Efesliler 3 bob
1 Sol sebepten men, Pavel, basqa milletlerden bolg'an sizler ushın, Masix İysanın' tutqını boldım.
2 Sizler ushın Qudaydın' O'z miyrimi menen mag'an bergen bul xızmeti haqqında, a'lbette, esitkensizler.
3 Joqarıda qısqasha jazıp o'tkenimdey, Quday mag'an O'z sırın ayan arqalı bildirdi.
4 Bul xattı oqıg'anın'ızda, Masixtın' sırın qalay tu'singenimdi bilip alıwın'ız mu'mkin.
5 Adamzattın' a'welgi a'wladlarınan qupıya tutılıp, endi Qudaydın' muxaddes elshilerine ha'm payg'ambarlarg'a Muxaddes Ruwx arqalı ashıp berilgen bul sır mınadan ibarat:
6 basqa milletler de yahudiyler menen birge miyrasqa sherik ha'm bir denenin' ag'zaları. Olar Xosh Xabar arqalı Masix İysa sebepli berilgen wa'dege de sherik.
7 Qudaydın' ha'reket etetug'ın qu'direti menen, mag'an berilgen miyriminin' sıyı arqalı men Xosh Xabardı ja'riyalaw ushın xızmetke tayınlandım.
8 Men barlıq iseniwshiler* ishinde en' arzımag'anı bolsam da, basqa milletlerge Masixtın' sheksiz baylıg'ı haqqında ja'riyalaw ushın, Quday mag'an usı miyrimin berdi.
9 Ja'ne de, ha'mme na'rseni jaratqan Quday O'zinde a'welden-aq saqlang'an sırlı jobasın ha'mmege ashıp beriw ushın da, mag'an usı miyrimin berdi.
10 Solay etip, Qudaydın' maqseti – iseniwshiler ja'ma'a'ti arqalı aspandag'ı ha'kimshiliklerge ha'm biyliklerge O'zinin' ko'p qırlı aqıl-danalıg'ın ha'zir ma'lim etiw.
11 Quday usı ma'n'gilik maqsetin İyemiz Masix İysa arqalı a'melge asırdı.
12 Bizler Masix penen qatnasta bolıp, Og'an degen isenimimiz arqalı Qudayg'a batırlıq ha'm tolıq isenim menen jaqınlasa alamız.
13 Sonlıqtan sizler ushın shekken azaplarım sebepli qayg'ırmawın'ızdı o'tinish etemen. Men shekken bul azaplar sizlerge ullılıq alıp keledi.
14 Sol sebepten men aspandag'ı A'kemizdin' aldında dize bu'gip, duwa etemen.
15 Ol aspandag'ı ha'm jer ju'zindegi ha'r qanday milletke at bergen.
16 Quday O'z ullılıg'ının' baylıg'ı boyınsha ishki du'nyan'ızdı bekkemlew ushın, O'z Ruwxı arqalı sizlerge ku'sh-quwat bersin.
17 İsenimin'iz arqalı Masix ju'reklerin'izde jasasın. Su'yispenshilikke tamır urıp ha'm tiykarlanıp,
18 barlıq iseniwshiler menen birge Masixtın' su'yispenshiliginin' qanshelli ken', uzın, biyik ha'm teren' ekenligin tu'sinip alg'aysız.
19 Ja'ne de, sizler aqıl-oyg'a sıymaytug'ın usı su'yispenshilikti bilip, Qudaydın' pu'tkil tolılıg'ına tolıp barg'aysız.
20 Bizlerde ha'reket etiwshi qu'direti menen, Quday bizlerdin' tilegen ha'm oylag'an ha'r bir na'rsemizdi artıg'ı menen isley alatug'ın ku'shke iye.
21 Onın' Masix İysa menen qatnasta bolg'an iseniwshiler ja'ma'a'tinde, a'wladtan-a'wladqa, ma'n'gige dan'qı arta bersin! Awmiyin.
