Efesliler 1 bob
1 Qudaydın' qa'lewi menen Masix İysanın' elshisi bolg'an men, Pavelden, Masix İysag'a sadıq bolg'an Efes qalasındag'ı iseniwshilerge sa'lem!
2 A'kemiz Quday ha'm İyemiz İysa Masix sizlerge miyrim ha'm tınıshlıq bersin!
3 İyemiz İysa Masixtın' A'kesi – Qudayg'a alg'ıs-maqtawlar bolsın! Ol bizlerdi Masix arqalı aspandag'ı ha'r tu'rli ruwxıy jarılqaw menen jarılqadı.
4 Quday O'zinin' aldında muxaddes ha'm minsiz bolıwımız ushın, Masix penen qatnasta bolg'an bizlerdi du'nya jaratılmastan burın tan'lap aldı. Quday bizlerdi su'yip,
5 İysa Masix arqalı O'zinin' balaları qılıp asırap alıw ushın, aldın ala belgiledi. Bul Onın' a'jayıp qa'lewi boyınsha boldı.
6 Solay etip, su'yikli Ulı arqalı bizlerge sıyg'a bergen ullı miyrimi sebepli O'zine alg'ıs aytıwımız ushın, Quday usılay isledi.
7 Masix penen qatnasta bolg'an bizler Onın' qanı arqalı qutqarıldıq, yag'nıy Qudaydın' bay miyrimi boyınsha gu'nalarımız keshirildi
8 Quday bul bay miyrimin pu'tkil aqıl-danalıq penen u'stilerimizge jawdırıp,
9 O'z erkinin' sırın bizlerge ashıp berdi. Bul Onın' Masix arqalı jobalastırg'an a'jayıp maqseti boyınsha boldı.
10 Belgilengen waqıt bolg'anda a'melge asatug'ın Qudaydın' jobası – jerdegilerdin' ha'm aspandag'ılardın' ha'mmesin Masixtın' basshılıg'ında birlestiriwden ibarat.
11 Ha'mme na'rseni O'z qa'lewi menen iske asıratug'ın Qudaydın' erki boyınsha bizler aldın ala belgilenip, Masix arqalı tan'lap alındıq.
12 Bul Masixqa bastan-aq u'mit etken bizlerdin' ullı Qudaydı alg'ıslawımız ushın boldı.
13 Haqıyqat so'zin, yag'nıy qutqarılıw haqqında Xosh Xabardı esitip, Masixqa isengenin'izde, sizler de wa'de etilgen Muxaddes Ruwx* penen mo'rlenip, Qudayg'a tiyisli boldın'lar.
14 Qudayg'a tiyisli bolg'an bizlerdin' tolıq qutqarılıwımızg'a deyin bul Muxaddes Ruwx – Qudaydın' bizlerge wa'de etken miyrasının' girewi. Bulardın' ha'mmesi bizlerdin' ullı Qudaydı alg'ıslawımız ushın boldı.
15 Sonlıqtan İyemiz İysag'a degen isenimin'iz ha'm pu'tkil iseniwshilerge degen su'yispenshiligin'iz haqqında esitkenimnen beri,
16 men sizler ushın tınbastan shu'kirlik etemen. Ja'ne de, duwa etkenimde, sizlerdi ba'rqulla tilge alaman.
17 İyemiz İysa Masixtın' Qudayı, dan'qsaltanatqa iye A'ke O'zin biliwin'iz ushın, sizlerge danalıq ha'm ayan beriwshi Muxaddes Ruwxın bersin dep, Qudaydan sorap atırman.
18 Qudaydın' shaqırıg'ınan payda bolg'an u'mitti ha'm Onın' iseniwshilerge bergen ullı miyrasının' qanshelli bay ekenin biliwin'iz ushın, ju'reklerin'izdin' ko'zleri ashılsın dep, duwa etip atırman.
19 Ja'ne de, İysag'a isengen bizlerde u'lken qu'diret penen ha'reket etken Qudaydın' ku'shinin' qanshelli ullı ekenin sizler bilsin dep te, duwa etip atırman.
20 Quday usı ku'sh penen Masixta ha'reket etip, Onı o'limnen qayta tiriltti ha'm aspanda O'zinin' on' jag'ına otırg'ızdı.
21 Quday Masixtı barlıq ha'kimshilik ha'm biylikten, pu'tkil qu'diret ha'm hu'kimdarlıqtan, tek usı zamanda emes, al keleshek da'wirde de atalatug'ın ha'mme atlardan joqarı qoydı.
22 Ha'mme na'rseni Og'an boysındırıp, bag'ındırdı. Onı pu'tkil barlıqtın' u'stinen qoyıp, iseniwshiler ja'ma'a'tinin' bası qıldı.
23 İseniwshiler ja'ma'a'ti Masixtın' denesi bolıp, pu'tkil barlıqtı toltırıp turg'an Masixtın' tolılıg'ına iye.
