Galatiyalılar 2 bob
1 Aradan on to'rt jıl o'tkennen son', Barnaba menen birlikte ja'ne Erusalimge bardım. Janıma Titustı da aldım.
2 Ol jerge Qudaydan alg'an ayanım sebepli bardım. Sol jerdegi ja'ma'a't jetekshileri menen jeke so'ylesip, basqa milletler arasında o'zim ja'riyalap ju'rgen Xosh Xabardı bayan ettim. İslegen miynetim ha'm ha'zir islep atırg'an is-ha'reketimnin' zaya ketpewi ushın usılay isledim.
3 Al olar menin' janımdag'ı Titustın' grek bolıwına qaramay, onı su'nnet etiliwge ma'jbu'rlemedi.
4 Biraq aramızg'a jasırın kirgen ayırım jalg'an tuwısqanlar bar edi. Olar bizlerge İysa Masix bergen azatlıqtı ko're almay, bizlerdi yahudiylerdin' nızamının' qulı qılmaqshı edi.
5 Al bizler Xosh Xabardın' haqıyqatı sizler menen ba'rqulla birge bolsın dep, olarg'a bir dem de boysınıp, ta'slim bolmadıq.
6 Erusalim ja'ma'a'tinin' jetekshileri qanshelli ataqlı bolsa da, men ushın ba'ri bir: Quday adamlardı ayırmaydı. Olar menin' ja'riyalaw isime qosımsha hesh na'rse ju'klemedi.
7 Kerisinshe, Xosh Xabardı yahudiylerge ja'riyalaw isi Petrge isenip tapsırılg'anday, basqa milletlerge ja'riyalaw isi mag'an isenip tapsırılg'anın olar bildi.
8 Sebebi Petrdi yahudiyler ushın elshi etip tayınlag'an Quday meni de basqa milletler ushın elshi etip tayınladı.
9 Ja'ma'a'tlerdin' tirekleri esaplang'an Yaqıp, Kifa ha'm Yuxan Qudaydın' mag'an bergen miyrimin moyınlap, mag'an ha'm Barnabag'a birdemlik qolların sozdı. Solay etip, bizlerdin' basqa milletlerge, al o'zlerinin' yahudiylerge ketiwin maqul ko'rdi.
10 Tek ele de jarlılarg'a ja'rdem beriwdi esten shıg'armawımızdı o'tinish etti. Men de bul isti shın kewilden islewge tırısıp kiyatırg'an edim.
11 Kifa Antioxiyag'a kelgende, onın' qa'tesin betine aytıp a'shkara ettim.
12 O'ytkeni Yaqıptın' janınan bazı adamlar kelmesten aldın Kifa basqa millet iseniwshileri menen birge awqat jeytug'ın edi. Biraq sol yahudiyler kelgende qorqıp, su'nnet etilmegen basqa millet iseniwshilerinen o'zin shetke aldı ha'm olar menen baylanıstı u'zdi.
13 Basqa yahudiyler de Kifag'a uqsap eki ju'zlilik isledi. Ha'tte, Barnaba da olardın' eki ju'zliligine berildi.
14 Olardın' Xosh Xabardın' haqıyqatı boyınsha is tutpay atırg'anın ko'rgenimde, ha'mmenin' aldında Kifag'a bılay dedim: «Sen yahudiy bola tura, yahudiy sıyaqlı emes, al basqa millet adamı sıyaqlı jasap atırsan'. Endi qalayınsha sen basqa millet adamların yahudiylesiwge ma'jbu'rleysen'?
15 Bizler yahudiy bolıp tuwıldıq, basqa milletler sıyaqlı gu'nakar emespiz.
16 Biraq ta, adam Muxaddes Nızamdı orınlap jasag'anı arqalı emes, al İysa Masixqa degen isenimi arqalı aqlanatug'ının bilemiz. Sonlıqtan bizler de Muxaddes Nızamdı orınlap jasag'anımız arqalı emes, al Masixqa degen isenimimiz benen aqlanamız dep, İysa Masixqa isendik. Sebebi hesh bir adam Muxaddes Nızamdı orınlap jasag'anı arqalı aqlanbaydı».
17 Eger İysa Masix arqalı aqlanıwdı izlep, o'zlerimiz gu'nakar bolıp shıqsaq, Masix bizlerdi gu'nag'a jetelewshi bolg'anı ma? Hesh qashan!
18 Eger men o'zim buzg'an yahudiy u'rp-a'detlerin qaytadan tiklesem, onda men o'zimnin' nızam buzıwshı ekenimdi da'lillegen bolaman.
19 Quday aldında jasaw ushın, Muxaddes Nızam arqalı men Muxaddes Nızam aldında o'lgenmen.
20 Men Masix penen birge atanaq ag'ashqa shegelengenmen. Endi jasap atırg'an men emes, al mende Masix jasap atır. Ha'zir denede jasap atırg'an o'mirimde meni su'ygen ha'm men ushın O'zin qurban etken Qudaydın' Ulına degen isenimim menen jasap atırman.
21 Men Qudaydın' miyrimin qa'dirsiz dep esaplamayman. Eger de Muxaddes Nızam arqalı aqlanıw mu'mkin bolg'anda, onda Masix biykarg'a o'lgen bolar edi.
