma'rtebe barajaqpan. Muxaddes Jazıwda aytılg'anday: «Ha'r bir is eki yamasa u'sh adamnın' gu'walıg'ı tiykarında qaraladı».
2 Bunnan aldın aran'ızda ekinshi ma'rtebe bolg'anımda eskertken edim. Endi ha'zir sizlerden uzaqta bolg'anımda da ta'kirarlap eskertip atırman: men sizlerge ja'ne barg'anımda, burın gu'na islegenlerdin' de, basqa ha'mme adamlardın' da hesh birin ayamayman!
3 Sebebi sizler Masixtın' men arqalı so'yleytug'ınına da'lil izleysizler. Masix sizlerge degen is-ha'reketinde ha'lsiz emes, Ol sizlerdin' aran'ızda O'z qu'diretin ko'rsetedi.
4 Ol ha'lsiz bolıp atanaq ag'ashqa shegelense de, ha'zir Qudaydın' qu'direti menen jasap atır. Masix penen qatnasta bolg'an bizler de ha'lsiz bolsaq ta, Onın' menen birge Qudaydın' qu'direti arqalı sizlerdin' paydan'ız ushın jasaymız.
5 İsenimde turg'an ya turmag'anın'ızdı biliwin'iz ushın, o'z-o'zin'izdi sınap ko'rin'ler. İysa Masixtın' ishin'izde ekenligin bilmeysizler me? Eger bilmesen'iz, sınawdan o'te almay jıg'ılg'an bolar edin'iz.
6 Bizlerdin' sınawdan o'tkenimizdi biletug'ının'ızdan men u'mit etemen.
7 Hesh qanday jamanlıq islemewin'izdi sorap, bizler Qudayg'a duwa etemiz. Bundag'ı maqsetimiz o'zlerimizdin' sınawdan o'tkenimizdi ko'rsetiw emes, al bizler sınawdan o'tpegen bolıp ko'rinsek te, sizlerdin' jaqsılıq islewin'izden ibarat.
8 O'ytkeni bizler haqıyqatqa qarsı hesh na'rse isley almaymız, al tek haqıyqat ushın ha'reket etemiz.
9 O'zlerimiz ha'lsiz, al sizler ku'shli bolsan'ız, bizler quwanamız. Bizler sizlerdin' tuwrılanıp, jetilisip barıwın'ız ushın da duwa etemiz.
10 Sonlıqtan sizlerge kelgen waqtımda İyemizdin' mag'an bergen biyligi menen qatallıq qollanıwg'a ma'jbu'r bolmawım ushın, bul na'rselerdi aran'ızda bolmag'an waqtımda jazıp atırman. Men bul biylikti sizlerdi qulatıw ushın emes, al tiklew ushın alg'anman.
11 Qullası, tuwısqanlarım, xosh bolın'lar. Jetilisip barın'lar, menin' aytqanlarıma qulaq asın'lar, bir oy-pikirli bolın'lar ha'm tatıwlıqta jasan'lar. Su'yispenshilik ha'm tınıshlıq tiykarı bolg'an Quday sizler menen birge boladı.
12 Bir-birin'izdi muxaddes posa menen su'yip sa'lemlesin'ler. Barlıq iseniwshiler sizlerge sa'lem aytıp atır.
13 İyemiz İysa Masixtın' miyrimi, Qudaydın' su'yispenshiligi ha'm Muxaddes Ruwxtın' sherikligi ha'mmen'izge yar bolsın!
