2 Korinfliler 5 bob
1 Bizler ishinde jasap atırg'an du'nyadag'ı bul shatırımız, yag'nıy denemiz qıyralg'anda, Quday bizlerge adamnın' qolı menen qurılmag'an aspandag'ı ma'n'gilik u'yimizdi, yag'nıy jan'a deneni beretug'ının bilemiz.
2 Aspandag'ı u'yimizdi, yag'nıy jan'a denemizdi kiyim sıyaqlı kiyiwdi qattı ku'sep, ha'zir bizler du'nyadag'ı shatırımızda, yag'nıy denemizde «ah» urmaqtamız.
3 Onı kiysek, bizler jalan'ash qalmaymız.
4 Bizler du'nyadag'ı shatırımızda, yag'nıy denemizde jasap ju'rip, awır ju'k astında qıynalmaqtamız. Negizinde du'nyadag'ı denemizdi sheship taslawdı emes, al onın' u'stinen aspandag'ı denemizdi kiyiwdi qa'leymiz. Solay etip, o'letug'ın dene ma'n'gilik o'mir ta'repinen jutıp jiberiledi.
5 Bizlerdi usı ushın tayarlag'an ha'm bunın' girewi sıpatında bizlerge Muxaddes Ruwxtı bergen Qudaydın' O'zi boladı.
6 Sonlıqtan denede jasap atırg'an waqtımızda İyemizdin' aspandag'ı ma'kanınan uzaqta ekenimizdi bilsek te, bizler ba'rqulla batırlıqqa iyemiz.
7 O'ytkeni bizler ko'zge ko'rinetug'ın na'rselerge emes, al isenimimizge su'yenip jasaymız.
8 Awa, batırlıqqa iyemiz ha'm deneden shıg'ıp, İyemiz benen birge jasag'anımız jaqsıraq dep oylaymız.
9 Biraq denede jasasaq ta, deneden shıg'ıp ketsek te, bizler İyemizdin' kewlinen shıg'ıwg'a qattı tırısamız.
10 Sebebi denede jasag'an waqtımızda islegen jaqsı isimiz ushın da, jaman isimiz ushın da ılayıqlı baha alıw ushın, ha'r birimiz Masixtın' hu'kim gu'rsisinin' aldında turıwımız kerek.
11 Solay etip, bizler İyemizden qorqıwdın' ne ekenin bilgenimiz sebepli, adamlardı aqıllandırıwg'a ha'reket etemiz. Bizlerdin' qanday ekenligimiz Qudayg'a ayan. Bizlerdin' qanday ekenligimizdi sizler de jaqsı biletug'ının'ızdan u'mit etemen.
12 Bizler ja'ne sizlerge o'zlerimizdi usınıwg'a ha'reket etip atırg'an joqpız. Biraq ishki du'nyası menen emes, al sırtqı ko'rinisi menen maqtanatug'ın adamlarg'a ılayıqlı juwap beriwin'iz ushın, sizlerge bizler menen maqtanıwg'a mu'mkinshilik berip atırmız.
13 Eger bizler aqılımızdan azg'anday bolıp ko'rinsek, onda bul Quday ushın. Eger esimiz durıs bolıp ko'rinse, onda bul sizler ushın.
14 Usılay islewge bizlerdi Masixtın' su'yispenshiligi ma'jbu'r etedi. O'ytkeni bir Adam, yag'nıy Masix ha'mme ushın o'lgenlikten, ha'mme Onın' o'limine sherik bolg'an boladı, degen juwmaqqa keldik.
15 Awa, Masix ha'mme ushın o'ldi. Solay eken, jasap atırg'anlar endi o'zleri ushın emes, al o'zleri ushın o'lgen ha'm qayta tirilgen Masix ushın jasawı sha'rt.
16 Sonlıqtan bizler endi hesh kimge du'nyanın' ko'z qarası menen qaramaymız. Masixqa burın usılay qarag'an bolsaq ta, endi olay qaramaymız.
17 Solay etip, kim de kim Masix penen baylanısqa iye bolsa, ol – jan'a jaratılıs. Eski na'rseler o'tip ketti, minekey, endi ha'mmesi jan'a boldı.
18 Bunın' ha'mmesi Qudaydan. Quday Masix arqalı bizlerdi O'zi menen jarastırdı ha'm adamlardı O'zi menen jarastırıw xızmetin bizlerge tapsırdı.
19 Yag'nıy, Quday Masix arqalı du'nyanı O'zi menen jarastırıp, adamlardın' gu'naların esapqa almadı ha'm usı jarastırıwshı so'zlerdi bizlerge berdi.
20 Solay etip, bizler Masixtın' elshilerimiz. Qudaydın' O'zi bizler arqalı sizlerge aqıl-na'siyat berip atır. Masixtın' atınan jalbarınamız: Quday menen jarasın'lar!
21 Quday bizlerdin' gu'nalarımızdı hesh qashan gu'na islemegen Masixqa ju'kledi. Masix penen baylanısqa iye bolg'an bizler Quday aldında usı arqalı aqlandıq.
