2 Korinfliler 6 bob
1 Quday menen birge miynet etip atırg'an bizler o'zlerin'iz qabıl qılg'an Onın' miyrimine itibarsızlıq penen qaramawın'ızdı sizlerden o'tinish etemiz.
2 Sebebi Quday bılay deydi: «Menin' miyrimim beriletug'ın waqıtta seni esittim, Qutqarılıw ku'ninde sag'an ja'rdem berdim» . Minekey, ha'zir Qudaydın' miyrimi beriletug'ın waqıt boldı! Minekey, ha'zir qutqarılıw ku'ni keldi!
3 Xızmetimizge so'z kelmesin dep, hesh kimge hesh bir na'rsede tosqınlıq jasamaymız.
4 Al ha'mme na'rsede Qudaydın' xızmetkerleri sıpatında is tutamız: qıyınshılıq ko'rsek te, mu'ta'jlikte ha'm awır jag'daylarda qalsaq ta, sheksiz sabırlı boldıq.
5 Ja'ne de, tayaq jedik, qamaqta otırdıq, topalan' ishinde qaldıq, awır miynet ettik, tu'nlerdi uyqısız o'tkizdik, ash qaldıq.
6 Solay bolsa da, bizler pa'k boldıq, durıs tu'sinik, shıdamlılıq, ken' kewil, Muxaddes Ruwx ha'm haqıyqıy su'yispenshilik penen jasadıq.
7 Haqıyqat so'zin aytıp, Qudaydın' qu'diretin ko'rsettik. On' ha'm shep qolımızda haqlıq quralın uslap ju'rdik.
8 Bizlerdi hu'rmet etedi ha'm masqaralaydı da, bizlerge so'gis aytadı ha'm maqtaydı da. Bizlerdi o'tirikshiler dep esaplaydı, biraq bizler haqıyqattı aytamız.
9 Bizlerdi belgisiz adamlar dep sanaydı, biraq bizler ha'mmege belgilimiz. Bizlerdi o'lgen dep esaplaydı, biraq, mine, bizler tirimiz. Jazalanıp tayaq jesek te, o'lmey atırmız.
10 Bizlerdi qapa qıladı, biraq bizler ba'rqulla quwanıshlımız. Jarlımız, biraq ko'p adamlardı bayıtamız. Hesh na'rsemiz bolmasa da, ha'mme na'rsege iyemiz.
11 Ha'y korinfliler, bizler sizlerge ashıq so'ylep, ju'regimizdi ken' ashtıq.
12 Sizlerden miyrimimizdi ayamadıq, biraq sizler bizlerden o'z miyrimin'izdi ayadın'ız.
13 Sizlerge balalarıma so'ylegendey, so'ylep atırman: bizler sıyaqlı, sizler de bizlerge ju'reklerin'izdi ken' ashın'lar.
14 İsenbeytug'ınlar menen birge bir moyıntırıqtın' astına kirmen'ler. O'ytkeni haqlıq penen nızamsızlıqtın' arasında qanday uqsaslıq bar? Nur menen qaran'g'ılıqtın' arasında qanday baylanıs bar?
15 Masix penen shaytannın' arasında qanday kelisim ha'm isenetug'ın adam menen isenbeytug'ın adamnın' arasında qanday sheriklik bolıwı mu'mkin?
16 Qudaydın' ibadatxanası menen butlar arasında qanday birlik bolıwı mu'mkin? Hesh qanday! Sebebi bizler tiri Qudaydın' ibadatxanasımız. Quday bılay deydi: «Men olar arasında jasap, Olar arasında ju'retug'ın bolaman» . «Men olardın' Qudayı bolaman, Olar Menin' xalqım boladı».
17 Sol sebepten Quday İyemiz bılay deydi: «İsenbeytug'ın adamlar arasınan shıg'ıp, olardan bo'leklenin'ler. Haram na'rsege qol tiygizben'ler, Sonda Men sizlerdi qabıl etemen».
18 Ja'ne de, ha'mme na'rsege qu'diretli Quday İyemiz bılay deydi: «Men sizlerge A'ke bolaman, Sizler Menin' ul-qızlarım bolasızlar».
