Efesliler 4 bob
1 Solay etip, İyemiz ushın tutqın bolg'an men sizlerden jalınıp sorayman: Qudaydın' o'zlerin'izdi shaqırg'an o'm.irine ılayıqlı tu'rde jasan'lar
2 Tolıq kishipeyillik, mu'la'yimlilik ha'm sabırlılıq penen jasan'lar. Bir-birin'izdi su'yip, miyzamkesh bolın'lar.
3 O'zlerin'izdi birlestiriwshi tınıshlıq penen, Muxaddes Ruwx bergen birlikti saqlawg'a tırısın'lar.
4 Quday sizlerdi shaqırg'anda bir u'mitti berdi. Sol sıyaqlı, ha'mmemiz bir denemiz ha'm bir Muxaddes Ruwxqa iyemiz.
5 İyemiz bir, isenimimiz bir, suwg'a shomıldırılıw ra'simimiz bir.
6 Quday da bir. Ol ha'mmenin' u'stinen hu'kimdar, ha'mme arqalı ha'reket etiwshi, ha'mmemizde bar bolg'an, ha'mmemizdin' A'kemiz.
7 Biraq Quday ha'r birimizge Masixtın' saqıylıg'ına muwapıq O'z miyrimin sıyg'a berdi.
8 Sonlıqtan Muxaddes Jazıwda bılay delingen: «Ol joqarıg'a shıg'ıp, Tutqınlardı tutqın etti. Adamlarg'a sıylar berdi».
9 Endi bul: «Ol joqarıg'a shıqtı» degen so'zler neni an'latadı? Masix burın to'menge, jerge tu'sti degendi an'latadı.
10 Tu'sken Adam da, ha'r bir na'rseni toltırıw ushın aspannan da biyigirekke shıqqan Adam da – birew.
11 Masix geybirewlerdi elshi, bazılardı payg'ambar, ayırımlardı Xosh Xabardı ja'riyalawshı, al birewlerdi ja'ma'a't shopanı ha'm ustaz qılıp qoydı.
12 Ol bunı iseniwshilerdi tayarlap, olardın' xızmet qılıwı ha'm O'zinin' denesi bolg'an ja'ma'a'tti bekkemlew ushın isledi.
13 Na'tiyjede bizlerdin' ha'mmemiz Qudaydın' Ulına iseniwde ha'm Onı biliwde birlikke erisip, Masixtın' tolıq minsizligine deyin o'sip baramız.
14 Solay eken, endigiden bılay, go'dek bolmayıq. Adamlardın' jalatayshılıg'ı ha'm hiylekerligi arqalı payda bolg'an ha'r tu'rli ta'liymatlardın' samalı menen ana jaqtan mına jaqqa shayqatılmayıq.
15 Kerisinshe, haqıyqatlıqtı su'yispenshilik penen aytıp, denenin' bası bolg'an Masixqa qaray ha'r ta'repleme o'sip barayıq.
16 Onın' basqarıwında pu'tkil denenin' mu'sheleri o'z ara birigip, ha'r bir mu'she o'z minnetin atqarıwı arqalı bir-birine ja'rdem berip, baylanıs jasaydı. Usılay etip, pu'tkil dene su'yispenshilik penen o'sip, o'zin bekkemlep baradı.
17 Sonlıqtan men usını aytıp, sizlerdi İyemizdin' atınan eskertemen: bunnan bılay, butqa tabınıwshı milletlerdin' adamları sıyaqlı, bos oyqıyallarg'a berilip jasaman'lar.
18 Olardın' sana-sezimleri topırlanıp, ishindegi nadanlıq ha'm ju'reklerindegi qatallıq sebepli, Qudaydan berilgen o'mirge jat bolg'an.
19 Olar pu'tkil ar-namıs sezimlerin joytqan, ha'r tu'rli haramılıqtı na'psiqawlıq penen islew ushın, buzıqshılıqqa berilgen.
20 Biraq sizler Masixtı bunday qılıp tanımag'ansız.
21 A'lbette, sizler İysa Masix haqqında esitkenin'izden keyin, Onın' menen qatnasta bolıp, Ondag'ı haqıyqattı u'yrendin'ler.
22 Sol sebepten burıng'ı o'mir jolın'ızdan, yag'nıy denenin' jaman qa'lewleri sebepli shirigen eski ta'biyatın'ızdan waz keshin'ler.
23 Oy-pikirlerin'izdi ha'm ruwxın'ızdı jan'alap,
24 shın haqlıq ha'm muxaddeslik penen, Qudayg'a uqsatılıp jaratılg'an jan'a adam bolın'lar.
25 Sonlıqtan o'tirikten waz keship, ha'r birin'iz iseniwshi tuwısqanın'ızg'a haqıyqattı aytın'lar. Sebebi ha'mmemiz bir denenin' mu'shelerimiz.
26 G'a'zeplensen'iz de, gu'na islemen'ler. Quyash batqansha, g'a'zepten qaytın'lar.
27 Shaytang'a jol bermen'ler.
28 Urlıq islegen endigiden bılay urlıq islemesin. Kerisinshe, mu'ta'j adamlarg'a u'lestiretug'ın bir na'rsesi bolıwı ushın, ol o'z qolları menen hadal miynet etsin.
29 Awızların'ızdan hesh bir jaman so'z shıqpasın. Al ornı menen so'ylep, esitkenlerdin' ruwxın ko'teretug'ın paydalı so'zlerdi aytın'.
30 Qudaydın' Muxaddes Ruwxın qapa qılman'lar. Qutqarılatug'ın ku'nin'iz ushın usı Ruwx penen mo'rlengensizler.
31 Jek ko'riwshilik penen birlikte ha'r bir jaman niyet, ashıw, g'a'zep, baqırıs ha'm o'sek sizlerden uzaq bolsın.
32 Al bir-birin'izge miyirman ha'm jan ashır bolın'lar. Quday sizlerdi Masix arqalı keshirgendey, sizler de bir-birin'izdi keshirin'ler.
