Efesliler 2 bob
1 Sizler bir waqıtları ayıp ha'm gu'naların'ız sebepli o'li edin'ler.
2 Sonda sizler bul du'nyanın' a'deti boyınsha, hawada hu'kimdarlıq etiwshi ha'kim – shaytang'a, yag'nıy ha'zir Qudayg'a qulaq aspaytug'ın adamlarda ha'reket etiwshi ruwxqa boysınıp jasaytug'ın edin'ler.
3 Bir waqıtları bizlerdin' ha'mmemiz de usınday adamlardın' arasında o'z gu'nakar ta'biyatımız boyınsha jasadıq. Denemizdin' ha'm oyniyetimizdin' jaman qa'lewlerin orınladıq. Sol sebepten basqalar sıyaqlı bizler de ta'biyatımız boyınsha Qudaydın' g'a'zebine ılayıqlı adamlar edik.
4 Biraq, miyrim-sha'pa'a'tke bay bolg'an Quday bizlerdi sonshelli su'ygenlikten,
5 gu'nalarımız sebepli o'li bolsaq ta, bizlerdi Masix penen birge tiriltti. Sizler Onın' miyrimi menen qutqarıldın'ız.
6 Bizler Masix İysa menen qatnasta bolg'anlıqtan, Quday bizlerdi Masix penen birge tiriltip, Onın' menen birge Aspan Patshalıg'ında otırg'ızdı.
7 Quday Masix İysa arqalı bizlerge rehim etip, O'z miyriminin' sheksiz baylıg'ın keleshek da'wirlerde ko'rsetiw ushın usılay isledi.
8 Sizler isenimin'iz arqalı Qudaydın' miyrimi menen qutqarıldın'ız. Bul sizlerdin' jetiskenligin'iz emes, al Qudaydın' sıyı bolg'anlıqtan,
9 hesh kim islerim sebepli qutqarılg'anman dep, maqtana almaydı.
10 Sebebi bizler Qudaydın' do'retpesimiz. O'zi aldın ala tayarlag'an jaqsı islerin islep jasawımız ushın, Ol bizlerdi Masix İysa arqalı jarattı.
11 Sonlıqtan mınalardı eske tu'sirin'ler: sizler bir waqıtları butqa tabınıwshı millet adamı bolıp tuwılıp, denesindegi eti qol menen kesilip su'nnet etilgen yahudiyler ta'repinen «su'nnetsizler» dep atalatug'ın edin'iz.
12 Ol waqıtları sizler Masix penen baylanısı joq, İzrail xalqına jat ha'm Qudaydın' olarg'a bergen wa'desinin' Kelisiminen biynesip adamlar edin'ler. Bul du'nyada u'mitsiz ha'm qudaysız bolıp jasadın'lar.
13 Biraq burın Qudaydan uzaq bolg'an sizler endi Masix İysa menen qatnas jasap, Masixtın' qanı arqalı Qudayg'a jaqın boldın'lar.
14 O'ytkeni Masixtın' O'zi – yahudiyler menen basqa milletlerdi birlestirgen bizin' jarastırıwshımız. Ol O'z denesin qurban etip, aradag'ı ayırıp turg'an diywaldı, yag'nıy dushpanlıqtı joq qıldı.
15 Yahudiyler menen basqa milletlerden O'zi menen baylanısta bolatug'ın bir jan'a xalıqtı jaratıw maqsetinde, Ol buyrıq ha'm qag'ıydalardan ibarat bolg'an yahudiylerdin' nızamın biykar etti. Bunı tınıshlıqtı ornatıp,
16 dushpanlıqtı joq qılg'an atanaq ag'ash arqalı ekewin bir jan'a xalıq* qılıp, Quday menen jarastırıw ushın isledi.
17 Masix kelip, Qudaydan uzaq bolg'an sizlerge ha'm Qudayg'a jaqın bolg'an yahudiylerge tınıshlıq Xosh Xabarın ja'riyaladı.
18 Ol arqalı bizler ha'mmemiz bir Muxaddes Ruwx penen A'kemiz Qudaydın' aldına bara alamız.
19 Solay etip, endi sizler jat ha'm shet jerli adam emessizler, al muxaddeslerge watanlas, Qudaydın' shan'arag'ının' ag'zalarısız.
20 Sizler elshiler ha'm payg'ambarlar salg'an tırnaq tas u'stine qalandın'lar. Al imarattın' mu'yeshinin' tiykarg'ı tası – Masix İysanın' O'zi boladı.
21 Onda pu'tkil imarat quralıp, İyemizge tiyisli bir muxaddes İbadatxana bolıw ushın o'sip baradı.
22 Masix penen qatnasta bolg'an sizler de Quday Muxaddes Ruwxı arqalı jasaytug'ın ma'kan bolıwın'ız ushın, ha'mmen'iz birlikte quralıp barasızlar.
