2 Korinfliler 3 bob
1 Bizlerdi ja'ne o'zlerin maqtap atır, dep oylaysız ba? Ayırım adamlar sıyaqlı, sizlerge ko'rsetiw ushın yamasa sizlerden alıp basqalarg'a ko'rsetiw ushın, minezlememiz jazılg'an xatlarg'a bizler mu'ta'jbiz be?
2 Bizlerdin' minezleme xatımız – sizler bolasızlar. Bul xat bizlerdin' ju'reklerimizde jazılg'an bolıp, onı barlıq adamlar biledi ha'm oqıydı.
3 Sizler haqıyqattan da, bizlerdin' xızmetimiz arqalı jazılg'an Masixtın' xatı ekenin'izdi anıq ko'rsetesizler. Bul xat sıya menen emes, al tiri Qudaydın' Ruwxı menen jazıldı ha'm ol tasqa emes, al adamlardın' ju'reklerine oyıp jazıldı.
4 Bizler Masix arqalı Quday aldında usınday isenimge iye bolg'anımız sebepli, bulardı aytıp atırmız.
5 Bizler xızmetimizdi uqıplı bolg'anımız sebepli atqarıp atırmız, demekshi emespen. Bizlerdegi bar uqıp o'zimizden shıqpag'an, al Qudaydan berilgen.
6 Quday bizlerdi Jan'a Kelisimnin' xızmetshileri qıldı. Jan'a Kelisim jazılg'an nızam tiykarında emes, al Muxaddes Ruwx tiykarında payda boldı. Sebebi jazılg'an nızam o'limge hu'kim etedi, al Muxaddes Ruwx o'mir beredi.
7 Tasqa oyıp jazılg'an ha'riplerden ibarat bolg'an Muxaddes Nızam ullılıq penen berilgenlikten, İzrail xalqı Muwsanın' ju'zinen shıqqan o'tkinshi nurg'a qaray almag'an edi. O'limge hu'kim etetug'ın Muxaddes Nızamg'a xızmet etiw sonshelli ullı bolsa,
8 onda o'mir beretug'ın Muxaddes Ruwxqa xızmet etiw onnan anag'urlım ko'p ullılıqqa iye emes pe?
9 Adamdı hu'kim etken Muxaddes Nızamg'a xızmet etiw ullı bolg'an bolsa, aqlanıw beretug'ın Jan'a Kelisimge xızmet etiw onnan go're qanshelli ullıraq boladı!
10 Haqıyqattan da, joqarı ullılıqqa iye bolg'an Jan'a Kelisim payda bolg'anda, burın ullılıqqa iye bolg'an Muxaddes Nızam o'z ullılıg'ın joyttı.
11 Solay etip, o'tkinshi bolg'an na'rse ullı bolsa, ma'n'gi qalatug'ın na'rse onnan da ullıraq.
12 Usınday u'mitke iye bolg'anımız sebepli u'lken batırlıq penen so'yley alamız.
13 Bizler ju'zindegi o'ship baratırg'an nurdı İzrail xalqına ko'rsetpew ushın ju'zin perde menen japqan Muwsa sıyaqlı is tutpaymız.
14 Biraq, İzrail xalqının' ju'regi qaysar bolg'anlıqtan, ha'tte, usı ku'nge deyin olar Eski Kelisimdi oqıg'anda, olardın' sanası sonday perde menen jabıwlı turg'anday boladı. O'ytkeni bul perde tek Masix arqalı alıp taslanadı.
15 Haqıyqattan da, usı ku'nge deyin olar Muwsanın' kitabın oqıg'anda, ju'rekleri perde menen jabılg'anday bolıp tu'sinbeydi.
16 Degen menen, adam İyemizge ju'z burg'anda, sol perde alıp taslanadı.
17 İyemiz – Ruwx. İyemizdin' Ruwxı bar jerde azatlıq bar.
18 Bizlerdin' ha'mmemiz perdesiz ju'z benen İyemizdin' ullılıg'ın ko'remiz. Sol arqalı Og'an uqsaw ushın o'zgerip, ullılıq u'stine ullılıqqa erisip baramız. Bul Ruwx bolg'an İyemizdin' ja'rdeminde iske asadı.
